Romans 7

1Banyaruganda, timurikumanya ku eiteeka ritegyeka omuntu akihuriire? ningambira abarikumanya eiteeka. 2Manya omukazi oshweirwe, eiteeka rimuragiira kuguma na iba, iba ogwo akihuriire; kwonka iba ku afa, ogwo mukazi aba atakitegyekwa iteeka rya iba. 3Nikwo kugira ngu ku aguma n'ondiijo mushaija iba akiriho, ayetwa omushambani; kwonka iba ku afa, aba atakitegyekwa eryo iteeka, kandi ku ashwerwa ondiijo mushaija, obwo aba atari mushambani. 4Naimwe, banyaruganda, nikwo mwafiire mutyo aha iteeka omu mubiri gwa Kristo, ngu mubone kuba ab'ondiijo, ogwo owaazoirwe omu bafiire, haza tubone kwanira Ruhanga ebijuma. 5Obu twabaire tukiri omu buhangwa bw'omubiri, okwetenga kwagwo okubi okwimukiirizibwa eiteeka, kukaba kukorera omu ngingo zaitu, kwanira rufu ebijuma. 6Kwonka hati titwakitegyekwa eryo iteeka, ahabw'okuba tukafa ahari ebyo ebyabaire bituhindwire abahuuku, ngu tubone kuheereza twine amagara masya aga Mutima, tutarikutegyekwa bihandiiko by'eiteeka erya ira. 7Mbwenu tugambe ki? Tuti: Eiteeka n'ekibi? Ngaaha! Kwonka tinkumanyire kibi, kuri eiteeka ritarakimmanyiise. Tinkumanyire kyeetwa okwetenga okubi, kuri eiteeka ritaragizire riti: Otaryetenga kubi. 8Kwonka ekibi ku kyaboneire obwiho omu kiragiro, kyaimukiiriza omuriinye okwetenga kw'emiringo yoona. Manya ahu eiteeka ritari, ekibi kiba kitaine bwiho. 9Nyowe, obu eiteeka ryabaire ritariho, nkaba mpuriire, kwonka ekiragiro ku kyaizire, ekibi kyahimbuuka, 10naanye naafa. Ekyo kiragiro ekyabaire kiri eky'okundeetera amagara, kyandugiramu rufu. 11Ahabw'okuba ekibi ku kyaboneire omu kiragiro obwiho, kyangobeza, kyanyita nikyema omuri ekyo kiragiro. 12N'ahabw'ekyo, eiteeka niryera, n'ebiragiro nibyera, bihikire kandi ni birungi. 13Mbwenu ekirungi nikyo kyandeeteire okufa? Ngaaha! Kureka ekibi nikyo kyakundeeteire nikiraba omu kirungi, ngu ekibi kibone kweyoreka ku kiri kibi, kandi ahabw'ekiragiro, ekyo kibi kibone kuba kibi kirengyesereze. 14Nitumanya eiteeka ku ririho ahabw'eby'omutima; kwonka nyowe nyine omubiri, ndi omuhuuku w'ekibi. 15Eki nkora tinkyetegyereza, ahabw'okuba eki nyenda tikyo nkora, kureka eki nyanga nikyo nkora. 16Mbwenu ku ndaabe ninkora eki ntenda, biri niinyikiriza ku eiteeka riba rirungi. 17N'ahabw'ekyo tiinye nkikora, kureka n'ekibi ekintuuramu; 18ahabw'okuba nimmanya ngu omuriinye, nikwo kugira ngu omu buntu bwangye, ku hatabamu karungi koona. Manya nobu nyenda kukora ekirungi, kwonka mbura agakikora. 19Ekirungi eki nyenda tikyo nkora, kureka ekibi eki ntenda nikyo nkora. 20Reero ku ndaabe nkora eki ntenda, nikwo kugira ngu tiinye nkikora, kureka n'ekibi ekintuuramu. 21N'ahabw'ekyo nshanga hariho eiteeka, ngu ku mba niinyenda kukora ekirungi, ekibi kimba haihi. 22Manya omu mutima gwangye nsiima eiteeka rya Ruhanga; 23kwonka omu ngingo zangye, nshangamu erindi iteeka eririkurwanisa ery'omu bwengye bwangye, rimpindura omuhuuku w'eiteeka ry'ekibi ekituura omu ngingo zangye. 24Ai bambe, nyowe omuntu enshoberwa! N'oha orinjuna ogu mubiri gw'okufa? 25Ruhanga naakasingye kureeba ngu nyine Omujuni Yesu Kristo Mukama waitu! Reero nu, nyowe nyenka omu bwengye bwangye nkoresibwa eiteeka rya Ruhanga, kwonka omu buntu bwangye nkoresibwa eiteeka ry'ekibi.

will be added

X\