Romans 6

1Mbwenu tugambe ki? Turi ab'okuguma omu kibi, ngu embabazi za Ruhanga zibone kukanya? 2Nikikabure! Itwe abaafiire aha kibi, nitubaasa tuta kukigumamu? 3Timurikumanya ku itwe twena abaabatiziibwe omuri Kristo Yesu, twabatiziibwe ngu tufe nawe? 4Manya ku twabatiziibwe, twaziikwa hamwe nawe, twafa, ngu nk'oku Kristo yaazoirwe omu bafiire obushoboorozi bw'ekitiinwa kya Ishe, naitwe tubone tutyo kugyendera omu magara masya. 5Reero ku turaabe twateerainwe nawe omu kufa nk'okwe, nikwo turiteeranwa nawe tutyo omu kuzooka nk'okwe. 6Nitumanya ngu omuntu waitu owa ira akabambwa aha musharaba hamwe nawe, ngu omubiri ogukora ekibi guhwerekyerezibwe, turekye kugaruka kuba abahuuku b'ekibi obundi. 7Manya ofiire, aba atakitegyekwa kibi. 8Naitwe, ku turaabe twafiire hamwe na Kristo, nitwikiriza ngu turyamereera nawe. 9Ahabw'okuba nitumanya ngu nk'oku Kristo yaazookire omu bafiire, tarifa bundi; rufu tekimutegyeka. 10Okufa oku yaafiire, akafa aha kibi rimwe yaaheza; kwonka amagara agu aine, againe ahari Ruhanga. 11Naimwe nikwo mushemereire kwebara nk'abafiire aha kibi, kandi abahuriire ahari Ruhanga omuri Kristo Yesu. 12N'ahabw'ekyo mutaikiriza ekibi kutegyeka omu mibiri yaanyu efa, mukoorobera okwetenga kwayo kubi. 13Murekye kurekurira engingo zaanyu ekibi kuba ebikwato by'okukoresa ebitahikire, kureka mwerekurire Ruhanga nk'abahuriire, abarugire omu bafiire, kandi engingo zaanyu muziheyo ahari Ruhanga kuba ebikwato by'okukoresa eby'okuhikiirira. 14Manya ekibi tikiribategyeka, ahabw'okuba timurikutegyekwa iteeka, kureka embabazi za Ruhanga. 15Mbwenu shi, tukore ebibi, ngu ahabw'okuba titurikutegyekwa iteeka, kureka embabazi za Ruhanga? Rubuuza! 16Timurikumanya ngu ogwo ou mweha nk'abahuuku kuhurira, muba muri abahuuku b'ogwo ou muhurira, yaaba b'ekibi ekitwara omu kufa, yaaba b'okuhurira okutwara omu kuhikiirira? 17Kwonka Ruhanga naakasingye, kureeba imwe abaabaire bari abahuuku b'ekibi, mbwenu mubaire abarikworobera enyegyesa ei mwahairwe, mwihire aha mutima; 18kandi ku mwaihirwe omu kibi, mwahinduka abahuuku b'okuhikiirira. 19Ningamba nk'omuntu ahabw'obweremwa bwanyu bw'obuntu. Nk'oku mwabaire murekurira engingo zaanyu eby'enshoni, n'ebindi ebirikukiraho obubi, mbwenu mube nikwo mwazirekurira eby'okuhikiirira ebireeta okwezibwa. 20Manya obu mwabaire mukiri abahuuku b'ekibi, eby'okuhikiirira bikaba bitaine ki bibakwatiire. 21Mbwenu obwo mukaihamu karungi ki omuri ebyo ebirikubakwatsa enshoni obwa hati? Manya omuheru gwabyo n'okufa. 22Mbwenu hati obu mwihirwe omu buhuuku bw'ekibi, mukaba abahuuku ba Ruhanga; ekiraarugyemu n'okwezibwa, reero aha muheru gwakwo mukatunga amagara agatahwaho. 23Manya ebihembo by'ekibi n'okufa; kwonka ekiconco ki Ruhanga aheera busha, n'amagara agatahwaho omuri Kristo Yesu Mukama waitu.

will be added

X\