Romans 5

1N'ahabw'ekyo nk'oku tubarwa kuba abahikiriire ahabw'okwikiriza, twine obusingye ahari Ruhanga ahabwa Mukama waitu Yesu Kristo, 2owaatureeteire kusiimwa Ruhanga ahabw'okwikiriza oku twine. N'ahabw'ekyo nitushemererwa ahabw'amatsiko g'okubagana aha bya Ruhanga. 3Haza tikyo kyonka, kureka nitwongyeraho n'okwesiimira omu by'obusaasi; nitumanya ku eby'obusaasi birugwamu okugumisiriza; 4n'okugumisiriza kukarugwamu okugira emicwe ehamire; kandi okugira emicwe ehamire kukatureetera okugira amatsiko, 5n'ago matsiko tigatureebya, ahabw'okuba Ruhanga akatuha Mutima Orikwera owaatushukire omu mitima rukundo ya Ruhanga. 6Manya ku twabaire tukiri enshoberwa, omu bunaku buhikire, Kristo yaatufeera, itwe abatatiina Ruhanga. 7Kigumire omuntu kufeera ohikiriire; nangwa shana akaayemera kufeera ow'emicwe mirungi. 8Kwonka Ruhanga ayoreka rukundo ye ahariitwe, ahabw'okuba ku twabaire tukiri abasiisi, Kristo yaatufeera. 9Mbwenu nk'oku twaherize kuheerwa okuhikiirira omu kufa kwe, nikwo turyeshumbyaho kujunwa ahabwe, tukakira ekiniga kya Ruhanga. 10Ahabw'okuba ku turaabe twagarukanisiibwe na Ruhanga okufa kw'Omwana we tukiri abazigu be, mbwenu hati obu twagarukaine nawe, amagara ge nigaija kukizaho okutujuna. 11Kandi ti ekyo kyonka, kureka nitutaho n'okwesiimira omuri Ruhanga, ahabwa Mukama waitu Yesu Kristo, otuhaisize hati okwo kugarukana. 12Nk'oku ekibi kyaizire omu nsi ahabw'omuntu omwe, ekyo kibi kikareeta okufa; nikyo rufu yaahikiire aha bantu boona, ahabw'okuba boona bakashiisha. 13Buzimazima eiteeka ritakatairweho, ekibi kikaba kiri omu nsi, kandi ahu eiteeka ritari, ekibi tikibarirwa muntu. 14Kwonka shi rufu ekategyeka abantu okwiha ahari Adamu, okuhitsya ahari Musa; nangwa n'abatarasiisire nk'oku Adamu yaacumwire, Adamu ogwo owaabaire ari ekyeshusha ky'ori, owaabaire ari ow'okwija. 15Kwonka ekiconco kya Ruhanga ekyaheereirwe busha, tikiri nk'ekyo kicumuro kya Adamu. Ahabw'okuba ekicumuro ky'omuntu omwe, ku kiraabe kyareeteire baingi kufa, embabazi za Ruhanga n'ekiconco kya busha eky'omuntu omwe Yesu Kristo, nikwo byakirizeho bityo okushaagaana omuri baingi. 16Kandi ekyo kiconco kya Ruhanga tikiri nk'ebyarugire omu kicumuro kye kimwe kikareetera abantu kusingwa orubanja. Kwonka ebicumuro bingi by'abantu ku byakozirwe, haabaho ekiconco ki batashemereire, eky'okubaihaho orubanja. 17Ekicumuro ky'omuntu omwe, ku kiraabe kyareeteire rufu kwema ahabw'ogwo muntu, n'abaakiira embabazi za Ruhanga ezishaagaine n'ekiconco ky'okuhikiirira, nikwo barikizaho kwemekwa omu magara masya ahabw'omuntu omwe Yesu Kristo. 18Kandi nk'oku ekicumuro ky'omuntu omwe kyareeteire abantu boona okusingwa orubanja, n'eky'okuhikiirira eki omuntu omwe yaakozire, nikwo kireetera kityo abantu boona kwihwaho orubanja n'okutunga amagara. 19Ahabw'okuba nk'oku okutahurira kw'omuntu omwe kwareeteire baingi kuba abasiisi, n'okuhurira kw'omuntu omwe nikwo kurireetera baingi kuba abahikiriire. 20Manya eiteeka ku ryaizire, ryakanyisa ebicumuro, kwonka shi oku ebicumuro byarengyesereize kukanya, nikwo n'embabazi za Ruhanga zaakirizeho kukanya, 21kandi nk'oku ekibi kyategyekyeire omu kufa, n'embabazi za Ruhanga nikwo zitegyekyera omu kuhikiirira, zikatuhitsya omu magara agatahwaho, ahabwa Yesu Kristo Mukama waitu.

will be added

X\