Romans 4

1Mbwenu shi tugambe ki aha byabaire ahari Aburahamu, tataitwe omu mubiri? 2Manya Aburahamu kuri yaahairwe okuhikiirira ahabw'ebi yaakozire, akaagizire eky'okwehimbisizaho, kwonka ahari Ruhanga tarakigizire. 3Mbwenu Ebyahandiikirwe nibigamba ki? Nibigira biti: Aburahamu akaikiriza Ruhanga, ekyo kyamubarirwa kuba okuhikiirira. 4Manya weena okora omurimo, ebihembo bye tibimubarirwa nk'ebimuheereirwe busha, kureka nk'enyihurano. 5Kandi oteegamira bi arikukora, kwonka akaikiriza Ruhanga oyeza abasiisi akabahindura abarungi, okwikiriza Ruhanga kwe nikwo kumureetera okuhikiirira. 6Nk'oku Daudi nawe yaarangire omugisha oguheebwa omuntu ou Ruhanga abara kuba ohikiriire, ataine bi akozire ati: 7Ka n'ab'omugisha abasaasiirwe ebishobyo byabo, bakaihwaho ebibi byabo! 8Ka n'ow'omugisha omuntu ou Mukama atabarira kibi! 9Mbwenu ogwo mugisha guba ogw'abashazirwe bonka, nari n'ogw'abatashazirwe nabo? Twagira tuti: Okwikiriza kwa Aburahamu kukamureetera kubarwa kuba ohikiriire. 10Mbwenu shi kukamubarirwa ryari? Yaashazirwe nari atakashazirwe? Tikuramubariirwe yaashazirwe, kureka atakashazirwe. 11Bwanyima nikwo kusharwa. Ekyo kikaba akamanyiso k'okuhamya okuhikiirira, oku yaatungire ahabw'okwikiriza atakashazirwe. Mpaho nawe nikwo kuba ishenkuru wa boona abaikiriza batashazirwe, bakabarwa kuba abahikiriire. 12Kandi ngu abe ishenkuru w'abashazirwe, abatafiire kusharwa kwonka, kureka kandi abagyendera omu kirari ky'okwikiriza oku tataitwe Aburahamu yaabaire aine atakashazirwe. 13Manya Aburahamu n'abaijukuru tibararaganisiibwe kuhungura ensi ahabw'okuhitsya eby'omu iteeka, kureka ahabw'okuhikiirira okwarugire omu kwikiriza kwabo. 14Abahamira aha iteeka kuri nibo bahunguzi, okwikiriza biri n'okwa busha, n'okuraganisa biri tikwine mutambo. 15Manya eiteeka ritureetera okufubirwa Ruhanga; kandi ahu eiteeka ritari, tihabaho kurihenda. 16Nikyo okwo kuhikiirira kukomookyera aha kwikiriza, ngu okuraganisa kubone kuba okw'embabazi kandi kuhamize baijukuru be boona, ti abo bonka abaramatira aha iteeka, kureka n'abo abaine okwikiriza nk'okwa Aburahamu. Manya Aburahamu niwe tataitwe twena, 17nk'oku kyahandiikirwe ngu: Nkakutaho kuba ishenkuru w'amahanga maingi. Aburahamu ogwo ekyo akakiraganisibwa Ruhanga ou yaikiriize, niwe ogwo ozoora abafiire kandi oragiira ebitariho bikabaho. 18Aburahamu akaikiriza, yaagira amatsiko omu mwanya gw'okugahwa, ngu abone kuba Ishenkuru w'amahanga maingi, nk'oku yaagambiirwe ati: Oruzaaro rwawe ruryaba rutyo. 19Kwonka taratentebukire mu kwikiriza, nobu yaareebire omubiri gwe guri nk'oguhwaireyo, ahabw'okuba akaba ahikize emyaka y'obukuru nka igana; na Saara ari engumba. 20Kandi tiharabaireho kutaikiriza okwamureeteire kubangaanisa eki Ruhanga yaaraganiise, kureka akongyera kugira okwikiriza kuhamire, haza yaaha Ruhanga ekitiinwa. 21Manya akaba naahamiza kimwe ku Ruhanga arikubaasa kukora eki yaaraganiise. 22Nikyo okwikiriza kwe kwamureeteire kubarwa ku ari ohikiriire. 23Kwonka ebigambo ebirikugira biti: Kukamureetera kubarwa kuba ohikiriire, tibirahandiikirwe habwe wenka, 24kureka n'ahabwaitu. Naitwe okwo kuhikiirira kuryatubarirwa: itwe abaikiriza ogwo owaazoire Yesu Mukama waitu omu bafiire. 25Niwe ogwo owaahairweyo kwitwa ahabw'ebibi byaitu, kandi akazooka ngu abone kutuhaisa okuhikiirira.

will be added

X\