Romans 16

1Nimbakwatsa Foibe munyaanyaitwe, omuhwezi ow'omu kigombe ky'abaikiriza ba Kenkereya. 2Mumwakiire omuri Mukama nk'oku kishemereire abarikwera, kandi mumuhwere omuri kyona eki ariba akyenire, ahabw'okuba abaire naahwera baingi, naanye ntabuziremu. 3Mundamukize Purisika na Akwila, abakozi bagyenzi bangye, abu tuheereza kumwe Kristo Yesu, 4abaayogire amagara gaabo ngu nkize agangye. Tibarikusiimwa nyowe nyenka, kureka n'ebigombe by'abaikiriza byona eby'omu Banyamahanga. 5Mundamukize n'ekigombe ky'abaikiriza eky'omu nju yaabo. Mundamukize munywani wangye Epeneeto, owaabandize kuhindukira Kristo omuri Asiya. 6Mundamukize Mariya, owaabahendekyeire munonga. 7Muramutsya Anderoniko na Yuniya, beene waitu abu naabaire nyine omu kihome; abantu rugambwa omu ntumwa kandi abambandiize kuba Abakristo. 8Muramutsye Ampuliyato, munywani wangye omuri Mukama. 9Muramutsye Urubaano, omukozi mugyenzi waitu omuri Kristo, hamwe na Sitaaku, munywani wangye. 10Muramutsye Apele orikusiimwa okuba Omukristo omwesigwa. Muramutsye ab'omuka ya Arisitobulo. 11Mundamukize na Herodioni ow'oruganda rwangye. Muramutsye n'abo abari omuri Mukama ab'omu ka ya Narikiso. 12Muramutsye Turufaina na Turufoosa, abakozi omuri Mukama. Mundamukize omukundwa Peresi, owaakozire munonga omuri Mukama. 13Muramutsye Ruufo, ekibaaju omuri Mukama, na nyina owambeeraire maawe. 14Mundamukize Asinkurito, Filegooni, Herume, Paturoba, Heruruma n'abanyaruganda abari hamwe nabo. 15Muramutsye Filoologo, Yuliya, Neereo na munyaanya, taho na Olumpa, n'abarikwera boona abari hamwe nabo. 16Muramukanisane okunywegyerana okurikwera. Ebigombe by'abaikiriza Kristo byona nibibaramutsya. 17Banyaruganda, naabeehanangiriza, mwerinde abarikureeta eby'okubataanisa n'okubaremesa, ebirikuhakanisa enyegyesa ei mwayegyesiibwe; mubeetantare. 18Ahabw'okuba ab'omuringo ogwo tibakorera Mukama waitu Kristo, kureka enda zaabo. Kandi emitima y'abataine bugobya, bagibeihabeihesa okugamba karimi karungi n'okuteera ekimama. 19Manya nk'oku okworoba kwanyu kurangainwe hoona, nikyo ndikubashemererwa. Kwonka niinyenda ku muba abanyabwengye aha kirungi, kandi abataine buryarya aha kibi. 20Reero Ruhanga Mukama okomookwaho obusingye naija kurahuka kusiitagurira Sitaane ahansi y'ebigyere byanyu. Embabazi za Mukama waitu Yesu Kristo zigume naimwe! 21Timoteeho, omukozi mugyenzi wangye, naabaramutsya; Lukio na Yasooni na Sosipateeri mwene waitu, nabo nibabaramutsya. 22Naanye Teritio, owaahandiika ebaruha egi, nimbaramutsya omuri Mukama. 23Gaayo, orikunkunira hamwe n'ekigombe ky'abaikiriza kyona ekiteeranira owe naabaramutsya. Eraasito, omubiiki w'empiiha z'orurembo, na mwene waitu Kwarito nibabaramutsya. 24[Embabazi za Mukama waitu Yesu Kristo zigume naimwe mwene! Amiina.] 25Mbwenu omuri Yesu Kristo, ka tuhimbise Ruhanga, ogira obwengye wenka, orikubaasa kubagumya. Ago nigo Makuru Marungi agu ngamba nindangirira Yesu Kristo, kandi niryo ibanga eryabaire risherekirwe okwiha iranaira, 26kwonka hati rishuuruirwe. Ruhanga otahwaho niwe yaaragiire ku rimanyisibwa ab'amahanga goona, ngu baikirize kandi boorobe; haza ekyo nikyo ebyahandiikirwe abarangi birikugamba. 27Mbwenu Ruhanga ogwo aheebwe ekitiinwa obutwire bwona! Amiina.

will be added

X\