Romans 15

1Itwe abaine amaani, tushemereire kuhwera abatagaine, kutari kwegwisa gye twenka. 2Reka buri omwe omuriitwe agwise gye mutaahi we ahabw'okumugasira n'okumuhamya. 3Ahabw'okuba Kristo nawe tareegwisize gye, kureka akagira nk'oku kyahandiikirwe kiti: Ebijumo by'abaakujumire niinye byagwereire. 4Manya byona ebyahandiikirwe ira bikahandiikwa kutwegyesa, ngu tugire amatsiko ahabw'okugumisiriza n'okuhuumurizibwa ebyo Byahandiikirwe. 5Mpaho nu Ruhanga, okomookwaho okugumisiriza n'okuhuumuriza, abahe okugira omutima gumwe, nk'oku Kristo Yesu ayenda, 6mubone kuhimbisa Ruhanga, Ishe wa Mukama waitu Yesu Kristo n'omutima gumwe n'eiraka rimwe. 7Mwakiirane nk'oku Kristo yaabaakiire, Ruhanga abone kuheebwa ekitiinwa. 8Manya nimbagambira nti: Kristo akaba omuheereza w'abashazirwe, kworeka amazima ga Ruhanga, ngu abone kuhikiiriza ebi yaaraganiise baatatenkuriitwe. 9Kandi ngu Abanyamahanga baboone kuhimbisa Ruhanga ahabw'embabazi ze, nk'oku kyahandiikirwe kiti: N'ahabw'ekyo ndyakuhimbisiza omu Banyamahanga, nyeshongore eby'okuhimbisa eiziina ryawe. 10Kandi kiti: Banyamahanga 'mwe mushemererwe hamwe n'abantu be! 11Kandi kiti: Imwe Banyamahanga mwena, musingize Nyakubaho, naimwe amahanga goona mumuhimbise! 12Na Isaaya ayongyera agira ati: Ow'oruzaaro rwa Yese aryaija, aimukye kutegyeka Abanyamahanga; n'abo Banyamahanga bamugiremu amatsiko. 13Ruhanga okomookwaho amatsiko abaijuze okushemererwa n'obusingye ahabw'okumwikiriza, mubone kugira amatsiko gashaagaine ahabw'amaani ga Mutima Orikwera. 14Banyaruganda, nimpamiza kimwe ku mwijwire emicwe mirungi, ku mwine okumanya kuhikire, kandi ku murikubaasa kuhaburana. 15Kwonka banyaruganda, aha bintu bimwe naabahandiikira n'obumanzi, nimbaijutsya ku Ruhanga yangiriire embabazi. 16Nkaba omuheereza wa Kristo Yesu omu Banyamahanga, ninkora omurimo gw'obuheereza bw'okurangirira Amakuru Marungi ga Ruhanga, ngu Abanyamahanga babone kuba empongano erikusiimwa Ruhanga, kandi eyeziibwe Mutima Orikwera. 17N'ahabw'ekyo omuri Kristo Yesu nyine ekirikuunyehimbisisa ahabw'omurimo ogu nkoreire Ruhanga. 18Manya tinkaayehanga kugamba aha kindi kyona, kureka aha bi Kristo yaakoreire omuriinye, kureetera Abanyamahanga kworobera Ruhanga, omu bi naagambire n'omu bi naakozire, 19ahabw'amaani g'eby'obumanyiso n'eby'okutangaaza, n'amaani ga Mutima Orikwera. Nikyo naabaasiize kurangirira kimwe Amakuru Marungi ga Kristo, okuruga Yerusalemu n'okwehinguririza, nkarugaho nkahika Iliiriko. 20Ekyo kikanteera omuhimbo kurangirira Amakuru Marungi omu myanya ei eiziina rya Kristo ryabaire ritakarangiriirwemu, ngu ntakaayombeka aha musingi gw'ondiijo, 21kureka ngu kibe nk'oku kyahandiikirwe kiti: Aryareebwa abatakamugambirwahoga, n'abatakamuhurirahoga baryamwetegyereza. 22Ekyo nikyo kyanzibiire kaingi kwija owaanyu. 23Kwonka hati nk'oku ntakiine ky'okukora omuri ebi byanga, kandi nk'oku mmazire emyaka mingi nyine ekihika ky'okwija owaanyu, 24mbwenu ku ndiba ninza Spaniya, nyine amatsiko g'okubarabaho nkabareeba. Kandi ku ndimara naimwe ebiro bikye, naabahwa orushusho, muryantungira eby'okunkwatsa omu rugyendo rwangye. 25Kwonka obwa hati ninza Yerusalemu kutwarira abarikwera eby'okubahwera. 26Ahabw'okuba Abakristo ba Makedoniya n'aba Akaiya bakasiima kuha aha byabo, kuhwera abooro ab'omu barikwera ba Yerusalemu. 27Ekyo bakasiima kukikora kandi buzimazima babaineho eibanja; ahabw'okuba Abanyamahanga ku baraabe baabagaine nabo ebirungi by'omutima, bashemereire kubakwatsa n'omu by'omubiri. 28N'ahabw'ekyo ku ndimariiriza ebyo, naaheza kubahitsyaho ebyarundainwe, ndyabarabaho ninza Spaniya. 29Kandi nimmanya ngu ku ndiba niinyija owaanyu, ndyaijana emigisha ya Kristo eijuriire kimwe. 30Mbwenu banyaruganda, nimbeehanangiriza ahabwa Mukama waitu Yesu Kristo n'ahabwa rukundo ya Mutima Orikwera, ku mwezirikira hamwe naanye kunshabira ahari Ruhanga. 31Munshabire ngu mbone kukira abatarikwikiriza ab'omuri Buyudaaya, kandi n'eby'obuhwezi ebi ndikutwara Yerusalemu bibone kusiimwa abarikwera. 32Haza Ruhanga ku araasiime, mbone kwija owaanyu nshemereirwe, nduhuukire omuriimwe. 33Ruhanga, okomookwaho obusingye, agume naimwe mwena! Amiina.

will be added

X\