Romans 14

1Otaine maani mu kwikiriza, mumwakiire, mutarikumuteeza mpaka omu bi arikuteekateeka. 2Hariho oikiriza ngu naabaasa kurya ibara kintu, haza ow'okwikiriza kukye arya emboga zonka. 3Orikurya ekintu nanka arekye kugaya otarikukirya, n'otarikukirya arekye kucwera orubanja orikukirya, ahabw'okuba Ruhanga yaaherize kumwakiira. 4Mbwenu iwe, niiwe oha orikucwera omuheereza w'ondi orubanja? Eky'okwemerera kwe nari okugwa kwe kiri ahari Mukama we; kandi aryayemerera ahabw'okuba Mukama we niwe arikubaasa kumwemerezaho. 5Omuntu omwe ateekateeka ngu ekiro kimwe ni kikuru okukira ekindi, haza ondiijo agira ngu ebiro byona nibingana. Ka buri omwe agire obusingye bw'okuhamira aha ki arikuteekateeka ngu kihikire. 6Orikukuza ekiro akikuza kuhaisa Mukama ekitiinwa, n'orikurya nawe arya kuhaisa Mukama ekitiinwa, ahabw'okuba asiima Ruhanga; kandi n'otarya ayezibira kurya ahabw'okuhaisa Mukama ekitiinwa kandi asiima Ruhanga. 7Manya omuriitwe tihariho obaho ahabwe wenka, kandi tihariho ofa ahabwe. 8Ku tubaho, tubaho ahabwa Mukama, kandi ku tufa, tufa ahabwa Mukama. N'ahabw'ekyo yaaba tubaho, yaaba tufa, turi aba Mukama. 9Ekyo nikyo Kristo yaafeereire kandi akazooka omu bafiire, ngu abone kuba Mukama w'abafiire n'abahuriire. 10Mbwenu shi noocwerera ki mwene sho orubanja? Nari shi noogayira ki mwene sho? Manya twena turyayemerera omu maisho g'ekitebe ky'eiramuriro ekya Ruhanga. 11Ahabw'okuba kikahandiikwa kiti: Mukama naagira ati: Nk'oku ndi Nyakubaho, buri muntu aryantsimbira amaju, na ibara muntu aryaimutsya eiraka ahimbise Ruhanga 12N'ahabw'ekyo omuntu weena omuriitwe aryayetonganira ahari Ruhanga. 13Mbwenu nu ka turekye kugaruka kucwererana emanja, kureka nangwa tumaramaze okutataho ekirikuteeza mwene waitu entsibo, nari ekirikumugwisa. 14Nimmanya kandi nimpamiza kimwe omuri Mukama Yesu, ku hatariho kirikuzira ahabwakyo, kureka kiba ekirikuzira ahari ogwo orikuteekateeka ngu nikizira. 15Kwonka mwene sho ku araabe naakorwa kubi ebi orikurya, nooba otakimwiniire mitwarize ya rukundo. Otarireka mugyenzi waawe ou Kristo yaafeereire, kuhwerekyerera ahabw'ebi orikurya. 16N'ahabw'ekyo, imwe eki murikusiima, kirekye kureetera abandi kukigambaho kubi. 17Manya obukama bwa Ruhanga tibuba byokurya na byokunywa, kureka buba okuhikiirira n'obusingye n'okushemererwa, ebiruga omuri Mutima Orikwera. 18Oheereza atyo Kristo, niwe agwisa gye Ruhanga akasiimwa n'abantu. 19N'ahabw'ekyo ka tugire emitwarize erikureeta obusingye kandi twombekane. 20Otaita omurimo gwa Ruhanga ahabw'ekyokurya. Ebintu byona omu mazima biba ebishemeire, kwonka ekibi n'omuntu kuteeza abandi entsibo ahabw'eki arikurya. 21Haakiri okutarya nyama, nari okutanywa viino, nari okutakora kindi kyona ekirikuteeza mwene sho entsibo. 22Okwikiriza oku oine, guma nakwo n'enaama yaawe na Ruhanga! N'omuhiirwa otarikwecwera rubanja omu bi arikuteekateeka ngu bihikire. 23Kwonka orya naabangaanisa asingwa orubanja, ahabw'okuba akikora omutima gwangire; manya kyona ekitaruga mu kwikiriza kiba ekibi.

will be added

X\