Romans 11

1Mbwenu ka mbuuze: Ruhanga akacwera kimwe abantu be? Rubuuza! Manya naanye ndi Omuisiraeli, ow'oruzaaro rwa Aburahamu, ow'omu ruganda rwa Benyamiini. 2Ruhanga taracwire bantu be, abu yaamanyire ira. Timurikumanya eki Ebyahandiikirwe birikugamba ahari Eliya, obu yaarega Abaisiraeli ahari Ruhanga? Ati: 3Mukama, reeba, baitsire abarangi baawe, baasheenya amatambiro gaawe, mbwenu niinye ntsigaireho nyenka, kandi naanye nibenda kuunyita. 4Beitu Ruhanga akamugarukamu ata? Ati: Nyetsigariize abantu kashanju abatakatsimbiraga Baali amaju. 5Na mbwenu omu bunaku obu nikwo kiri. Hariho abatsigaireho abaatoorainwe ahabw'embabazi. 6Reero ku baraabe baatoorainwe ahabw'embabazi, biri tibaratoorainwe ahabw'ebi baakozire. Kuri kyabaire kityo, biri obwo embabazi tizaakubaire mbabazi. 7Mbwenu shi tugire tuta? Manya Abaisiraeli tibaratungire ki baabaire nibenda. Abatoorainwe bo bakakitunga, kwonka abandi emitima yaabo yaagangaazibwa, 8nk'oku kyahandiikirwe kiti: Ruhanga akabaha emitima ehugire, amaisho gatarikureeba, n'amatu gatarikuhurira n'okuhitsya eri izooba. 9Na Daudi akagira ati: Ekiihuro kyabo ka kibahindukire omutego n'oruriba n'obusya; bibe nibyo byaba enzimuurano yaabo! 10Amaisho gaabo ka gagiibweho oruho, gabure kureeba, n'emigongo yaabo ogiinikye ebiro byona. 11Nikyo ndikubuuriza nti: Ebyo bakateerwa entsibo ngu bagwe? Nikikabure! Kwonka okushobya kwabo kukareetera Abanyamahanga okujunwa okwitsize Abaisiraeli eihari. 12Okucumura kwabo ku kuraabe kwatungiise ensi yoona, n'okutentebuka kwabo kwatungiise Abanyamahanga, kaashwa okugarurwaho kwabo boona? 13Mbwenu ningambira imwe Abanyamahanga, nk'oku ndi entumwa aha Banyamahanga, nimpaisiriza obutumwa bwangye, 14ngu mbone kwitsa beene waitu Abayudaaya eihari, haza njune bamwe omuribo. 15Okucuubwa kwabo ku kuraabe kwareeteire ensi yoona kugarukana na Ruhanga, mbwenu okwakiirwa kwabo kuryashura ki! Kureka okuzooka omu bafiire bakagira amagara. 16Esaano y'omuganuro ku eba eri erikwera, n'ekiihuro kyona nikwo kiba; kandi omuzi ku guba guri ogurikwera, n'amataagi nago nikwo gaba. 17Mbwenu amataagi gamwe ku garaabe gahagwirweho, kandi iwe, omutookwa gw'omuti gw'omuoliva ogw'omu ishwa, okahagikwa omu mwanya gwago, okariisibwa hamwe nago ebirikuruga omu mizi yaagwo, 18toshemereire kwehimbisiza ahari ago mataagi. Ku oraabe nooyehimbisa, ijuka ku omuzi gutakumezireho, kureka ku niiwe ogumezireho. 19Noobaasa kugira oti: Amataagi gakahagurwaho, ngu mbone kuhagikwamu. 20Ekyo n'eky'amazima; gakahagurwaho ahabw'okutaikiriza kwago; kwonka iwe, ekikwemereizeho n'okwikiriza. N'ahabw'ekyo oteehimbisa, kureka guma otiine. 21Ahabw'okuba Ruhanga ku araabe atarasaasiire mataagi g'obuhangwa, naiwe tarikusaasira. 22Yetegyereze embabazi n'okutagira saasi ebya Ruhanga; okutagira saasi kwe aha bagwire, n'okugira embabazi ahariirwe, waaba ozigumiremu. Kwonka ku oriba otazigumiremu, naiwe oryahagurwaho. 23Nangwa na bari, ku baraabe batagumiire mu kutaikiriza, baryahagikwamu; ahabw'okuba Ruhanga naabaasa kugaruka kubahagikamu. 24Mbwenu iwe, ku oraabe waahagwirwe aha muti gw'omuoliva omu buhangwa ogw'omu ishwa, okahagikwa omu muti gw'omuoliva ogubyairwe, ogu otaine buzaare nagwo, kaashwa amataagi g'obuhangwa agarikugaruka kuhagikwa omu muti gwago ogw'omuoliva! 25Banyaruganda, niinyenda ku mumanya eri ibanga, ngu murekye kwemanya; ahabw'okuba bamwe omu Baisiraeli bakagangaara, kandi baryaguma bagangaire okuhitsya obu Abanyamahanga boona baritwijamu. 26Abaisiraeli nabo baryajunwa boona, nk'oku kyahandiikirwe kiti: Omujuni aryaruga Siyooni, aihe ahari Yakobo okutatiina Ruhanga; 27Kandi egyo niyo eriba endagaano yangye nabo, ku ndibaihaho ebibi byabo. 28Bo, omu kureebera aha Makuru Marungi, baba abazigu ba Ruhanga, ngu imwe mubone kugaikiriza. Kwonka omu kureebera aha kutooranwa baba enkundwa, ahabwa baishenkurubo. 29Ahabw'okuba Ruhanga taha na nyamwaka, kandi tateera kiganja ou yaayeta. 30Naimwe, ira mukagomera Ruhanga, kwonka hati mugiriirwe embabazi ahabw'okugoma kwabo. 31Mbwenu nabo bagomire, ngu embabazi ezi mwagiriirwe, nabo bazigirirwe. 32Manya Ruhanga akabarira abantu boona obugomi, ngu abone kugirira boona embabazi. 33Ebishi, obutungi bwa Ruhanga n'obwengye bwe n'okumanya kwe tibiine bugarukiro! Emicwere ye k'etarikucondoozibwa, n'emitwarize ye k'etarikushoboororwa! 34Mbwenu n'oha oramanyire ebiteekateeko bya Mukama? N'oha oramuhabwire? 35Nainga n'oha oramuhaire ekiconco ngu nawe amugarurire? 36Manya byona niwe bikomookaho, niwe abibaisaho, kandi niwe bihereraho. Aheebwe ekitiinwa ebiro byona! Amiina.

will be added

X\