Revelation 9

1Maraika wa kataano ku yaateire enzamba ye, naareeba enyonyoozi yaahanantuka omu iguru, yaayetuura aha nsi. Egyo nyonyoozi, etyo eheebwa ekikomoorozo ky'omuhengyere gw'ekiina ekitaine bugarukiro. 2Mpaho Nyonyoozi aigura omuhengyere gw'ekyo kiina. Omuri ogwo muhengyere haareetwamu omwika gurikucumbuuka nk'ogw'eiziiko rihango; eizooba n'akaabunga byatimbwa omwirima ahabw'omwika gwareetsirwe omuri ogwo muhengyere. 3Bwanyima omuri ogwo mwika haatimbiramu enzigye, zaateera ensi; kandi zaaheebwa obushoboorozi nk'obw'ebinyabushegu. 4Zaaragiirwa okutashiisha bunyaatsi, nari ekimezire kyona ekibisi, nainga omuti gwona, kureka okukora kubi abantu abataine kamanyiso ka Ruhanga aha buso bwabo. 5Zaikirizibwa kubabonaboneseza ameezi ataano, kwonka zitarikubaita. Haza okusaasa kwazo kukaba kuri nk'oku ekinyabushegu kisaasa omuntu kyamutonera. 6Reero omuri ago meezi ataano abantu baryasherura Rufu, kwonka tibarigibona; beetengye okufa, haza Rufu ebahungye. 7Omu mireebekyere, ezo nzigye zikaba nizishusha embaraasi ziteekateekyeirwe orugamba; aha mitwe yaazo hariho ebirikushusha ebirunga by'ezaabu; n'ahamaisho haazo nihashusha ah'abantu; 8obwoya bwazo buri nk'eishokye ry'abakazi, n'amaino gaazo gari nk'ag'entare. 9Zikaba ziine engamba ezeemi nk'ebyoma by'okwekingiza aha kifuba, kandi okuhoorera kw'amapapa gaazo kuri nk'okw'ebigaari bingi ebirikukururwa embaraasi ezirikusyoka niziza aha rugamba. 10Zikaba ziine emikira n'envuri nk'eby'ebinyabushegu, kandi obushoboorozi bwazo bw'okubonaboneseza abantu ameezi ataano buri omu mikira yaazo. 11Zikaba ziine omugabe orikuzitegyeka, niwe maraika w'ekiina ekitaine bugarukiro, orikwetwa Abadooni omu Ruheburaayo, kandi omu Ruguriiki naayetwa Apolioni, amakuru ngu Omuhwerekyerezi. 12Akagwe k'okubanza kaahwa; mbwenu hakitsigaireyo obundi bugwe bubiri kwija. 13Bwanyima maraika owa mukaaga akateera eye nzamba. Ntyo naahurira eiraka niryema omu burugu buna bw'eitambiro ry'ezaabu, eriri omu maisho ga Ruhanga. 14Eryo iraka ryagambira maraika wa mukaaga owaabaire aine enzamba, riti: Rekura baamaraika abana ababoheirwe aha mugyera muhango Eufuraati! 15Batyo baamaraika abo abana baarekurwa. Nibo abo abaabaire bateekateekyeirwe egyo shaaha n'ekyo kiro n'okwo kwezi n'ogwo mwaka, kwitiramu kimwe kya kashatu ky'abantu. 16Omubaro gw'engabo z'abarikurwanira aha mbaraasi gukaba guri kakumi emirundi ebiri emirundi kakumi; ogwo mubaro gwabo nkaguhurira. 17Omuri okwo kworekwa kwangye, nkareeba nti ezo mbaraasi n'abazitembire. Bakaba bajwaire eby'okwekingiza aha kifuba eby'erangi erikutukura nk'omuriro, n'eya bururu nka saafiro, n'eya kinekye nka sulufuru, kandi emitwe y'ezo mbaraasi ekaba eri nk'ey'entare; reero omuriro n'omwika na sulufuru nibiziruga omu kanwa. 18Kimwe kya kashatu ky'abantu nikwo kyaitsirwe kityo ezo nfu ishatu: omuriro, omwika na sulufuru, ebyarugire omu kanwa k'ezo mbaraasi. 19Manya obushoboorozi bwazo buri omu kanwa kaazo n'omu mikira yaazo. Egyo mikira ni nk'enjoka, eine emitwe, kandi niyo zihutaazisa. 20Abandi bantu abataraitsirwe ezo nfu, tibareeteisize bi baakoreise engaro zaabo. Tibararekire kuramya ebyago n'ebishushani ebikozirwe omu zaabu n'omu feeza n'omu miringa n'omu mabaare n'omu biti, ebitarikubaasa kureeba nari kuhurira, nobu kwakuba okugyendesa amaguru. 21Kandi tibareeteisize bibi byabo: obwitsi, oburogo, ebikwatiraine n'obushambani, nobu kwakuba okwiba kwabo.

will be added

X\