Revelation 8

1Omwana gw'Entaama ku yaabambwire akamanyiso ka mushanju, haabaho akaceceko omu iguru okumara nk'ekicweka ky'eshaaha. 2Bwanyima naareeba baamaraika omushanju abeemerera omu maisho ga Ruhanga, kandi baahebwa enzamba mushanju. 3Reero maraika ondiijo yaija, yaayemerera haihi n'eitambiro aine ekyotezo kya zaabu. Atyo aheebwa obubaani bwingi kubuhongyera Ruhanga, hamwe n'eby'okushaba by'abarikwera boona, akabyoterera aha itambiro ry'ezaabu eriri omu maisho g'ekitebe kye. 4Mpaho omwika gw'obubaani, n'okushaba bicumbuuka nibiruga omu ngaro za maraika oyemereire omu maisho ga Ruhanga. 5Bwanyima maraika ogwo yaatwara ekyo kyotezo, yaakiijuza omuriro ogwaruga aha itambiro, yaakinaga aha nsi omu nsi. Reero haabaho okugamba kw'enkuba, n'okuhinda n'ebirabyo n'omutsitsa. 6Mbwenu baamaraika omushanju, abaabaire baine enzamba mushanju, baayeteekateeka kuziteera. 7Maraika w'okubanza yaateera enzamba ye, haabaho orubaare n'omuriro bijwangire n'eshagama. Ku byagwire ahansi omu nsi, kimwe kya kashatu ky'ensi kyasya, na kimwe kya kashatu ky'emiti n'obunyaatsi bwona obubisi byasya. 8Maraika wa kabiri ku yaateire enzamba eye, ekintu kirikushusha orushozi ruhango kirikwaka omuriro, kyanagwa omu nyanja. 9Kimwe kya kashatu ky'enyanja kyahinduka eshagama, na kimwe kya kashatu ky'ebihangwa by'omu nyanja ebiine amagara kyafa, kandi kimwe kya kashatu ky'emeeri kyacwekyerezibwa. 10Maraika wa kashatu ku yaateire eye nzamba, enyonyoozi rwaiguuga yaahanantuka omu iguru neeyaka nk'orumuri, yaagwera kimwe kya kashatu ky'emigyera n'enshuro z'amaizi. 11Eiziina ry'egyo nyonyoozi ni Muravunga. Mpaho kimwe kya kashatu ky'amaizi kyacweka omuravunga, abantu baingi baafa ahabw'okunywa ago maizi, ahabw'okuba gakahindurwa agarikushaarira. 12Maraika wa kana ku yaateire enzamba ye, kimwe kya kashatu ky'eizooba kyateerwa, hamwe na kimwe kya kashatu ky'okwezi, na kimwe kya kashatu ky'enyonyoozi. Ekyarugiremu: kimwe kya kashatu ky'okwaka kwabyo kyazima, kimwe kya kashatu kya nyomushana tikyahweza, na kimwe kya kashatu kya nyekiro kyaba kityo. 13Ku naimukize nti amaisho, naahurira empungu neeyaniira munonga, neezeereerera hare omu kaabunga, neegira eti: Akagwe! Akagwe! Akagwe kaaza kugwera abari omu nsi, ezindi nzamba ku ziraagambe, ezi baamaraika abashatu bari haihi kuteera!

will be added

X\