1 Ebyo ku byahwaire, naareeba baamaraika bana beemereire aha mbaju ina z'ensi, bakingiire emiyaga ena ey'omu nsi, ngu hatakaagira omuyaga gwahuuha ensi nari enyanja nainga omuti gwona. 2 Kandi naareeba maraika ondi naaruga ei izooba rituruka, aine akamanyiso ka Ruhanga ohuriire. Atyo ayeta n'eiraka rihango baamaraika abo abana, abaabaire bahairwe obushoboorozi bw'okushiisha ensi n'enyanja. 3 Reero maraika ogwo abagira ati: Mutashiisha ensi nari enyanja, nobu yaakuba emiti, okuhitsya obu turaaheze kuta akamanyiso aha buso bw'abaheereza ba Ruhanga waitu. 4 Ntyo mpurira omubaro gw'abaatairweho akamanyiso ka Ruhanga aha buso bwabo. Gukaba niguhika akasiriira kamwe n'obukumi buna n'enkumi ina, abaarugire omu buri ruganda rw'Abaisiraeli: 5 Ab'omu ruganda rwa Yuda abaatairweho akamanyiso, kakumi n'enkumi ibiri; ab'omu ruganda rwa Reubeeni, kakumi n'enkumi ibiri; ab'omu ruganda rwa Gaadi, kakumi n'enkumi ibiri; 6 ab'omu ruganda rwa Asheri, kakumi n'enkumi ibiri; ab'omu ruganda rwa Nafutaali, kakumi n'enkumi ibiri; ab'omu ruganda rwa Manaase, kakumi n'enkumi ibiri; 7 ab'omu ruganda rwa Simeoni, kakumi n'enkumi ibiri; ab'omu ruganda rwa Leevi, kakumi n'enkumi ibiri ab'omuruganda rwa Isakaari, kakumi n'enkumi ibiri, 8 ab'omu ruganda rwa Zebuluuni, kakumi n'enkumi ibiri ab'omu ruganda rwa Yosefu, kakumi n'enkumi ibiri; ab'omu ruganda rwa Benyamiini abaatairweho akamanyiso, kakumi n'enkumi ibiri. 9 Ebyo ku byahwaire, naimutsya amaisho, naareeba ekimbuuro kihango ky'abantu, abu omuntu weena atarikubaasa kubara! Bakaba barugire omu byanga byona n'omu nganda zoona n'omu mahanga goona n'omu ndimi zoona, beemereire omu maisho g'ekitebe ky'obukama n'omu maisho g'Omwana gw'Entaama, bajwaire ekanzu zirikwera, baine amataagi g'enkindo omu ngaro. 10 Baateera akaari n'eiraka rihango bati: Okujuna n'okwa Ruhanga waitu, osingami aha kitebe ky'obukama, kandi n'okw'Omwana gw'Entaama! 11 Reero baamaraika boona baayemerera beehinguririize ekyo kitebe, n'abo bakuru n'ebyo bihangwa bina ebihuriire. Baajuumara omu maisho g'ekyo kitebe ky'obukama, baaramya Ruhanga, 12 nibagira bati: Amiina! Ruhanga waitu asingizibwe, kandi aheebwe ekitiinwa n'obwengye n'okusiimwa n'okuhimbisibwa n'obushoboorozi n'amaani ebiro n'ebiro! Amiina. 13 Mpaho omwe ahari abo bakuru ambuuza, naagira ati: Beitu aba abajwaire ekanzu zirikwera ni baahi, kandi baaruga hi? 14 Naanye mmugarukamu nti: Mukama wangye, niiwe orikukimanya. Nawe angira ati: Aba nibo baarugire omu kubonabonesibwa kwingi, bakoozya ekanzu zaabo, bakazeereza omu shagama y'Omwana gw'Entaama. 15 Nikyo barikwemererera omu maisho g'ekitebe kya Ruhanga, nibamuheereza nyomushana na nyekiro omuri Nyaruju ye. Kandi Ogwo osingami oha kitebe ky'obukama, aryaguma nabo abasangiire. 16 Tibarigira njara bundi, nobu kwakuba okugira eiriho; tibariitwa mushana, nobu kyakuba ekibabo kyagwo. 17 Ahabw'okuba Omwana gw'Entaama, ori ahagati y'ekitebe ky'obukama, aryaba omuriisa waabo, abeebembere, abahitsye aha nshuro z'amaizi g'amagara; na Ruhanga abashushure amarira ahamaisho.
