Revelation 6

1Omwana gw'Entaama ku yaabambwire kamwe aha bumanyiso omushanju, naareeba kandi naahurira kimwe aha bihangwa bina ebihuriire, nikigamba n'eiraka nk'ery'enkuba, kiti: Ija! 2Ku naimukize nti amaisho, naareeba embaraasi rujeru, n'ogitembire aine obuta; atyo yaaheebwa ekirunga, yaagyenda naasingura, ngu abone kusingurira kimwe. 3Bwanyima Omwana gw'Entaama akabambuura akamanyiso ka kabiri, mpaho naahurira ekihangwa kya kabiri ekihuriire, nikigira kiti: Ija! 4Reero haarugayo endiijo mbaraasi ruhogo; ogitembire yaaheebwa obushoboorozi bw'okwiha obusingye omu nsi, ngu abantu baitane; atyo yaaheebwa rurara mpango. 5Omwana gw'Entaama ku yaabambwire akamanyiso ka kashatu, naahurira ekihangwa kya kashatu ekihuriire, nikigira kiti: Ija! Naanye ku nyimutsya amaisho, ndeeba embaraasi rwozi, n'ogitembire aine minzaani omu ngaro. 6Ntyo mpurira ekiri nk'eiraka ririkwema ahagati y'ebihangwa bina ebihuriire, nirigira riti: Endengo y'engano n'ebihembo by'eizooba rimwe; kandi n'endengo ishatu za sayiri nazo n'ebihembo by'eizooba rimwe; kwonka amajuta na viino otabishiisha. 7Omwana gw'Entaama ku yaabambwire akamanyiso ka kana, naahurira eiraka ry'ekihangwa kya kana. 8Ntyo nyimutsya amaisho, ndeeba embaraasi ruhuura, n'owaabaire agitembire naayetwa Rufu, na Kuzimu emukuratiire, kandi byaheebwa obushoboorozi aha kicweka kimwe kya kana eky'ensi, kukiitsa rurara n'enjara n'orufu n'enyamaishwa z'omu ishwa ez'omu nsi. 9Reero Omwana gw'Entaama ku yaabambwire akamanyiso ka kataano, naareeba ahansi y'eitambiro emitima y'abaitsirwe, nibaturwa ekigambo kya Ruhanga n'obujurizi obu baahaire. 10Baahooga n'eiraka rihango, nibagira bati: Ai Mukama Nyakusinga, iwe orikwera kandi ow'amazima! Oryahitsya hi otakacwereire rubanja abatwire omu nsi, okahoorera eshagama yaitu? 11Batyo buri omwe yaaheebwa ekanzu erikwera, baaragiirwa kumara omwanya gwiriireyo bakihuumwire, okuhitsya obu omubaro gw'abaheereza bagyenzi baabo, na beene waabo ab'okwitwa nkabo, gurihika. 12Kandi nkareeba Omwana gw'Entaama naabambuura akamanyiso ka mukaaga. Obwo haabaho omutsitsa mwingi, eizooba ryairirimba, ryashusha nk'ekiguniya kirikwiragura, n'okwezi ekizooro kwatukura nk'eshagama. 13Reero enyonyoozi z'ahaiguru zaagwa ahansi, nk'oku omutiini guragaza ebijuma byagwo omuri katumba, gwatengyeetsibwa eihunga. 14Eiguru naryo ryahwaho, nk'oku omuzingo gw'ekitabo gukubwa; buri rushozi na buri kirwa byaihwa omu myanya yaabyo. 15Mpaho abagabe b'omu nsi n'abakungu n'abakuru b'amahe, n'abatungi n'ab'amaani, na buri muhuuku n'ow'obusingye, baayeshereka omu maaya n'omu nyanga z'omu nshozi. 16Baatakira enshozi n'enkiri bati: Mutugwere mutusherekye amaisho g'Ogwo osingami aha kitebe ky'obukama, kandi mutukize ekiniga ky'Omwana gw'Entaama. 17Manya ekiro kyabo kikuru ky'okucweraho orubanja kyahika. Mbwenu n'oha orikubaasa kukyemera?

will be added

X\