Revelation 22

1Bwanyima maraika akaanyoreka omugyera gw'amaizi g'amagara, ogurikwengyengyeta nk'eibaare rya krisitaalo, niguhimintika niguruga aha kitebe ky'obukama ekya Ruhanga n'eky'Omwana gw'Entaama, 2niguraba ahagati y'enguuto y'orwo rurembo. Ahari buri rubaju rw'ogwo mugyera hariho omuti gw'amagara, ogwerwaho ebijuma emirundi ikumi n'ebiri, nigwana buri kwezi, n'amababi gaagwo gari ag'okutambira amahanga. 3Omuri orwo rurembo, tiharibamu kintu kyona ekikyeenirwe. Ekitebe ky'obukama ekya Ruhanga n'eky'Omwana gw'Entaama nibyo biriba omuri orwo rurembo; kandi abaheereza be baryamuramya. 4Baryamureeba ahamaisho, n'eiziina rye rihandiikwe aha buso bwabo. 5Haza okwo tiburiira bundi, tibaryetenga kwakirwa etabaaza nari eizooba, kureka Mukama Ruhanga niwe aribaakira; haza baryategyeka obutwire bwona. 6Bwanyima maraika akangira ati: Ebigambo ebyo n'eby'okwesigwa kandi n'eby'amazima. Mbwenu Mukama Ruhanga oha abarangi Mutima we, atumire maraika we kworeka abaheereza be eby'okubaho juba. 7Haza yaagira ati: Reeba, niinyija juba! Aine omugisha orikukuratira gye ebigambo by'oburangi eby'omu kitabo eki. 8Nyowe Yohaana, niinye naayehuririire ebyo bigambo, nkataho n'okubireeba. Reero ku naabihuriire kandi naabireeba, naajuumara aha nsi y'ebigyere bya maraika owaabiinyorekire, kumuramya. 9Kwonka we yangira ati: Reka, otakikora! Manya ndi omuheereza mugyenzi waawe, kandi owa beene waanyu abarangi, n'ow'abo abata omutima aha bigambo by'omuri eki kitabo. Ramya Ruhanga! 10Ayongyera angira ati: Yata enaama y'ebigambo by'oburangi ebiri omu kitabo eki, ahabw'okuba obunaku bw'ebyo bintu byona kuhikiirira buri haihi. 11K'enkozi y'ebibi egume neebikora, osiisikaire agume asiisikaire, ohikiriire agume naakora ebihikire, n'orikwera aguma ari orikwera. 12Yesu yaagira ati: Reeba, niinyija juba! Nyine enzimuurano kuzimuurira omuntu weena ahabw'ebi yaakozire. 13Niinye Alufa kandi Omega, ow'okubanza kandi ow'aha muheru; obutandikiro kandi obugarukiro. 14Baine omugisha aboozya ebijwaro byabo, bakaikirizibwa kurya ebijuma by'aha muti gw'amagara, n'okutaaha omuri orwo rurembo nibareetwa omu marembo. 15Kwonka empabe n'abarogi n'enshambani n'abaitsi n'abaramya ebishushani, n'omuntu weena okunda ebishuba akaguma naabeiha, baryaguma aheeru yaarwo. 16Nyowe Yesu, mbatumireho maraika wangye kubamanyisa ebyo, ngu bibone kugasira ebigombe by'abaikiriza. Niinye kitsitsa kya Daudi kandi omwijukuru. Niinye nyonyoozi y'omu busheeshe erikumurinkana. 17Mutima hamwe na Mugore nibagira bati: Ija! Ka weena orikuhurira ebi, agire ati: Ija! Ka weena oine eiriho aije! Ka weena orikwenda amaizi g'amagara, agatungire busha! 18Nyowe Yohaana, niinyehanangiriza omuntu weena orikuhurira ebigambo by'oburangi ebiri omu kitabo eki nti: Weena owaakubyongyeraho, Ruhanga aryamwongyera ebibonaboneso ebyagambwaho omuri eki kitabo. 19Kandi ku haakugira owaihaho ebigambo ebimwe eby'omu kitabo ky'oburangi obu, Ruhanga aryamwaka omugabo gwe ogw'aha muti gw'amagara n'ogw'omu rurembo orurikwera, ebyagambwaho omuri eki kitabo. 20Orikuhamya ebyashuuruurwa ebyo byona, naagira ati: Buzimazima, niinyija juba! Amiina! Ai Mukama Yesu, ija! 21Embabazi za Mukama Yesu zigume naimwe mwena. Amiina.

will be added

X\