Revelation 20

1Bwanyima nkareeba maraika ondi, naashuuma naaruga omu iguru, aine omu ngaro ekikomoorozo ky'ekiina ekitaine bugarukiro, n'orujegyere ruhango. 2Atyo akwata ekijoka kiri, egyo njoka eya ira, niwe Mwohi kandi Sitaane, amuboha okumara emyaka rukumi. 3Maraika ogwo amunaga omuri ekyo kiina kitaine bugarukiro, akikinga, akitaho n'enzibuuro kumukingiraniramu, ngu atakaabeihabeiha amahanga obundi, okuhitsya obu egyo myaka rukumi erihwaho; kandi ngu egyo myaka ku erihwaho, abone kubohoororwa kumara akaanya kakye. 4Reero naareeba ebitebe by'obukama bishutamirweho abaahairwe obushoboorozi kucwa emanja. Naareeba n'emitima y'abantu abaatemirweho emitwe, nibaturwa okuhamya Yesu hamwe n'ekigambo kya Ruhanga. Nibo abo abatararamize ekyo kinyamaishwa, nari ekishushani kyakyo; kandi abataratairweho kamanyiso kaakyo aha buso bwabo, nari aha ngaro zaabo. Abo bantu baagaruka baaba abahuriire, baayema na Kristo emyaka rukumi. 5Kwonka abandi baafiire, tibaagaruka kuba abahuriire okuhitsya obu egyo myaka rukumi yaahwaire. Okwo nikwo kuzooka kw'okubanza. 6Aine omugisha kandi ka n'orikwera ogwo obarirwa omuri okwo kuzooka kw'okubanza! Abari nk'abo, okufa kwa kabiri tikubaineho bushoboorozi; kureka baryaba abahongyerezi ba Ruhanga n'aba Kristo, bategyekye hamwe nawe emyaka rukumi. 7Egyo myaka rukumi ku erihwaho, Sitaane aryakomoororwa, arugye omu kihome kye. 8Reero ashohore, abeihabeihe Googi na Magoogi: nigo mahanga agari ahantu hoona omu nsi. Haza ahuruze abantu baago kurwana orugamba. Abo bantu, obwingi bwabo buri nk'omusheenyi gw'enyanja. 9Batyo bahurura, bateera ensi yoona oku eingana, beehinguririza orusiisira rw'abarikwera n'orurembo orukundwa. Kwonka omuriro guhanantuka omu iguru gubacwekyereza. 10Na Sitaane ori owaababeihabeihire, anagwa omu nyanja y'omuriro ogurikwakisibwa sulufuru, ei ekinyamaishwa n'omurangi w'ebishuba byabaire binagirwemu, biri eby'okubonabonesibwa nyomushana na nyekiro ebiro n'ebiro. 11Bwanyima nkareeba ekitebe ky'obukama kihango kirikwera, n'Ogwo owaabaire akishutamiho. Reero ensi n'eiguru byahunga nibiruga ahu ari, kwonka byaburwa obutooro. 12Ntyo ndeeba abaafiire, abakuru n'abato, beemereire omu maisho g'ekyo kitebe ky'obukama. Mpaho ebitabo bishuuruurwa. N'ekindi kitabo nakyo kishuuruurwa, nikyo kitabo ky'amagara. Haza abaafiire baacwerwa orubanja nk'oku ebi baakozire, ebyahandiikirwe omuri ebyo bitabo, byabaire biri. 13Reero enyanja yaareeta abaagifeereiremu. Rufu na Kuzimu byareeta abafu baabyo. Boona baacwerwa orubanja nk'ebi baakozire oku byabaire biri. 14Bwanyima Rufu na Kuzimu byanagwa omu nyanja y'omuriro. Egyo nyanja y'omuriro nikwo kufa kwa kabiri. 15Mpaho weena ou eiziina rye ryashangirwe ritahandiikirwe mu kitabo ky'amagara, yaanagwa omuri egyo nyanja y'omuriro.

will be added

X\