1 Handiikira maraika w'ekigombe ky'abaikiriza ab'omuri Efeso oti: Ebi n'ebigambo byangye, nyowe okwaitse enyonyoozi mushanju omu ngaro y'omukono gwangye gwa buryo, kandi orikugyendagyendera ahagati y'ebikondo mushanju by'ezaabu. Ningira nti: 2 Nimmanya ebi orikukora, okwehenenga kwawe n'okugumisiriza kwawe nooyehangaana. Nimmanya ku otarikubaasa kugumisiririza babi, kandi ku waayetegyereize abarikweyeta entumwa, haza batari bo, reero okashanga bari ab'ebishuba. 3 Nimmanya ku ogumisiriza nooyehangaana, ku oyemera bingi ahabw'eiziina ryangye, kandi ku otakaruhaga. 4 Kwonka nyine eki ndikufa naiwe; ahabw'okuba tokiine rukundo nk'ei waabaire ogira omu kubanza. 5 N'ahabw'ekyo ijuka ahi waahanantukire noogwa, oyegarukyemu, haza okore ebi waabaire nookora omu kubanza. Kitari ekyo, niinyija kwija ah'ori, nyihe eitabaaza ryawe omu mwanya gwaryo, kureka biri waayeteisa. 6 Kwonka eki ogira n'okwanga ebi Abanikola bakora, haza naanye nibyo nyanga. 7 Oine amatu, ahurire eki Mutima arikugambira ebigombe by'abaikiriza, ati: Orikusingura, ndyamwikiriza kurya aha muti gw'amagara, ogw'omu mwanya gw'obunanukye ogwa Ruhanga. 8 Handiikira maraika w'ekigombe ky'abaikiriza ab'omuri Simuruna, oti: Ebi n'ebigambo by'ow'okubanza kandi ow'aha muheru, owaafiire haza akagaruka akaba ohuriire. Naagira ati: 9 Nimmanya obusaasi bwawe n'obworo bwawe-- kwonka ori omutungi! Nimmanya ebi abeeyeta Abayudaaya bakubeiherera, haza batari bo; kureka bari eiteeraniro rya Sitaane! 10 Otatiina ebi orikwija kubonabona. Reeba, Sitaane arangariire kuta bamwe omuriimwe omu kihome, ngu mugyezibwe, mumare ebiro ikumi muri omu kubonabonesibwa. Guma ori omwesigwa okuhitsya obu orifa, haza naanye ndyakuha ekirunga ky'amagara. 11 Oine amatu, ahurire eki Mutima arikugambira ebigombe by'abaikiriza ati: Orikusingura, okufa kwa kabiri tikwine ki kurimwitsa. 12 Handiikira maraika w'ekigombe ky'abaikiriza ab'omuri Perigamo, oti: Ebi n'ebigambo by'Ogwo oine rurara y'amoogi abiri. Naagira ati: 13 Nimmanya ah'otuura, ku niho ekitebe ky'obukama bwa Sitaane kiri. Kwonka otuura okihamiire aha iziina ryangye, kandi tokeehakanaga ku orikuunyikiriza, nangwa n'omu biro bya Antipa, mushinja wangye omwesigwa, owaitiirwe owaanyu, ahi Sitaane atuura. 14 Kwonka nyine bikye ebi ndikufa naiwe: ahabw'okuba okwo oineyo bamwe abarikwikiriza enyegyesa ya Balaamu, owaahabwire Balaki kuta ekirikuteeza entsibo omu maisho g'Abaisiraeli, ngu barye ebihongyeirwe emandwa kandi ngu bakore ebikwatiraine n'obushambani. 15 Kandi hoona oine n'abandi abahamiire aha nyegyesa y'Abanikola. 16 Mbwenu nu, yegarukyemu. Kitari ekyo, niinyija kwija juba ah'ori, mbarwanise na rurara ey'omu kanwa kangye. 17 Oine amatu, ahurire eki Mutima arikugambira ebigombe by'abaikiriza, ati: Orikusingura, ndyamuha aha maanu esherekirwe, kandi mmuhe eibaare ririkwera, erihandiikirweho eiziina risya, eri omuntu weena atarikumanya, kureka ogwo owaaritunga. 18 Handiikira maraika w'ekigombe ky'abaikiriza ab'omuri Tiyatira, oti: Ebi n'ebigambo by'Omwana wa Ruhanga, oine amaisho garikumurinkana nk'endimi z'omuriro, kandi ow'ebigyere bye biri nk'omuringa guzigwirwe. Naagira ati: 19 Nimmanya ebi okora: okukunda kwawe n'okwikiriza kwawe n'okuheereza n'okugumisiriza nooyehangaana. Nimmanya ebi ohereerukire kukora ebirikuhita ebyabandize. 20 Kwonka nyine eki ndikufa naiwe! Nooreka ogwo mukazi Yezeebeli, orikweyeta omurangikazi, ahabisa abaheereza bangye naabeegyesa kukora ebikwatiraine n'obushambani, n'okurya ebihongyeirwe emandwa. 21 Nkamuha omwanya kwegarukamu, kwonka yaayanga kweteisa eby'obushambani bwe. 22 Reeba, niinyija kumutambika aha kitanda, areebereho enaku; reero abu ashambana nabo mbareetere okubonabonesibwa kwingi, baaba bateeteisize ebi arikukora. 23 Ndyateera abaana be, mbagwiseho. Nibwo ebigombe by'abaikiriza byona birimanya ku niinye ncaaka ebiteekateeko n'emitima, nkazimuurira buri omwe omuriimwe ebishemereire ebi akozire. 24 Kwonka imwe, ab'omuri Tiyatira abaatsigara, abatarikwikiriza egyo nyengyesa, abatakamanyire eki abandi beeta amabanga ga Sitaane, nimbagambira nti: Tindikwija kubeekoreza gundi mutwaro. 25 Kureka mugumye eki mwine okuhitsya obu ndiija. 26 Orikusingura, akaguma naakora ebi ndikwenda okuhitsya aha muheru, ndyamuha obushoboorozi aha mahanga, 27 nkaanye oku naabuhairwe Tata; agategyekyese enkoni y'ekyoma, agaatagure nk'oku omunogoozi ayatagura enyungu z'eibumba. 28 Ndyamuha kandi enyonyoozi y'omu busheeshe. 29 Oine amatu, ahurire eki Mutima arikugambira ebigombe by'abaikiriza.
