Revelation 18

1Ebyo ku byahwaire, naareeba maraika ondi naashuuma naaruga omu iguru, aine obushoboorozi bwingi; ensi yoona yaamurinkanisibwa ekitiinwa kye. 2Maraika ogwo yaayamuza n'eiraka rihango ati: Rugwire! Rugwire! Babulooni orurembo orukuru! Ruhindukire obutaaho bw'ebyago, n'eikoobezo ry'emizimu yoona emibi, n'eicumbi ry'amahungu g'emiringo yoona erikunugwa. 3Manya amahanga goona ganywaire viino y'akabugumo k'eby'obushambani bwarwo. Abagabe b'omu nsi bashambaine narwo, n'abashuubuzi b'omu nsi batungisiibwe ebintu by'okwejaramya kwarwo okurengyesereize. 4Bwanyima naahurira erindi iraka niryema omu iguru, nirigira riti: Imwe bantu bangye 'mwe, nimururugyemu, mutakaakwatanisa narwo omu bibi byarwo, mukaheebwa narwo ebibonaboneso byarwo! 5Manya ebibi byarwo bituumire, byahika aha iguru; na Ruhanga yaijuka ebicumuro byarwo. 6Murugire nk'oku rwagizire abandi; muruzimuurire kabiri ebi rwakozire. Omu kikopo ki rwabajwangiizemu, murujwangizemu kabiri. 7Nk'oku rwayehimbiise, rukarengyesereza omu kwegira gye; naimwe mube nikwo mwarwihura okubonabona n'amaganya. Manya rutuura nirwegira ruti: Nyemi nk'omugabekazi, tindi mufaakazi kandi tindigira bu ncuzire! 8N'ahabw'ekyo, ebibonaboneso byarwo: orufu, okucura n'enjara, nikwo birirwizira eizooba rimwe, rukookibwa omuriro; ahabw'okuba Mukama Ruhanga orucwereire orubanja, n'ow'amaani. 9Reero abagabe b'omu nsi, abaakozire narwo ebikwatiraine n'obushambani bakakuna narwo, ku barireeba omwika gwarwo nirusya, baryarucurira baruboroogyere. 10Baryayemerera hangahari ahabw'okutiina ekibonaboneso kyarwo, bagire bati: Ai bambe, ai bambe, iwe rurembo rukuru 'we! Iwe Babulooni orurembo rw'amaani! Ekifubiro kyawe ka kyakwizira omu shaaha emwe! 11Abashuubuzi b'omu nsi nabo nibarira kandi nibarucurira, ahabw'okuba tihaakiriho w'okugura eby'obushuubuzi byabo. 12Tihaakiriho w'okugura eby'ezaabu, efeeza, amabaare g'obutungi bwingi n'eruuru; emyenda ya kitaani enungi, n'eya bujwa n'eya riiri n'erikutukura; emiringo yoona ey'ebiti by'emigaju; ebintu byona eby'emiino, ebintu byona ebibaizirwe omu mbaaho z'obuguzi bwingi, eby'emiringa, eby'ekyoma, n'eby'amabaare garikwengyengyeta; 13omudarasiini, ebinuza ebyokurya, eby'emigaju, entsinda, n'obubaani; viino, amajuta, essano y'obunono n'engano; ente n'entaama; embaraasi n'ebigaari, otaireho abahuuku n'abandi bantu enkwatwa. 14Abo bashuubuzi baryarugira bati: Ebirungi bi waayetengire bikutsigireho; ebintu byona ebinuzire n'ebirungi byawe bikuhwaireho, toribireeba bundi! 15Reero abashuubuzi b'ebyo bintu abu rwatungiise, baryayemerera hangahari ahabw'okutiina ekibonaboneso kyarwo, barire kandi bacure bati: 16Ai bambe, ai bambe, orwo rurembo rukuru orwajwaire emyenda mirungi ya kitaani n'eya bujwa n'erikutukura, rukeehunda ezaabu, n'amabaare g'obuguzi bwingi, n'eruuru! 17Obwo butungi bwona bwahuuyuuka omu shaaha emwe! Bakama b'emeeri boona n'abarikuzigyenderamu, abarimbi na boona abarikukorera omu nyanja eby'okwetunga, baayemerera hangahari; 18ku baareebire omwika gwarwo nirusya, baaborooga bati: Ebyo harabaireho orurembo orurikushusha nk'orurembo oru orukuru? 19Batyo baayeshuka eiju omu mutwe. Baaborooga nibarira kandi nibacura bati: Ai bambe, ai bambe, orwo rurembo rukuru orwatungiise boona abaine emeeri aha nyanja n'ebintu byarwo bingi! Mbwenu omu shaaha emwe rwacwekyerezibwa! 20Iwe iguru 'we! Imwe abarikwera, n'entumwa n'abarangi, nimurweraatire! Manya Ruhanga arufubiire ahabwanyu! 21Bwanyima maraika w'amaani yaihayo eibaare eririkwingana orubengo ruhango, yaarirekyera omu nyanja, naagira ati: Na Babulooni orurembo orukuru, nikwo rurinagwa rutyo ahansi n'amaani, kandi tirurireebwa bundi. 22Amaraka g'abateezi b'enanga n'ag'abeeshongozi n'aga'abateezi b'esheegu n'enzamba, tigarihurirwa bundi omuriiwe; n'omunyamwoga weena tarigira bu areebirwe omuriiwe; n'eiraka ry'emengo tirigaruka kuhurirwa omuriiwe. 23Kandi omuriiwe tiharyakiramu tabaaza bundi, n'eiraka rya kishwera na kishwerwa tiririgaruka kuhurirwa omuriiwe. Manya abashuubuzi baawe nibo baabaire bari abantu rugambwa omu nsi, ahabw'okuba amahanga goona okaba ogabeihabeiheise oburogo bwawe. 24Omuri orwo rurembo okwita abarangi n'abarikwera nimwo kwashangirwe, otaireho na boona abaitsirwe omu nsi.

will be added

X\