Revelation 17

1Bwanyima omwe ahari baamaraika omushanju, abaabaire baine enyabya omushanju, akaija yangira ati: Ija nkworekye orubanja orucwereirwe maraaya rurangaanwa, oshutami aha maizi maingi. 2Niwe abagabe b'omu nsi baashambaine nawe, n'abatwire omu nsi bakasinda viino y'obushambani bwe. 3Atyo maraika ogwo antwara omu ihamba ndi omuri Mutima. Mpaho ndeeba omukazi ashutami aha kinyamaishwa kirikutukura tukutuku, kihumbikirwe amaziina garikurogota, kiine emitwe mushanju n'amahembe ikumi. 4Ogwo mukazi akaba ajwaire ebya bujwa n'ebirikutukura tukutuku, ayehunzire ezaabu n'amabaare g'obuguzi bwingi n'eruuru; akwaitse omu ngaro ekikopo ky'ezaabu ekiijwire ebihagaro n'ebiitsa nshoni by'obushambani bwe. 5Kandi aha buso bwe hahandiikirweho eiziina eri, eritarikumanywa makuru; Babulooni orurembo orukuru, nyina wa baamaraaya, kandi ozaara ebihagaro by'omu nsi. 6Ntyo ndeeba ogwo mukazi asinzire eshagama y'abarikwera n'ey'abajurizi abaitsirwe nibaturwa okuba aba Yesu. Ku mmureeba, ntangaara munonga. 7Kwonka maraika angira ati: Ahabw'enki nootangaara? Ka nkugambire amakuru g'ogwo mukazi, n'ag'ekinyamaishwa eki atembire, eky'emitwe mushanju n'amahembe ikumi. 8Ekinyamaishwa eki waareeba, kikaba kiriho, mbwenu tikiriho, kandi nikiija kutuuhuuka omu kiina ekitaine bugarukiro, kize omu kuhwerekyerera. Reero abatwire omu nsi, abu amaziina gaabo gatahandiikirwe mu kitabo ky'amagara ensi yaaba kuhangwa, batangaarire okureeba ekyo kinyamaishwa, ahabw'okuba kikaba kiriho, mbwenu tikiriho, kwonka kiryaija. 9Eki nikyetengyesa omutima gwine obwengye n'okwetegyereza. Emitwe mushanju nizo nshozi mushanju, ezi ogwo mukazi ashutamiho. 10Kandi nibo bagabe mushanju, abu bataano aharibo baagwire, omwe ariho kandi ondi takaizire, kwonka ku ariija, n'ow'okumara akaanya kakye. 11Reero ekinyamaishwa, ekyabaire kiriho mbwenu ekitariho, niwe mugabe wa munaana, kwonka kandi n'owa bari omushanju, haza nawe naija kuhwerekyerera. 12Mbwenu amahembe ikumi agu waareeba, nibo bagabe ikumi abatakeemire, kwonka n'ab'okuheebwa obushoboorozi bw'obugabe okumara eshaaha emwe hamwe n'ekyo kinyamaishwa. 13Baine enaama emwe y'okurekurira ekyo kinyamaishwa amaani gaabo n'obushoboorozi bwabo. 14Reero baryarwanisa Omwana gw'Entaama, kwonka Omwana gw'Entaama aryabasingura, ahabw'okuba we, ni Mukama w'abakama kandi Omugabe w'abagabe; haza abu aine, abaayeetsirwe, abaatoorainwe kandi abeesigwa, baryasingura hamwe nawe. 15Maraika ogwo ayongyera angira ati: Amaizi gu waareeba ahi maraaya ashutami, nibo bantu b'emiringo mingi n'ebimbuuro n'amahanga n'endimi nyingi. 16Kandi amahembe ikumi agu waareeba, go hamwe n'ekyo kinyamaishwa, biryayanga maraaya ogwo, bimutsigye wenka ari entangaare; reero birye enyama y'omubiri gwe, bimwokyeze kimwe n'omuriro. 17Manya Ruhanga akakita omu mitima yaabo, ngu bahikiirize enaama ye baine omutima gumwe, nibaha ekyo kinyamaishwa obushoboorozi bw'okutegyeka obugabe bwabo, okuhitsya obu ebigambo bya Ruhanga birihikiirizibwa. 18Reero omukazi ou waareeba, nirwo rurembo orukuru orurikutegyeka abagabe b'omu nsi.

will be added

X\