Revelation 16

1Bwanyima nkahurira eiraka rihango niryema omuri Nyaruju nirigambira baamaraika omushanju riti: Nimwirooko mushukye aha nsi ebiri omu nyabya mushanju z'ekishinjo kya Ruhanga. 2Maraika ow'okubanza atyo agyenda, ashuka aha nsi ebiri omu rwabya orwe; ebironda bibi kandi birikunuuka bikwata abantu abaabaire baine akamanyiso k'ekinyamaishwa, bakaramya ekishushani kyakyo. 3Maraika owa kabiri ashuka ebiri omu rwabya orwe aha nyanja. Egyo nyanja eba nk'eshagama y'omuntu ofiire; na ibara kintu ekihuriire ekyabaire kigirimu kyafa. 4Maraika owa kashatu ashuka ebiri omu rwabya orwe aha migyera n'aha nshuro z'amaizi; bicweka eshagama. 5Ntyo mpurira maraika orikureeberera amaizi, naagira ati: Iwe orikwera, oriho, kandi owaabaire oriho, ori ohikire omu kucwa emanja. 6Ahabw'okuba abantu bakasheesha eshagama y'abarikwera n'ey'abarangi, naiwe waabaha eshagama kuginywa. Haza ekyo kibashemereire! 7Kandi nkahurira eiraka niryema aha itambiro nirigira riti: Eego, Mukama Ruhanga Ow'obushoboorozi bwona, emicwere yaawe n'ey'amazima kandi ehikire. 8Maraika owa kana yaashuka ebiri omu rwabya orwe aha izooba; ryaikirizibwa kwokyesa abantu ekibabo kyaryo. 9Abantu baayokibwa ekibabo ky'amaani, baakyeena eiziina rya Ruhanga, owaabaire aine obushoboorozi ahari ebyo bibonaboneso. Haza tibaayeteisa bibi byabo, ngu bamuhe ekitiinwa. 10Maraika owa kataano nawe yaashuka ebiri omu rwabya orwe aha kitebe ky'obugabe eky'ekyo kinyamaishwa. Obugabe bwakyo bwashwekwa omwirima, abantu baasinika amaino ahabw'obusaasi bwingi. 11Reero ahabw'obwo busaasi n'ebyo bironda, baakyeena Ruhanga ow'omu iguru. Haza tibaayeteisa bi baakozire. 12Maraika owa mukaaga yaashuka ebiri omu rwabya orwe, aha mugyera guri omuhango Eufuraati. Amaizi gaagwo gaayoma, kucwera abagabe abarikuruga Burugwa-izooba omuhanda. 13Bwanyima ndeeba emitima mibi eshatu, erikushusha ebikyere, neeruga omu kanwa k'ekijoka n'omu k'ekinyamaishwa n'omu k'omurangi w'ebishuba. 14Egyo mitima n'ebyago, ekora obumanyiso, ekaza omu bagabe b'ensi zoona kubahuruza kuza aha rugamba aha kiro kikuru kya Ruhanga Ow'obushoboorozi bwona. 15Reeba, niinyija nk'omushuma! Ebishi, omuntu orikuguma naareeba, akarinda ebijwaro bye, ngu atakaagyenda ajwaire busha, abantu bakareeba enshoni ze, aine omugisha! 16Egyo mitima yaarundaanira abo bagabe omu mwanya gurikwera, ogurikwetwa Arimagedo omu Ruheburaayo. 17Maraika owa mushanju yaashuka omu kaabunga ebiri omu rwabya rwe. Eiraka rihango ryayema aha kitebe ky'obukama eky'omuri nyaruju, nirigira riti: Kyahwa! 18Haakurataho emirabyo n'okuhinda n'okugamba kw'enkuba n'omutsitsa mwingi, ogutakabahoga abantu baaba kubaho omu nsi. Ogwo mutsitsa nikwo gwabaire mwingi gutyo. 19Orurembo orukuru rwabaganukamu ebicweka bishatu: endembo z'amahanga zaagwa, zaacwekyerera. Mpaho Ruhanga yaijuka Babulooni orurembo orukuru, kurucencesa ekikopo kya viino y'ekiniga kye. 20Buri kirwa kyahunga, n'enshozi zoona zaabura. 21Emengo z'orubaare rwingi, eziine oburemeezi bwa kiloguraamu amakumi ana, zaateera abantu niziruga omu iguru, okuhitsya obu abantu baarogotsire ahari Ruhanga, ahabw'ekibonaboneso ky'orwo rubaare. Ekyo kibonaboneso nikwo kyatiiniise kityo.

will be added

X\