Revelation 15

1Bwanyima, nkareeba omu iguru eky'amahano ekindi, kikuru kandi eky'okutangaaza. Nibo baamaraika mushanju abaine ebibonaboneso mushanju eby'okuhereeruka, ahabw'okuba omuribyo nimwo ekiniga kya Ruhanga kyahwereire. 2Kandi nkareeba ekirikushusha enyanja y'ekirahuri, ejwangiremu omuriro, n'abaasingwire ekyo kinyamaishwa n'ekishushani kyakyo n'enamba y'eiziina ryakyo, beemereire aha rubaju rw'egyo nyanja y'ekirahuri, bakwaitse omu ngaro enanga zi Ruhanga yaabahaire; 3nibeeshongora ekyeshongoro kya Musa omugaragwa wa Ruhanga n'eky'Omwana gw'Entaama, nibagira bati: Ai Mukama Ruhanga Ow'obushoboorozi bwona, ebi okora ni bikuru kandi n'eby'okutangaaza! Ai Mugabe w'amahanga, emitwarize yaawe ehikire kandi n'ey'amazima! 4Ai Nyakubaho, n'oha otatiina iziina ryawe, akarihimbisa? Manya niiwe wenka oba orikwera. Amahanga goona garyaija gakuramye, ahabw'okuba emicwere yaawe y'oburyo eyorekirwe. 5Ebyo ku byahwaire, naareeba Nyaruju y'omu iguru, erimu eihema ry'obuhamya eigwire. 6Haza omuri egyo nyaruju, haarugamu baamaraika omushanju, baine ebibonaboneso omushanju bajwaire ekanzu zirikwera za kitaani, beezirikire omu kifuba emyeko ya zaabu. 7Kimwe aha bihangwa bina ebihuriire, kyaha baamaraika abo omushanju enyabya mushanju z'ezaabu, ziijwire ekiniga kya Ruhanga, obaho ebiro n'ebiro. 8Reero nyaruju yaijura omwika, ogurikuruga omu kitiinisa kya Ruhanga n'omu maani ge. Tihaabaho n'omwe owaabaasa kugitaahamu, okuhitsya obu ebibonaboneso omushanju ebya baamaraika omushanju biraahweyo.

will be added

X\