Revelation 12

1Mbwenu eky'okutangaaza kihango kikareebeka omu iguru; omukazi ajwaire eizooba, n'okwezi kuri ahansi y'ebigyere bye, kandi aha mutwe gwe hariho ekirunga ky'enyonyoozi ikumi na ibiri. 2Ogwo mukazi akaba aine enda; ku yaabaire naarumwa, yaaboroogibwa ebisha by'okuzaara. 3Kandi ekindi ky'okutangaaza ekirikutiinisa kikareebeka omu iguru; kikaba kiri ekijoka kihango, kirikutukura, kiine emitwe mishanju n'amahembe ikumi, n'amahunde mushanju, buri rimwe ahari buri mutwe gwakyo. 4Omukira gwakyo gwakukumba kimwe kya kashatu ky'enyonyoozi z'omu iguru, gwazinaga ahansi. Ekyo kijoka kyayemerera omu maisho g'ogwo mukazi owaabaire arangariire kuzaara, ngu kishonshomere omwana we, yaaheza ati kumuzaara. 5Mpaho ogwo mukazi yaazaara omwana omwojo, owaabaire ari ow'okutegyekyesa amahanga goona enkoni y'ekyoma. Kwonka ogwo mwana we yaashahurwa, yaatwarwa owa Ruhanga, n'aha kitebe kye ky'obukama. 6N'ogwo mukazi yaahungira omu ihamba eri Ruhanga yaabaire amuteekateekyeiremu omwanya, kuheerwayo eby'okumutunga, okumara ebiro rukumi na magana abiri na makumi mukaaga. 7Mbwenu hakabaho orugamba omu iguru; Mikaeli na baamaraika be baarwana n'ekijoka, kandi ekyo kijoka na baamaraika baakyo byabarwanisa. 8Kwonka byasingurwa, kandi okwiha obwo byabingirwa kimwe omu iguru. 9Ekyo kijoka kihango kyanagwa aheeru. Niyo njoka eya ira, eyetwa Omwohi nainga Sitaane, oyosya ab'omu nsi yoona. Sitaane ogwo hamwe na baamaraika be boona bakanagwa ahansi omu nsi. 10Ntyo mpurira akaari omu iguru, nikagira kati: Mbwenu okujuna n'amaani n'obukama ebya Ruhanga waitu, hamwe n'obushoboorozi bwa Kristo we byaija; ahabw'okuba omuregi wa beene waitu, otuura naabarega ahari Ruhanga waitu nyomushana na nyekiro, yaabingwa omu iguru. 11Mbwenu bakamusingura ahabw'okufa kw'Omwana gw'Entaama, n'ahabw'ekigambo ky'obuhamya bwabo. Manya bakooga amagara gaabo, baahika nangwa n'aha kufa. 12N'ahabw'ekyo, iwe iguru 'we, naimwe abaritwiremu, mushemererwe! Kwonka iwe nsi 'we, naiwe nyanja 'we, muryakareeba! Manya Omwohi yaabaijamu aine ekiniga kingi, naamanya ku aine omwanya mukye. 13Ekijoka ku kyareebire kyanagwa ahansi omu nsi, kyahiiga ogwo mukazi owaazaire omwana omwojo. 14Kwonka ogwo mukazi yaaheebwa amapapa abiri g'empungu mpango, ngu abone kuguruka, ahungire egyo njoka omu ihamba, aze omu mwanya ogu araaheerwemu eby'okumutunga, okumara omwanya n'emyanya n'ekicweka ky'omwanya. 15Egyo njoka yaacwera enyima y'ogwo mukazi amaizi garikwingana omugyera, ngu omwegyemure gumuhiminture. 16Kwonka ensi yaaha ogwo mukazi emikono; yaayashama, yaamira omugyera ogu ekyo kijoka kyacweire. 17Ekijoka nikwo kugirira ogwo mukazi ekiniga kingi, kikaza kurwanisa ab'oruzaaro rwe abakitsigaireho, aboorobera ebiragiro bya Ruhanga, bakahamya ebya Kristo. 18Kityo kikeemerera aha musheenyi gw'enyanja.

will be added

X\