Revelation 1

1Ebi n'ebyashuurwirwe Yesu Kristo, ebi Ruhanga yaamuhaire kworeka abaheereza be, ebiri eby'okubaho juba. Kristo ogwo akabimanyisa omuheereza we Yohaana naamutumaho maraika we. 2Na Yohaana akagamba byona ebi yaareebire, naarangirira ebi Ruhanga yaamutumire ebi Yesu yaahamize. 3Orikushoma ebigambo by'oburangi obu bikahurirwa, aine omugisha. N'abarikubitega okutu, bakoorobera ebihandiikirwemu, baine omugisha. 4Nyowe Yohaana, naabahandiikira imwe ab'ebigombe mushanju by'abaikiriza eby'omuri Asiya: Nimbendeza emigisha n'obusingye ebikomooka ahari Ogwo oriho, owaabaire ariho, kandi oribaho; n'ebiruga aha mitima mushanju etuura omu maisho g'ekitebe kye ky'obukama; 5n'ebiruga ahari Yesu Kristo, kareebi omwesigwa, owaabandize kuzoorwa omu baafiire, kandi otegyeka abagabe b'omu nsi. Yesu ogwo, owaatukunzire akatwiha omu bibi naatucunguza okufa kwe, 6akatuhindura ab'obukama n'abahongyerezi ahari Ruhanga we kandi Ishe; naakaheebwe ekitiinwa n'obushoboorozi ebiro byona! Amiina. 7Reeba, naizira omu bicu! Buri muntu aryamureeba, nangwa n'abaamucumitsire, kandi enganda zoona ez'omu nsi ziryamucurira. Buzima kwo! Amiina. 8Mukama Ruhanga omushoboorozi wa byona, naagamba ati: Niinye Alufa kandi Omega; oriho, owaabaire ariho, kandi oribaho. 9Niinye Yohaana mwene waanyu, okwataniise naimwe omuri Yesu, omu kuhiiganisibwa n'omu bukama bwe n'omu kugumisiriza. Nkaba ndi aha kirwa ekirikwetwa Patimo, ntuzirwe okurangirira ekigambo kya Ruhanga, n'okuhamiza abantu ebya Yesu. 10Mbwenu aha kiro kya Mukama, Mutima ku yaabaire andiho, naahurira enyima yangye eiraka rihango nk'ery'enzamba, 11nirigira riti: Handiika omu kitabo ebi orikureeba, obyoherereze ebigombe mushanju eby'abaikiriza, nibyo ebi: Efeso, Simuruna, Perigamo, Tiyatira, Sarudi, Filadelufiya na Laodikeya. 12Ntyo mpinduka kureeba owaabaire nangambira. Ku naahindukire, naareeba ebikondo mushanju by'amatabaaza eby'ezaabu. 13Ahagati y'ebyo bikondo hakaba hariho orikushusha Omwana w'omuntu, ajwaire ekijwaro kiraingwa, kandi omu kifuba ayezirikiise omweko gw'ezaabu. 14Omutwe gwe n'eishokye rye bikaba nibyera nk'ebyoya by'entaama njeru, nibyengyengyeta nk'orubaare, n'amaisho ge nigamurinkana nk'endimi z'omuriro; 15ebigyere bye biri nk'omuringa guzigwire, ogushemereziibwe omu iziiko; n'eiraka rye nirihoorera nk'amaizi maingi, 16omu ngaro y'omukono gwe gwa buryo akwaitsemu enyonyoozi mushanju; omu kanwa ke haarugamu rurara y'amoogi abiri, kandi ahamaisho ge nihashusha nk'eizooba ririkwaka omu ihangwe. 17Ku naamureebire, naagwa aha bigyere bye nk'owaafa. Kwonka yantaho omukono gwe gwa buryo, yampuumuriza ati: Otatiina, niinye w'okubanza kandi ow'aha muheru, 18kandi ohuriire. Nkafa, kwonka hati ndi ohuriire ebiro byona, kandi nyine ebikomoorozo bya Rufu na Kuzimu. 19Mbwenu handiika ebi waareeba, ebiriho hati n'ebiribaho bwanyima. 20Amakuru gasherekirwe ag'enyonyoozi mushanju ezi waareeba omu mukono gwangye gwa buryo, n'ag'ebikondo mushanju by'ezaabu, nigo aga: enyonyoozi mushanju ni baamaraika b'ebigombe mushanju by'abaikiriza; kandi ebikondo mushanju by'amatabaaza nibyo bigombe omushanju by'abaikiriza.

will be added

X\