Philippians 3

1Eky'aha muheru, beene Taata, mushemererwe omuri Mukama. Okugaruka kubahandiikira ebigambo bimwe na biri tikurikundusya, kandi nikubareetera okuhama. 2Mwerinde embwa! Mwerinde enkozi z'ebibi! 3Manya niitwe bashare b'amazima, Mutima niwe atuhabura oku turaaramye Ruhanga. Okwehimbisa kwaitu kuba omuri Kristo Yesu. Titwesiga migyenzo y'aha mubiri. 4Nangwa n'obu byakubaire eby'emigyenzo y'aha mubiri, nyowe tinkaagizire ki ndikutiina. Mbwenu ku kiraabe kiri eky'okwegamira emigyenzo y'aha mubiri, n'oha orikuginkiza? 5Nkasharwa aha izooba rya munaana, ndi ow'eihanga rya Isiraeli omu kuzaarwa, ow'oruganda rwa Benyamiini, Omuheburaayo nyakabara, Omufarisaayo omu by'okukuratira eiteeka, 6omu bweziriki nkahiiganisa ekigombe ky'abaikiriza, omu kuhikiirira kw'omu iteeka nkaba ntaine kacokore. 7Kwonka ebyo ebyabaire biri eby'omugasho ahariinye nkabyeta ebifiire aha bwa Kristo. 8Buzimazima nimbara ebintu byona kuba ebifiire ahabw'omugasho ogurikukirira kimwe, nigwo ogw'okumanya Kristo Yesu Mukama wangye. Ahabwe nyowe nkaikiriza kufeerwa ebintu byona naabyeta efa, ngu mbone kutunga Kristo 9n'okuteeranirwa kimwe nawe. Kandi ngu nshangwe omuriwe ntaine kuhikiirira okwangye ahabwangye okwegamiire eiteeka, kureka okutungirwa omu kwikiriza Kristo. Nikwo kuhikiirira okuruga ahari Ruhanga okwegamira okwikiriza. 10Eki ndikwenda n'okumanya Kristo, nkamanya n'amaani g'okuzooka kwe, nkakwatanisa nawe omu kubonabonesibwa, nkashushana nawe omu kufa kwe; 11kandi ku kiribaasika, mpikye n'aha kuzooka omu bafiire. 12Tikwo kugira ngu ekyo naakitungire, nari ngu naahikiire kimwe; kureka ningumizamu ngu nkitungye nk'oku naanye Kristo yantungire. 13Banyaruganda, tindikugira ngu ekyo naakitungire, kureka eki ndikukora ni kimwe kyonka, niinyebwa ebindi enyima, ninkununkiriza ebindi omu maisho. 14Ntyo ningumizamu kuhika aha kirikuhakanirwa, ngu mbone kutunga ekihembo ky'omu iguru, nigo magara agatahwaho, agu Ruhanga yaanyeteire omuri Kristo Yesu. 15Mbwenu itwe, abaahamiire omu by'omutima, ekyo tukiteekateekyeho tutyo, kandi ku haraabe hariho ekindi eki murikuteekateekaho okundi, ekyo nakyo Ruhanga aryakibashuuruurira. 16Kwonka eki twahikireho, ka tugumizemu nakyo. 17Banyaruganda, muntooreze, kandi nk'oku turi eky'okureeberaho kyanyu, mwetegyereze abarikutwaza batyo. 18Manya baingi abu naabagambiire kaingi, kandi abu ndikubagambira na hati ntaireho n'okurira, batuura bari ababisha b'omusharaba gwa Kristo. 19Muheru yaabo n'okuhwerekyerera; Ruhanga waabo n'enda, beehimbisiza omu birikubahemura, emitima bagimariire aha by'ensi. 20Kwonka itwe owaitu n'omu iguru, ei tutegyereize omujuni Mukama Yesu Kristo kuruga, 21orihindura emibiri yaitu erikugaywa ekaba nk'ogwe ogw'ekitiinwa, naakoresa obushoboorozi obumubaasisa kwegomoororera ebintu byona.

will be added

X\