Philippians 2

1Amagara agu twine omuri Kristo ku garaabe nigatuteera omuhimbo, nigatwenegyezamu rukundo, nigatuha okukwatanisiza omuri Mutima, nigatureetera okukundana n'okugirirana esaasi, 2mbwenu nu muhikiirize okushemererwa kwangye, mwine ebiteekateeko bimwe, rukundo emwe, mukwatanisiize kimwe, kandi mwine omutima gumwe. 3Mutarikora ekintu kyona nimutarirana nari nimwetunguura, kureka mwebundikye nimuteekateeka ahari bagyenzi baanyu nk'abarikubakira. 4Omuntu weena arekye kuhugira aha bye wenka, kureka ayete n'aha by'abandi. 5Mugire omutima nk'ogu Kristo yaabaire aine: 6We n'obu araabe yaabaire ari omu rugyero rwa Ruhanga tarateekateekire okwingana kwe na Ruhanga ku kiri ekintu ky'okuhamiraho. 7Kureka akeihaho ekitiinwa, yaaba nk'omuhuuku, yaazaarwa nk'abantu. 8Kandi ku yaareebekire ari omuntu, yaayebundika, yaataho n'okworoba okwamureeteire kwemera okufa, nangwa akafeera n'aha musharaba. 9Nikyo Ruhanga yaamutunguuriire munonga, akamuha eiziina ririkukira agandi goona, 10ngu boona ab'omu iguru n'ab'omu nsi n'ab'okuzimu ku baraahurire bati eiziina rya Yesu, batsimbe amaju; 11kandi ngu buri rurimi rwona rwature Yesu Kristo ku ari Mukama, kuhaisa Ruhanga Ishe ekitiinwa. 12N'ahabw'ekyo, bagyenzi bangye abakundwa, nk'oku mwabaire mworoba obutoosha, na mbwenu mube nikwo mwahikiiriza okujunwa kwanyu nimutiina kandi nimutetema. Ti bu ndiho bwonka, kureka mukizeho munonga n'obu ntariho. 13Ahabw'okuba Ruhanga niwe abatamu okukunda ebi asiima n'okubikora. 14Mukore ebintu byona mutarikwetomboita, n'obu kwakuba okugira empaka. 15Nibwo muriba abataine ky'okuhaahuuzibwa kandi abari mwere, muri abaana ba Ruhanga abataine kamogo, abatwire omu bantu b'obusingye obu, abakiikamire bakahaba. Imwe nimubaakiramu nk'enyonyoozi ezirikwakira ab'omu nsi. 16Nimuhamira aha kigambo ky'amagara. Mpaho naanye aha izooba rya Kristo mbone kwesiima ku ntarairukangiire busha, n'obu kwakuba okuhendekyera busha. 17Nangwa eshagama yangye n'obu yaakushukwa aha kitambo ekirikuhongwa, nikwo kwikiriza kwanyu, nkaananuka nshemererwa hamwe naimwe mwena. 18Naimwe mushemererwe mutyo kandi mwesiime hamwe naanye. 19Nyine amatsiko omuri Mukama Yesu kubatumaho Timoteeho juba, mbone kugarukwa omutima omunda, naamanya eby'owaanyu. 20Manya tiinyine ondi ori nkawe, oraate munonga omutima aha byanyu. 21Ahabw'okuba abandi boona bata omutima aha byabo bonka, bitari bya Yesu Kristo. 22Kwonka omugasho gwa Timoteeho nimugumanya, ahabw'okuba omu by'Amakuru Marungi akaheereza hamwe naanye nk'oku omwana aheereza na ishe. 23N'ahabw'ekyo nyine amatsiko g'okumwohereza ahonaaho naaheza kureeba oku birangyendere. 24Kandi niinyesiga Mukama, ngu naanye ndyaija okwo juba. 25Mbwenu ndeebire ku kinshemereire kubatumaho Epafuradiito, mwene waitu omukozi kandi omurwani mugyenzi wangye. We n'entumwa yaanyu onkorera eki ndikwetenga. 26Manya atuura abainiire orushusho mwena, kandi kikamusaasa kumanya ngu mukahurira ku yaarwaire. 27Kwokwo akarwara, yaabura hakye kufa, kwonka Ruhanga akamugirira embabazi. Haza tiwe yaazigiriire wenka, kureka naanye akazingirira, ngu obusaasi butakantembekyeranaho. 28Nikyo ndikwongyerera kugira ekihika ky'okumubatumaho, ngu mubone kushemererwa ahabw'okugaruka kumureeba, kandi naanye ngarukwe omutima omunda. 29N'ahabw'ekyo mumwakiire omuri Mukama n'okushemererwa kwingi. Abantu nk'abo mugume mubahe ekitiinwa. 30Manya akaba arangariire kufa ahabw'omurimo gwa Kristo, naahayo amagara ge kuhikiiriza ebi mwakunkoreire.

will be added

X\