Philippians 1

1Nyowe Paulo na Timoteeho, abaheereza ba Kristo Yesu, twabaramutsya abarikwera mwena omuri Kristo Yesu, abari Filipi hamwe n'abareeberezi n'abahwezi, 2nitubendeza emigisha n'obusingye ebikomooka ahari Ruhanga Tataitwe na Mukama Yesu Kristo. 3Ninsiima Ruhanga wangye ahi mbaijukira hoona, 4kandi omu kushaba kwangye kwona okw'obutoosha, mbashabira mwena nshemereirwe. 5Manya okwiha aha kutandika n'okuhitsya hati, mutuura mukwataniise naanye omu by'okubuzya Amakuru Marungi. 6Nimpamiza kimwe ku Ruhanga, owaatandikire omurimo murungi omuriimwe, ariguhikiiriza aha Kiro kya Yesu Kristo. 7Nyowe kihikire okubateekateekaho ntyo mwena. Manya muntuura aha mutima ahabw'okuba mwena mukwatanisiza hamwe naanye omugisha gw'okuba embohe, n'okurwanirira Amakuru Marungi kandi n'okugahamya. 8Ruhanga nandeeba ku ntarikubeiha naaba ningira nti: Mwena mbainiire orushusho, nimbakunda na rukundo erikuruga ahari Kristo Yesu. 9Kandi ninshaba ngu rukundo yaanyu egume neekanyira omu kumanya n'omu kwetegyereza kwona, 10mubone kusiima ebirikukiraho oburungi. Haza aha Kiro kya Kristo mushangwe nimwera kandi mutaine kamogo, 11mwine emicwe mirungi ei Yesu Kristo wenka abaasa kubatungisa, mukahaisa Ruhanga ekitiinwa n'okumuhimbisisa. 12Banyaruganda, niinyenda mumanye ku ebyambaireho, buzima kwo byareeteire Amakuru Marungi kwongyera kubuga. 13Ekyo kikamanywa n'abaserukare boona abarikurinda ekikaari n'abandi boona, ku naabohirwe ninturwa okuba omuheereza wa Kristo. 14Kandi abaingi omu banyaruganda, okubohwa kwangye okwo kukabareetera kuhamira omuri Mukama; baayongyera kugira obumanzi bw'okugamba ekigambo kya Ruhanga batarikutiina. 15N'ekya buzima, bamwe nibarangirira Kristo ahabw'eihari n'okutarirana, kwonka abandi bamurangirira n'omutima murungi. 16Haza ekyo, banu bakikoresibwa rukundo, ahabw'okuba nibamanya ku Ruhanga yantaireho kurwanirira Amakuru Marungi. 17Kwonka bari, Kristo bamurangirira n'omutima gurikurwanirira orubaju, batari b'amazima; nibenda kuunyongyera obusaasi ndi omu nkomo. 18Mbwenu ekindi ninfa ki? Kristo ku yaakuba naarangirirwa omu buryo bwona, yaaba mu kwegiza, yaaba mu mazima, nyowe ka ninshemererwa. 19Eego, kandi ndyashemererwa, ahabw'okuba nimmanya ngu ahabw'okushaba kwanyu n'ahabw'okuhwerwa Mutima wa Yesu Kristo, ndyarugaho mpikye aha kurekurwa. 20Ekyo nikyo ntegyereize n'ekihika, kandi nyine amatsiko ku ntarikwitwa nshoni n'akakye, kureka nk'oku kiri hati kandi nk'oku kituura obutoosha, Kristo aryaguma naahimbisibwa n'obumanzi bwingi omu mubiri gwangye, yaaba mpuriire nari nfiire. 21Manya ahariinye okubaho ni Kristo, kandi okufa nikungasira okukiraho. 22Mbwenu ku kyakuba kiri okugumaho omu mubiri, ekyo kikandugiramu okukora emirimo y'omugasho. Kwonka aho ninshoberwa eki ndaatoorane. 23Manya byombi nibinta omu kangakaizi. Nkaayenzire kuruga omu nsi kuza kuguma na Kristo, ahabw'okuba ekyo nikikirira kimwe ebindi. 24Kwonka shi ahabwanyu nyowe okugumaho omuri ogu mubiri, nikyo kirikukira kwetengwa. 25Mbwenu ekyo ninkihamya, kandi nimmanya ku ndikwija kugumaho, nkaguma naimwe mwena, haza mukongyerwaho okwikiriza, mukakushemerererwamu. 26N'ahabw'ekyo ku ndiija owaanyu obundi, muryatunga eky'okwehimbisizaho omuri Kristo Yesu. 27Kwonka hoona, k'emitwarize yaanyu ebe eshemereire Amakuru Marungi ga Kristo. Haza yaaba nyija okwo nkabareeba nari ntaija, mpurire ngu mwemereire muhamire n'omutima gumwe n'ebiteekateeko bimwe, nimukwatanisa ahabw'okuba mukaikiriza ago Makuru Marungi. 28Mutarigira obu mutiinisiibwe abazigu baanyu. Ekyo nikiboorokyera kimwe ku bo barihwerekyerera, kwonka imwe mukajunwa; haza ekyo kiryaruga ahari Ruhanga. 29Manya timurahairwe mugisha gw'okwikiriza Kristo kwonka, kureka n'okubonabonesibwa ahabwe. 30Mbwenu obwo nimurwana orugamba nk'oru mwandeebire nindwana, kandi n'oru murikuhurira ninkirwana na hati.

will be added

X\