Matthew 9

1Yesu ku yaagiire omu bwato, yaayambuka, yaahika omu rurembo rw'owaabo. 2Omuri ago magingo baamureetera ozingazingirwe abyami aha katanda. Yesu, ku yaareebire baine okwikiriza, yaagambira ozingazingirwe ati: Guma, mwana wangye; waasaasirwa ebibi byawe. 3Reero bamwe aha bahangu b'eiteeka baagambirana bati: Ogu muntu yaarogota. 4Kwonka Yesu ahabw'okumanya ebiteekateeko byabo, yaababuuza ati: Nimuteekateekyera ki ebitahikire omu mitima yaanyu? 5Mbwenu ekirikurahuka ni kiiha, okugira nti; Waasaasirwa ebibi byawe, nari okugira nti: Imuka, ogyende? 6Mbwenu, ka mboorekye ku Omwana w'omuntu aine obushoboorozi omu nsi kusaasira ebibi. Atyo agambira ozingazingirwe ati: Imuka, oiheho akatanda kaawe, otaahe. 7Onu aimuka, ataaha. 8Ekimbuuro ky'abantu ku kyakireebire, kyatiina, kyahimbisa Ruhanga owaahaire abantu obushoboorozi burikwingana butyo. 9Yesu, ku yaabaire naarugayo, yaareeba omushaija orikwetwa Matayo, ashutami omu ihoorezo ry'omushoro; yaamugira ati: Nkuratira. N'onu yaimuka, yaamukuratira. 10Mpaho Yesu ku yaabaire ari omwa Matayo naarya, abashorooza b'omushoro baingi n'abasiisi baija, baashutama nawe aha meeza hamwe n'abatendekwa be. 11Abafarisaayo ku baakireebire, baagira abatendekwa be bati: Ahabw'enki omwegyesa waanyu naarya n'abashorooza b'omushoro kandi n'abasiisi? 12Yesu ku akihurira, abagira ati: Abahuriire tibo beetenga omufumu, kureka abarwaire. 13Mbwenu mugyende mwegye amakuru g'eki: Eki nyenda n'embabazi ti bitambo; manya tindaizire kweta bahikiriire, kureka abasiisi. 14Bwanyima abatendekwa ba Yohaana baija ahari Yesu, baamubuuza bati: Ahabw'enki itwe n'Abafarisaayo twesiibyakwo, haza abatendekwa baawe bateesiibyakwo? 15Yesu yaabagira ati: Abakwe bakaaganya kishwera akibaine? Kwonka obunaku buryahika, kishwera abaihweho, haza obwo nibwo baryesiibyakwo. 16Kandi tihariho muntu oteera ekiremu ky'omwenda musya aha kijwaro kikuru; ahabw'okuba ekyo kiremu kitaagura ekyo kijwaro, haza ekitaaguka kihanguha. 17Kandi na viino y'omutahe teshukwa mu furebe nkuru; ku kyakuba kwo, efurebe zikaabaruka, viino esheeheka, n'efurebe zisiisikara; kureka viino y'omutahe eshukwa omu furebe nsya, haza byombi birama. 18Yesu ku yaabaire naakibagambira atyo, haija omutegyeki, yaamutsimbira amaju, yaamugira ati: Muhara wangye yaafa; ija, omuteho engaro, akire. 19Yesu atyo aimuka, amukurata hamwe n'abatendekwa be. 20Mpaho haija omukazi owaabaire amazire emyaka ikumi n'ebiri arwaire ekyejwiso; amureetwa enyima, akora aha mukugiro gw'ekijwaro kye; 21ahabw'okuba akateekateeka ati: Nobu naakukora aha kijwaro kye kwonka, nkaakira. 22Yesu atyo ahinduka, amureeba, amugira ati: Huumura, mwana wangye; okwikiriza kwawe nikwo kwakukiza. Ahonaaho ogwo mukazi akira. 23Yesu, ku yaahikire omu nju y'ogwo mutegyeki, yaareeba abarikuteera emikuri n'ekimbuuro ky'abatu nikirabanamu, 24yaagira ati: Murugyeho; manya omwishiki tafiire, agwejegyeire. Batyo baamushekyerera. 25Ku baaherize kushohoza abantu, yaataahamu, yaakwata ogwo mwishiki omukono, ogwo mwishiki yaimuka. 26Enkuru egyo yaabuga omuri ekyo kyanga kyona. 27Yesu ku yaabaire naarugayo naahingura, abashaija babiri empumi baamukuratira nibamuhoogyera bati: Mwene Daudi, tugirire embabazi! 28Ku yaataahire omu nju, ezo mpumi zaamuhika; Yesu yaazibuuza ati: Nimwikiriza ku ekyo ndikubaasa kukikora? Baamugarukamu bati: Eego, Mukama waitu. 29Mpaho yaabakora ahamaisho naagira ati: Ka kibakorerwe nk'oku mwaikiriza. 30Amaisho gaabo gatyo gaahumuuka. Bwanyima Yesu yaabeehanangiriza munonga, ati: Mwerinde hatagira owaakimanya. 31Kwonka bo ku baagyenzire, baamurangaana omuri ekyo kyanga kyona. 32Ku baabaire nibarugayo, abantu baamureetera ekiteta ekiriho ekyago. 33Ekyo kyago ku kyabingirwe, ekiteta kyagamba; abantu baatangaara, baagira bati: Ekyo tikikareebwaga omuri Isiraeli. 34Kwonka Abafarisaayo baagira bati: Manya ebyago naabibingisa obushoboorozi bwa mukama waabyo. 35Kandi Yesu akagyenda naaraba omu ndembo zoona n'omu birorero, naayegyesa omu mateeraniro gaabo, naarangirira Amakuru Marungi g'obukama bwa Ruhanga, kandi naakiza endwara zoona n'obumuga bwona. 36Bwanyima ku yaareebire ebimbuuro by'abantu, yaabagirira esaasi ahabw'okuba bakaba bashobeirwe, bataine kihwera, bari nk'entaama zitaine muriisa. 37Nawe nikwo kugira abatendekwa be ati: Eby'okugyesha ni bingi, kwonka abagyesi ni bakye; 38n'ahabw'ekyo mushabe Mukama w'eigyesha ayohereze abakozi omu by'okugyesha bye.

will be added

X\