Matthew 8

1Yesu ku yaashuumire naaruga aha rushozi, enyanja y'abantu yaamukuratira. 2Mpaho omubembe yaija ahu ari, yaajuumara omu maisho ge, yaamugira ati: Mukama wangye, ku oraabe nookisiima, noobaasa kunshemeza. 3Yesu yaagorora omukono yaamukoraho naagira ati: Eego, ninkisiima, shemera! Ahonaaho yaakira ebibembe, yaashemera. 4Bwanyima Yesu yaamugira ati: Otagira n'omwe ou waakigambira; kureka irooko, oyeyorekye omuhongyerezi, oheyo omutoijo ogu Musa yaaragiire, kuhamiza abantu. 5Yesu ku yaataahire ati omuri Kafarinaumu, haija omukuru w'abaserukare igana, yaamweshengyereza, 6naagira ati: Mukama wangye, omuheereza wangye abyami omuka azingazingirwe, naahururwa munonga. 7Yesu yaamugira ati: Naaza kwija, mmukize. 8Omukuru w'abaserukare igana yaamugarukamu ati: Mukama wangye, timpikire kukutaasya omwangye; kwonka gira eki waagamba, haza omuheereza wangye naija kukira. 9Manya naanye ndi omutegyekwa, kandi nyine abaserukare abu ndikutegyeka. Ku ndikugambira omwe nti: Gyenda, agyenda; n'ondiijo nti: Ija, aija; n'omuheereza wangye nti: Kora eki, akikora. 10Yesu ku yaahuriire ekyo, yaatangaara, yaagira abamukuratiire, ati: Buzimazima nimbagambira ku ntakareebaga muntu n'omwe omuri Isiraeli oine okwikiriza nk'oku. 11Nimbagambira nti: Baingi baryaruga burugwa-izooba na burengyerwa-izooba, bashutame aha bugyenyi hamwe na Aburahamu na Isaaka na Yakobo, omu bukama bw'Ow'omu iguru; 12kwonka abaazairwe kuba ab'obukama obwo babingirwe aheeru omu mwirima, ei abantu bariririra, bakanena enshaya. 13Mpaho Yesu agira ogwo mukuru w'abaserukare igana, ati: Irooko ogyende; kibe nk'oku waikiriza. Kandi ogwo muheereza yaakira omuri ako kaanya. 14Bwanyima Yesu, ku yaataahire omwa Petero, yaashanga nyinazaara wa Petero abyami, arwaire omushwija. 15Yaamukora aha mukono, omushwija gwamurugaho; yaimuka, yaamuheereza. 16Ogwo mwabazyo baamureetera baingi abaabaire batembirwe ebyago; ebyo byago yaabibingisa ekigambo, kandi yaakiza boona abaabaire barwaire. 17Ekyo kyahikiiriza eki Isaaya omurangi yaagambire ati: We wenka akatwara eminyangararo yaitu, yaayekorera endwara zaitu. 18Yesu, ku yaareebire ekimbuuro ky'abantu bamwehinguririize, yaaragiira abatendekwa kwambuka seeri. 19Reero haija omuhangu w'eiteeka, yaamugira ati: Mwegyesa, niinyija kukukuratira ahu oraaze hoona. 20Yesu yaamugarukamu ati: Zaamuha zigira amaaya, n'enyonyi z'omu kaabunga zigira ebyashuri, kwonka Omwana w'omuntu tagira butaaho. 21Ondiijo aha batendekwa yaamugira ati: Mukama wangye, ndeka, mbanze nze kuziika tata. 22Kwonka Yesu yaamugira ati: Nkuratira; orekye abafiire babe nibo baaziika abafu baabo. 23Yesu ku yaagiire omu bwato, abatendekwa be baamukuratira. 24Haza haija eihunga ringi aha nyanja, ebingonzi byayenda kurengyera aha bwato; obwo we agwejegyeire. 25Batyo baija, baamusisiimura nibagira bati: Mukama waitu, tujune twafa! 26Yaababuuza ati: Imwe bantu b'okwikiriza kukye 'mwe, nimutiinira ki? Atyo aimuka, akabukira omuyaga n'enyanja; habaho obucureera bwingi. 27Abantu batangaara nibagira bati: Mbwenu ogu ni muntu ki, orikuhurirwa nobu byakuba omuyaga n'enyanja! 28Yesu, ku yaahikire seeri omu nsi y'Abageraseene, yaabuganwa abatembirwe ebyago babiri nibaruga omu bituuro. Abo bantu bakaba bari ab'akabi, hatariho orikuraba omuri ogwo muhanda. 29Mpaho baaborooga bati: Noofa ki naitwe, iwe Mwana wa Ruhanga! Oizire kutwita kubi obunaku butakahikire? 30Reero obwo hakaba hariho omukumbi gw'empunu nyingi, niziriira hangahari nabo. 31Ebyo byago byamweshengyereza biti: Ku oraatubingye, otwohereze omuri ogwo mukumbi gw'empunu. 32Nawe abigira ati: Nimwirooko! Bityo bibarugaho, bitaaha omuri ezo mpunu. Ogwo mukumbi gwona guhiringitira aha nengo, gugwa omu nyanja gurohamamu. 33Bwanyima abariisa b'ezo mpunu baahunga, baaza omu rurembo, baateekyerereza abaamwo byona, n'ebyaba aha baaba batembirwe ebyago. 34Mpaho ab'orurembo boona baija kubugana Yesu: ku baamureebire, baamweshengyereza kubarugira omu kyanga.

will be added

X\