Matthew 6

1Mwerinde, murekye kukora eby'okuhikiirira byanyu omu maisho g'abantu, ngu babareebe; ku muraakore mutyo, Shoimwe ori omu iguru taribaha bihembo. 2N'ahabw'ekyo ku oraagume waagabira abooro, orekye kukirangirira nk'oku endyarya zigira omu mateeraniro n'omu bihandagazi, ngu zibone kusiimwa abantu. Buzimazima nimbagambira nti: Ziba zaatungire ebihembo byazo. 3Ku oraabe noogabira abooro, omukono gwawe gwa bumosho gurekye kumanya eki ogwa buryo gurikukora, 4okugaba kwawe kubone kuba okw'omu mubonano, na Shoimwe oreeba eby'omu mubonano aryakuha ebihembo. 5Kandi ku muraabe nimushaba Ruhanga, mutariba nk'endyarya ezikunda kushaba zeemereire omu mateeraniro n'omu nteeraniro z'emihanda, ngu zibone kureebwa abantu. Buzimazima nimbagambira nti: Ziba zaatungire ebihembo byazo. 6Mbwenu ku oraaze kushaba, otaahe omu kishengye kyawe, okingye orwigi, oshabe Shoimwe ow'omu mubonano; kandi Shoimwe ogwo oreeba eby'omu mubonano, aryakuha ebihembo. 7Haza ku muraabe nimushaba Ruhanga, murekye kurandagatana nk'oku Abanyamahanga bagira. Manya bo bateekateeka ngu nibaija kuhurirwa ahabw'ebigambo byabo bingi. 8Mutaba nkabo; ahabw'okuba Shoimwe aba naamanya ebi murikwetenga mutakamushabire. 9Mugume nu mushabe muti: Tataitwe ow'omu iguru, eiziina ryawe ritiinwe; 10obukama bwawe bwije; ebi okunda bikorwe omu nsi, nk'oku bikorwa omu iguru. 11Otuhe eri izooba egabo yaitu y'obutoosha. 12Otusaasire ebibi byaitu, nkaitwe okutusaasira abatushaagiza. 13Otatureka tukoohibwa, kureka otujune Omubi. 14Manya ku murisaasira abantu ebibi byabo, naimwe Shoimwe ow'omu iguru aryabasaasira; 15kwonka ku muriba mutasaasiire bantu bibi byabo, na Shoimwe ow'omu iguru taribasaasira byanyu. 16Kandi ku muryesiibyakwo, mutariiririmba ahamaisho nk'endyarya, ahabw'okuba zeekokootsa ahamaisho, ngu abantu bareebe oku zeesiibizekwo. Buzimazima nimbagambira nti: Ziba zaatungire ebihembo byazo. 17Kwonka iwe, ku oraayesiibyekwo, guma oyesiigye amajuta omu mutwe, onaabe ahamaisho, 18abantu barekye kumanya ku oyesiibizekwo, kureka kimanywe Shoimwe ow'omu mubonano; kandi Shoimwe ogwo, oreeba eby'omu mubonano, aryakuha ebihembo. 19Mutaryebiikira eitungo omu nsi, ei ebiyenje n'omukyereenyo birisiisira, n'ei abashuma bafumurira, bakariiba; 20kureka mwebiikire eitungo omu iguru, ei ebiyenje nari omukyereenyo bitarisiisira, n'ei abashuma batafumurira bakariiba. 21Manya ahu eitungo ryawe riri, n'omutima gwawe niho guba. 22Eriisho niryo rumuri rw'omubiri. N'ahabw'ekyo eriisho ryawe ku riba rihuriire, omubiri gwawe gwona gubugwa okuhweza; 23kwonka eriisho ryawe ku riba rirwaire, omubiri gwawe gwona gutimba omwirima. Mbwenu shi, okuhweza okukurimu ku kuraabe kuri omwirima, omwirima ogwo ka ni mwingi! 24Tihariho obaasa kuheereza abakama babiri; ahabw'okuba aryayangaho omwe, akunde ondi; nari aryahamira ahari omwe, agaye ondi. Manya timurikubaasa kuheereza Ruhanga kandi n'eitungo. 25Nikyo ndikugambirira nti: Mutaryemerereza omutima eby'amagara gaanyu, ebi muraarye, nari ebi muraanywe, nainga eby'emibiri yaanyu ebi muraajware. Mbwenu shi, amagara tigarikukira ebyokurya, n'omubiri tigurikukira ebijwaro? 26Mureebere aha nyonyi z'omu kaabunga; tizibiba, tizigyesha, kandi tizihunika mu bitara, haza kunu Shoimwe ow'omu iguru aziriisa. Mbwenu imwe timurikuzikira? 27Omuriimwe hariho owaakubaasa kwongyera aha myaka y'amagara ge, nobu yaakwemereza omutima ata? 28Mbwenu nimwemerereza ki omutima ahabw'eby'okujwara? Muteekateekye aha birabyo by'omu ishwa oku bikura; tibikora mirimo kandi tibyogosha. 29Manya nimbagambira nti: Nangwa na Solomooni, omu kitiinwa kye kyona, taraizihiirwe bijwaro nka kimwe aharibyo. 30Mbwenu Ruhanga ku araabe ajweka atyo obunyaatsi bw'omu ishwa, oburiho eri izooba nyencakare bukanagwa omu kikoomi, kaashwa imwe bantu 'mwe, abaine okwikiriza kukye! 31N'ahabw'ekyo mutaryemereza omutima nimugira muti: Turyarya ki? nari: Turyanywa ki? nainga: Turyajwara ki? 32Manya ebyo byona nibyo Abanyamahanga baitanira; kandi Shoimwe ow'omu iguru naamanya ku murikubyetenga byona. 33Mbwenu mubanze mumarire omutima aha by'obukama bwe n'aha bi arikwenda; haza ebyo byona biryabongyerwaho. 34N'ahabw'ekyo mutaryemerereza omutima ebya nyencakare, ahabw'okuba nyencakare eryayeyemerereza yonka omutima. Reka buri kiro kihwe n'amaganya gaakyo.

will be added

X\