Matthew 4

1Bwanyima Yesu akatwarwa Mutima omu ihamba kwohibwa Sitaane. 2Ku yaamazire ebiro makumi ana naayesiibyakwo kandi naayeraazakwo, yaagira enjara. 3Mpaho omwohi yaija, yaamugira ati: Ku oraabe ori Omwana wa Ruhanga, ragiira amabaare aga gahindukye emigaati. 4Kwonka we yaagarukamu ati: Kikahandiikwa ngu: Omuntu tatungwa byokurya byonka, kureka kandi atungwa n'ekigambo kyona ekiruga ahari Ruhanga. 5Bwanyima Sitaane yaamutwara omu rurembo orurikwera, yaamwemereza aha itungu rya Nyaruju, 6yaamugira ati: Ku oraabe ori Omwana wa Ruhanga, yerekyere, oyenagye ahansi; ahabw'okuba kikahandiikwa ngu: Aryakukwatsa baamaraika be, kandi ngu: Baryakutega emikono, ngu orekye kuhonda ekigyere kyawe aha ibaare. 7Yesu amugira ati: Kandi kikahandiikwa ngu: Otaryosya Mukama Ruhanga waawe. 8Bwanyima Sitaane yaamutwara aha rushozi ruraingwa munonga, yaamworeka obugabe bwona obw'omu nsi n'ekitiinwa kyabwo; 9yaamugira ati: Ebi byona niinyija kubikuha, ku orantsimbire amaju, wandamya. 10Yesu amugarukamu ati: Rugaho, Sitaane! Manya kikahandiikwa ngu: Ogume oramye Mukama Ruhanga waawe, kandi we wenka obe niwe waaheereza. 11Sitaane atyo amurugaho; baamaraika baija bamuheereza. 12Yesu, ku yaahuriire ngu bakwatsire Yohaana, yaagaruka Galilaaya. 13Ku yaarugire Nazareeti, yaagyenda yaaguma Kafarinaumu, ekirorero ky'aha mwegyego gw'enyanja, ahagati y'ebyanga bya Zebuluuni na Nafutaali. 14Ekyo kyahikiiriza eki Isaaya omurangi yaagambire ati: 15Ensi ya Zebuluuni n'ensi ya Nafutaali ey'aha muhanda ogurikuza aha nyanja, obuseeri bwa Yorudaani, Galilaaya ey'Abanyamahanga 16abantu abaabaire batuura omu mwirima baakiirwe omushana mwingi; n'abaabaire batwire omu nsi y'ekibunda kya rufu; omushana gubajweraire. 17Okwiha obwo Yesu yaatandika kurangirira naagira ati: Mwegarukyemu, ahabw'okuba obukama bw'Ow'omu iguru buri haihi. 18Yesu, ku yaabaire naagyendagyenda aha rubaju rw'enyanja ya Galilaaya, yaareeba enyina-emwe ibiri, Simooni orikwetwa Petero, na Andereya omurumuna, nibatambika akatimba omu nyanja; ahabw'okuba bakaba bari abajubi. 19Yaabagira ati: Mwije munkuratire niinyija kubahindura abajubi b'abantu. 20Nabo ahonaaho baatsigaho akatimba kaabo, baamukuratira. 21Ku yairiire omu maisho kakye, yaareeba abandi babiri enyina-emwe, Yakobo mwene Zebedaayo na Yohaana omurumuna, bari omu bwato na Zebedaayo ishebo, nibashumikanisa obutimba bwabo; nabo yaabeeta. 22Ahonaaho baatsigaho obwato na ishebo, baamukuratira. 23Yesu akagyendagyenda omuri Galilaaya yoona naayegyesa omu mateeraniro gaabo, naarangirira Amakuru Marungi g'obukama bwa Ruhanga, naakiza ibara ndwara n'obusaasi bwona omu bantu. 24Okurangaanwa kwe kwabuga omuri Siriya yoona, baamureetera boona abaabaire barwaire, n'abaine obusaasi bw'emiringo etari emwe, n'abatembirwe ebyago n'ebigwantsimbo, n'abazingazingirwe; haza yaabakiza. 25Reero ebimbuuro by'abantu, abaarugire Galilaaya, Dekapoli Yerusalemu, Buyudaaya na seeri ya Yorudaani, baamukuratira.

will be added

X\