Matthew 28

1Bwanyima Sabato ku yaahwaire, aha kiro ky'okubanza omu wiiki, omushekye ku gwabaire nigujuguta, Mariya Magadaleena na Mariya ondiijo baaza kureeba ekituuro. 2Reero haabaho omutsitsa gw'amaani; maraika wa Nyakubaho yaashuuma naaruga omu iguru, yaija yaakumbagaza eibaare, yaarishutamaho. 3Enshusha ye akaba ari nk'omurabyo, n'ebijwaro bye nibyera nk'orubaare. 4Abarinzi ahabw'okumutiina baatetema, baaba nk'abakabire. 5Kwonka maraika yaagira abo bakazi ati: Mutatiina; ahabw'okuba nimmanya ku murikusherura Yesu obambirwe aha musharaba. 6Mbwenu aha tariho; azookire nk'oku yaagambire. Nimwije mureebe ahu abaire arambiire. 7Haza mugyende ahonaaho, mugambire abatendekwa be ku azookire omu bafiire, kandi ku yaabeebembera naaza Galilaaya; okwo niyo muraamureebere. Reeba, naabagambira. 8Batyo baruga aha kituuro nibeehuuta baine obwoba n'okushemererwa kwingi, bairuka kugambira abatendekwa be. 9Ago magingo Yesu ababugana, abagira ati: Nimukagire obusingye! Nabo baija, bamukwata amaguru, bamuramya. 10Yesu nawe abagira ati: Mutatiina, mugyende, mugambire beene waitu baze Galilaaya; niyo barandeebere. 11Abo bakazi ku baabaire nibakigyenda, bamwe aha barinzi baaza omu rurembo, baagambira abahongyerezi abakuru ebyabaho byona. 12Reero ku baaherize kuteerana hamwe n'abakuru omu ihanga n'okuhanuura nabo, baaha abaserukare empiiha nyingi, 13baabagira bati: Mugambire abantu muti: Abatendekwa be baizire nyekiro, baamwiba tugwejegyeire. 14Haza ekyo omutegyeki omukuru ku araakihurire, nitwija kumwikirizisa, tubaihe omu kabi. 15Nabo batyo batwara ezo mpiiha, bakora nk'oku bahabwirwe. Haza egyo nkuru yaabuga omu Bayudaaya n'okuhitsya eri izooba. 16Omu bunaku obwo abatendekwa ikumi n'omwe baza Galilaaya aha rushozi oru Yesu yaabaire abaragiriire. 17Haza ku baamureebire, baamuramya; kwonka abandi baabangaanisa. 18Mpaho Yesu ku yaizire, yaabagira ati: Nkaheebwa obushoboorozi bwona omu iguru n'omu nsi. 19Mbwenu mugyende muhindure abantu b'omu mahanga goona abatendekwa, nimubabatiza omu iziina rya Taata n'erya Mwana n'erya Mutima Orikwera, 20nimubeegyesa kukuratira byona ebi naabaragiire. Mumanye ku ndi hamwe naimwe ebiro byona okuhitsya obu obusingye bw'ensi egi burihwaho.

will be added

X\