Matthew 27

1Mbwenu ku bwaseesire, abahongyerezi abakuru boona hamwe n'abakuru omu ihanga baahanuura oku baraite Yesu. 2Baamuboha, baamutwara, baamuhayo ahari Pilaato omutegyeki omukuru. 3Mpaho Yuda owaamureebize, ku yaareebire Yesu yaacwerwa orubanja kumusinga, yaayefuuza, yaagarurira abahongyerezi abakuru n'abakuru omu ihanga ebyo bicweka by'efeeza makumi ashatu, 4naagira ati: Ncumwire okureebya omuntu ori mwere kwitwa. Baamugira bati: Itwe shi, ekyo kitukwatiire ki? Orwemarire! 5Nawe atyo atambika ebyo bicweka by'efeeza omuri Nyaruju, ashohora, agyenda, ayehanika. 6Kwonka abahongyerezi abakuru baihaho ebyo bicweka by'efeeza, bagira bati: Tikihikire kubita omu ibiikiro, ahabw'okuba n'empiiha z'eshagama. 7Batyo bahanuura, baziguramu ekibanja ky'omunogoozi w'enyungu, kuguma nibaziikamu abanyamahanga. 8N'ahabw'ekyo ekyo kibanja kikaguma nikyetwa Ekibanja ky'Eshagama n'okuhitsya hati. 9Kityo kyahikiirizibwa ekyagambirwe Yeremiya omurangi naagira ati: Bakatwara ebicweka by'efeeza makumi ashatu, nibwo buguzi bw'ogwo ou bamwe aha Baisiraeli baaramwire; 10baabihayo ahabw'ekibanja ky'omunogoozi w'enyungu, nk'oku Mukama yandagiire. 11Reero Yesu yaayemerera omu maisho g'omutegyeki omukuru; ogwo mutegyeki yaamubuuza ati: Weeza, ori omugabe w'Abayudaaya? Yesu amugarukamu ati: Waakigamba. 12Kwonka ku yaatabaariziibwe abahongyerezi abakuru n'abakuru omu ihanga, tiyaagira ki yaagarukamu. 13Pilaato nikwo kumubuuza ati: Torikuhurira ebi barikukushinja ku biri bingi? 14Kwonka tiyaagira ki yaamugarukamu na kimwe omu bi baamutabaariize; ekyo kyatangaaza munonga ogwo mutegyeki. 15Mbwenu ahari ibara bugyenyi nk'obwo, ogwo mutegyeki akaba amanyiriire kurekurira abantu embohe emwe ei barikwenda. 16Obwo bakaba baine embohe rurangaanwa erikwetwa Baraba. 17Ku baabaire bateeraine, Pilaato yaababuuza ati: Mbwenu n'oha ou murikwenda mbarekurire? Baraba, nari Yesu orikwetwa Kristo? 18Ahabw'okuba akaba naamanya ku baamuhaireyo ahabwa eihari. 19Ekindi, ku yaabaire ashutami aha kitebe ky'okucweraho emanja, omukazi we yaamutumaho ati: Otagira eki waakora ogwo muntu ohikiriire; ahabw'okuba ebi mmurootsireho nyekiro binsaasize munonga. 20Kwonka abahongyerezi abakuru n'abakuru omu ihanga baayosya abantu kushaba Baraba n'okwita Yesu. 21Reero omutegyeki omukuru omu kubagarukamu yaabagira ati: Ahari abo bombi, nimwenda mbarekurire oha? Bamugira bati: Baraba. 22Pilaato nawe yaababuuza ati: Mbwenu shi, ngire nta Yesu orikwetwa Kristo? Boona bati: Abambwe aha musharaba! 23Nawe ati: Ahanki? Akozire kibi ki? Kwonka bo baakizaho kuyomba bati: Abambwe aha musharaba! 24Pilaato ku yaareebire ataine ku araagire, kandi ku harikwija kubaho akajagararo, yaihayo amaizi, yaanaabira engaro omu maisho g'abantu naagamba ati: Nyowe ndi mwere aha shagama y'ogu muntu ohikiriire; murwemarire! 25Abantu boona baagarukamu bati: Eshagama ye ebe niitwe yaatukurira n'abaana baitu. 26Atyo abarekurira Baraba; kandi ku aheza kuteeza Yesu ebyasha, amuhayo kubambwa aha musharaba. 27Bwanyima abaserukare b'ogwo mutegyeki omukuru baatwara Yesu omu ishengyero, baateeranirayo eihe ryona ery'abaserukare, 28baamujuura ebijwaro bye, baamujweka omunagiro gurikutukura. 29Reero baazinga ekirunga ky'amahwa, baakimuta aha mutwe, baamukwatsa orubingo omu mukono gwe gwa buryo, baamutsimbira amaju nibamushungisa bati: Singa, Mugabe w'Abayudaaya! 30Batyo baamucwera amacwante, baakwata orwo rubingo, baarumuteeza aha mutwe. 31Ku baaherize kumushungisa, baamujuura ogwo munagiro, baamujweka ebye, baamutwara kumubamba aha musharaba. 32Ku baabaire nibashohora, baabugana omushaija owa Kureene orikwetwa Simooni; baamugyema kwekorera omusharaba gwa Yesu. 33Ku baahikire omu mwanya ogurikwetwa Gologota, amakuru ngu omwanya gw'Empanga y'Omutwe, 34baamuha viino etimbwirwemu endurwe ngu aginywe; kwonka ku yaagirorizeho; yaayanga kuginywa. 35Kandi ku baaherize kumubamba aha musharaba, baabagana ebijwaro bye nibabiteerera enteenyu. 36Bwanyima baashutama, baaguma aho bamuhangire amaisho. 37Reero ahaiguru y'omutwe gwe, baataho ekihandiiko ky'orubanja rwe ekirikushomwa kiti: OGU NI YESU, OMUGABE W'ABAYUDAAYA. 38Akabambwa hamwe n'abambuzi babiri, omwe aha rubaju rwe rwa buryo, n'ondiijo aha rwa bumosho. 39Reero abarikuhingura baajuma Yesu nibamuha mutinzi, 40nibagira bati: Iwe osheenya Nyaruju, okagaruka okagyombeka omu biro bishatu, mbwenu yejune! Ku oraabe ori Omwana wa Ruhanga otemburukye, orugye aha musharaba! 41Abahongyerezi abakuru hamwe n'abahangu b'eiteeka n'abakuru omu ihanga nabo baamushungisa batyo nibagira bati: 42Ku yaajunire abandi, mbwenu k'ataabaasa kwejuna! Ogwo mugabe wa Isiraeli, hati naatemburukye aha musharaba, haza tumwikirize! 43Tiwe ayesiga Ruhanga; mbwenu hati amurokore, ku araabe naamukunda! Manya agizire ati: Ndi Omwana wa Ruhanga! 44N'abambuzi abaabambirwe nawe nabo baamujuma batyo. 45Okwiha aha shaaha ya mukaaga ensi yoona ekashwekwa omwirima okuhitsya aha shaaha ya mwenda. 46Kandi nk'aha shaaha ya mwenda, Yesu yaahooga n'eiraka rihango, ati: Eli, Eli, lama sabakitaani? amakuru ngu: Ruhanga wangye, Ruhanga wangye, ahabw'enki wantsigaho? 47Bamwe aha baabaire beemereire aho, ku baakihuriire, baagira bati: Manya naayeta Eliya! 48Omwe aharibo ahonaaho yairuka, yaakwata ekyangu, yaakijabika omu viino y'encenku yaakishokamu orubingo, yaakimuha kukinyuunyuuta. 49Kwonka abandi baagira bati: Reka, tureebe Eliya ku araabe naija kumujuna! 50Atyo Yesu agaruka agamba n'eiraka rihango, ahayo amagara ge. 51Ago magingo omukingo gwa Nyaruju gutemukamu emitanda ebiri, okwiha eruguru okuhika ahansi; ensi etengyeeta, enkiri zaatika, 52ebituuro biiguka, n'emitumbi mingi y'abarikwera abaabaire bagwejegyeire ehimbuuka. 53Bwanyima Yesu ku yaaherize kuzooka omu bafiire, abarikwera abo baaruga omu bituuro, baataaha omu rurembo orurikwera, baabonekyera baingi. 54Omukuru w'abaserukare igana hamwe n'abu yaabaire aine nibarinda Yesu, ku baareebire omutsitsa n'ebyabaho, baatiina munonga, baagira bati: Buzimazima ogu abaire ari Omwana wa Ruhanga! 55Reero aho hakaba hariho abakazi baingi nibareebera hangahari. Abo bakazi bakaba barugire Galilaaya na Yesu, bamushendekyereize nibamuheereza; 56barimu Mariya Magadaleena, na Mariya nyina wa Yakobo na Yosefu, kandi na nyina wa beene Zebedaayo. 57Omwabazyo ku gwakiikire, haija omushaija omutungi owa Arimataaya, orikwetwa Yosefu, owaabaire nawe ari omutendekwa wa Yesu. 58Yaaza ahari Pilaato, yaamushaba omutumbi gwa Yesu. Pilaato nawe yaaragiira ku bagumuha. 59Yosefu ogwo yaihaho ogwo mutumbi, yaaguzinga omu mwenda gwa kitaani ogutaine burofa, 60yaaguta omu kituuro kye ekisya eki yaabaire ashorogotoroire omu rukiri; bwanyima yaakumbagaza orubengo ruhango aha munwa gwakyo, atyo yaagyenda. 61Obwo hakaba hariho Mariya Magadaleena na Mariya ondiijo, bashutami omu maisho g'ekyo kituuro. 62Eizooba ryakuratsireho, niryo eryo eryakuratiire ekiro ky'Okweteguura, abahongyerezi abakuru hamwe n'Abafarisaayo bakateeranira omu maisho ga Pilaato, 63baamugira bati: Mukama waitu, nitwijuka ku ogwo mubeihi, obu yaabaire akihuriire, yaagizire ati: Ku harihinguraho ebiro bishatu, ndyazooka omu bafiire. 64N'ahabw'ekyo ragiira barindire kimwe ekituuro okuhitsya aha kiro kya kashatu, abatendekwa be batakaija bakamwiba, bakagambira abantu bati: Azookire omu bafiire. Haza obwo, okuhabisa okuraahereerukye nikwija kuba kubi okukira okwabandize. 65Pilaato yaabagarukamu ati: Mwine abarinzi; nimwirooko mukirinde nk'oku murikubaasa. 66Batyo bagyenda, bahamiza kimwe ekyo kituuro, bata enzibuuro aha ibaare, bataho n'abarinzi.

will be added

X\