Matthew 26

1Yesu, ku yaaherize kugamba ebyo byona, yaagira abatendekwa be ati: 2Nimumanya ngu ku haraahingureho ebiro bibiri, nihaija kubaho ekiro ky'Obugyenyi bw'Okuhingurwaho, kandi Omwana w'omuntu naija kuheebwayo kubambwa aha musharaba. 3Omuri obwo bunaku abahongyerezi abakuru hamwe n'abakuru omu ihanga baateeranira omu ka y'omuhongyerezi omukuru, owaabaire naayetwa Kayaafa; 4boona hamwe baacuma enaama y'okukwata Yesu n'obwengye kumwita. 5Kwonka baagira bati: Ekyo kitabaho omu biro by'obugyenyi, abantu batakaajagarara. 6Mbwenu Yesu ku yaabaire ari Beetaniya, omwa Simooni omubembe, 7ari aha meeza, omukazi yaamwijaho aine akacupa k'eibaare ry'omwengyengye, akarimu amajuta g'omugaju ag'obuguzi bwingi; yaagamushuka aha mutwe. 8Abatendekwa, ku baakireebire, baaguubwa kubi nibagira bati: Mbwenu aga gaafa ki? 9Nangwa aga majuta g'omugaju gakaabaire gatunzirwemu eky'obuguzi bwingi, haza kigabirwa abooro. 10Kwonka Yesu ahabw'okukimanya, abagira ati: Ogu mukazi nimumugangiza ki? Eki yankorera ka ni kirungi! 11Imwe obutoosha abooro mutuura nabo, kwonka nyowe timuriguma naanye obutoosha. 12Manya obu yaaba naashuka amajuta g'omugaju aga aha mubiri gwangye, yaaba naakora eky'okunziikisa. 13Buzimazima nimbagambira nti: Ahu Amakuru Marungi aga garirangirirwa omu nsi yoona, eki ogu mukazi yaakora kiryagambwaho okumwijuka. 14Bwanyima omwe ahari ikumi na babiri, orikwetwa Yuda owa Kariota, akaza omu bahongyerezi abakuru, 15yaabagira ati: Mbwenu nimwija kumpa ki, ku ndaamubahe? Batyo baamuha ebicweka by'efeeza makumi ashatu. 16Okwiha obwo yaasherura oburyo oku araamureebye. 17Aha kiro ky'okubanza eky'Obugyenyi bw'Emigaati Etatumbisiibwe, abatendekwa bakaija ahari Yesu, baamubuuza bati: Nooyenda tukuteekateekyere hi, ahu oraariire Obugyenyi bw'Okuhingurwaho? 18Yaabagira ati: Nimwirooko muze omu rurembo, owa nanka, mumugire muti: Omwegyesa yaagira ati: Obunaku bwangye buri haihi; niinyija kukorera Obugyenyi bw'Okuhingurwaho omwawe hamwe n'abatendekwa bangye. 19Batyo abatendekwa baatwaza nk'oku Yesu yaabaragiira; baatebeekanisizayo eby'obwo Bugyenyi bw'Okuhingurwaho. 20Omwabazyo ku gwakiikire, Yesu yaaza aha meeza hamwe n'abatendekwa be ikumi na babiri. 21Mbwenu ku baabaire nibarya, yaagira ati: Buzimazima nimbagambira nti: Omwe omuriimwe naija kundeebya. 22Ekyo kyabasaasa munonga, baatandika kumubuuza omwe omwe bati: Niinye, Mukama wangye? 23Yaabagarukamu ati: Owaaba naakoza naanye omu shohaani niwe arandeebye. 24Omwana w'omuntu naija kuba nk'oku kyamuhandiikirweho; kwonka ogwo muntu orikumureebya, aryakareeba! Nangwa ogwo muntu kuri atarazairwe. 25Yuda owaamureebize nikwo kumubuuza ati: Mwegyesa, niinye? Yaamugarukamu ati: Kiri nk'oku waagamba. 26Mbwenu ku baabaire nibarya, Yesu yaakwata omugaati, yaasiima, yaagucwamu, yaaguha abatendekwa be naagira ati: Nimutoore, murye; ogu n'omubiri gwangye. 27Bwanyima yaakwata ekikopo; ku yaaherize kusiima, yaakibaha naagira ati: Mwena mukinyweho; 28ahabw'okuba egi n'eshagama yangye ey'endagaano ensya, eraasheeshwe ahabwa baingi, ngu basaasirwe ebibi. 29Nimbagambira nti: Tindinywa bundi ha kirugire omu mizaabibu, okuhitsya obu ndikinywa busya hamwe naimwe omu bukama bwa Tata. 30Ku baaherize kweshongora ekyeshongoro, baashohora, baaza omu Rushozi rw'Emioliva. 31Mpaho Yesu yaabagira ati: Mwena eki kiro nimwija kumpemukaho; ahabw'okuba kikahandiikwa ngu: Ndyateera omuriisa, entaama z'obusyo zitaataane. 32Kwonka ku ndaaheze kuzooka omu bafiire, niinyija kubeebembera ninza Galilaaya. 33Petero yaahiga naamugira ati: Boona nobu baraakuhemukyeho, nyowe tindikwija kukuhemukaho n'akakye! 34Yesu yaamugira ati: Buzimazima ninkugambira nti: Eki kiro rushaaki ku eraabe etakagambire, nooba waanyogire kashatu. 35Petero yaamugarukamu ati: Nobu naakuba ndi ow'okufa naiwe, nikikabure tindikwija kukwoga. N'abandi batendekwa boona baahiga batyo. 36Bwanyima Yesu yaagyenda nabo omu musiri ogurikwetwa Getesemaane; yaagira abatendekwa be ati: Mube muri aha, nze kuriya kushaba. 37Atyo atwara Petero na batabani ba Zebedaayo bombi, atandika kugira enaku n'obujune. 38Bwanyima abagira ati: Omutima gwangye gwine enaku z'okuunyita! Mugume aha nimureeba hamwe naanye. 39Atyo airirayo omu maisho kakye, ajuumara ahansi, ashaba ati: Taata, ku kiraabe nikibaasika, orekye ekikopo eki kimpingure! Kwonka kitaba nkaanye oku ndikwenda, kureka nkaiwe oku orikwenda. 40Ku aija aha batendekwa be abo, ashanga bagwejegyeire; agira Petero ati: Ebyo timwabaasa kureeba naanye eshaaha emwe? 41Mureebe kandi mushabe, mutakaagwa omu kwohibwa; manya omutima nigwenda, kwonka omubiri n'omweremwa. 42Atyo agarukayo obwa kabiri, ashaba ati: Taata, ekikopo eki ku kiraabe kitarikubaasa kuhingura ntakinywaire, eki orikwenda kibe nikyo kyakorwa. 43Kandi agaruka aija, ashanga bagwejegyeire, ahabw'okuba amaisho gaabo gakaba garembire. 44Mpaho abatsigaho obwa kabiri, agyenda, ashaba obwa kashatu naagamba ebigambo nka biri. 45Bwanyima agaruka ahari abo batendekwa be, abagira ati: Mbwenu mugumizemu mugwejegyere, muhuumure. Reeba, obunaku bwahika Omwana w'omuntu kuheebwayo omu mikono y'abasiisi. 46Nimwimukye, tugyende! Reeba, orikundeebya ari haihi. 47Ku yaabaire naakigamba, haija Yuda, omwe ahari ikumi na babiri hamwe n'ekimbuuro ky'abantu bakwaitse zaarurara n'ebikoni, boohereziibwe abahongyerezi abakuru n'abakuru omu ihanga. 48Egyo ndeebya ekaba yaabahaire akamanyiso, neegira eti: Ou ndaanywegyere, niwe ogwo; mumukwate. 49Ahonaaho ogwo mureebya ahika Yesu, amugira ati: Kagire obusingye, Mwegyesa! Atyo amunywegyera. 50Kwonka Yesu amugira ati: Mugyenzi wangye, kora eki oiziriire! Reero abo bahika Yesu, bamutaho engaro, bamukwata. 51Mpaho omwe ahari abo abaabaire bari hamwe na Yesu, asyorayo rurara ye, agitemesa omuheereza w'omuhongyerezi omukuru, amucwaho okutu. 52Bwanyima Yesu amugira ati: Garura rurara yaawe omu kyobate kyayo; ahabw'okuba abakwata rurara baryaitwa rurara. 53Nooteekateeka, ngu tindikubaasa kushaba Tata, akaanyoherereza ahonaaho emigogo y'engabo za baamaraika ikumi n'ebiri n'okukiraho? 54Mbwenu ebyahandiikirwe ebirikugira ngu n'eky'okuba kityo, bikaahikiiriziibwe bita? 55Omuri ako kaanya Yesu agira egyo migogo y'abantu ati: Beitu obu murikuunyizira na zaarurara n'ebikoni kunkwata, ndi omwambuzi? Buri izooba ka naabaire nshutama omuri Nyaruju niinyegyesa, haza mutankwate. 56Manya eki kyona kyabaho, ngu ebyahandiikirwe abarangi bibone kuhikiirizibwa. Ago magingo abatendekwa be boona bamutsigaho, bahunga. 57Bwanyima abaakwatsire Yesu baamutwarira Kayaafa omuhongyerezi omukuru, ahu abahandiiki n'abakuru omu ihanga baabaire bateeraniire. 58Obwo Petero akaba amukuratiire amuri hareho, okuhitsya obu baahikire omu kibuga ky'omuhongyerezi omukuru; atyo nawe akakitaahamu, akashutama n'abambari kureeba ahi biraaherere. 59Obwo abahongyerezi abakuru hamwe n'eishengyero ryona bakaba nibasherura obwamushinja bw'ebishuba bw'okwomesereza Yesu, ngu babone kumwitisa; 60kwonka tibaabubona, nobu haraabe haizire baamushinja baingi b'ebishuba. Bwanyima haija baamushinja b'ebishuba babiri, baagira bati: 61Ogu muntu akagira ati: Nimbaasa kusheenya Nyaruju ya Ruhanga, haza ngarukye ngyombekye omu biro bishatu. 62Omuhongyerezi omukuru nikwo kwemerera, akamubuuza ati: Toine ki orikugarukamu? Mbwenu aba bantu nibakushinja ki? 63Kwonka Yesu aguma ahunami. Omuhongyerezi omukuru nikwo kumugira ati: Ninkurahiza Ruhanga ohuriire, tugambire ku oraabe niiwe ori Kristo Omwana wa Ruhanga. 64Yesu amugarukamu ati: Waakigamba; kandi buzima nimbagambira nti: Okwiha hati muryareeba Omwana w'omuntu ashutami aha rubaju rwa buryo orw'Ow'obushoboorozi, naizira omu bicu by'omu iguru. 65Omuhongyerezi omukuru nikwo kutaagura ebijwaro bye, akagira ati: Yaarogota! Mbwenu nitukyendera ki baamushinja abandi? Manya mwayehuririra oku yaarogota! 66Mbwenu nimuteekateeka muta? Baamugarukamu bati: Ashemereire kufa! 67Batyo bamucwera amacwante ahamaisho, bamuteera entomi, n'abandi empi, 68nibamugira bati: Iwe Kristo, turagurire! N'oha owaakuteera? 69Obwo Petero akaba ashutami aheeru omu kibuga. Omuzaana aija, amugira ati: Naiwe waaba ori hamwe na Yesu owa Galilaaya. 70Kwonka we ayehakanira omu maisho ga boona, ati: Tindikumanya ki orikugamba. 71Ku yaarugireyo, yaahika aha irembo, ondiijo muzaana amureeba, agambira abeemereire aho ati: Ogu mushaija yaaba ari hamwe na Yesu owa Nazareeti. 72Onu agaruka ayehakana, ataireho n'okurahira ati: Ogwo muntu tindikumumanya. 73Ku haahingwireho akaanya kakye, abeemereire aho baahika Petero, baamugira ati: Buzimazima naiwe ori ow'omuri bari, ahabw'okuba emigambire yaawe neekworeka butunu. 74Mpaho atandika kwekyeena n'okurahira, ati: Ogwo muntu tindikumanya. Ahonaaho enkoko egamba. 75Petero nikwo kwijuka eki Yesu yaagamba naagira ati: Enkoko ku eraabe atakagambire, nooba waanyogire kashatu. Atyo ashohora, arira munonga.

will be added

X\