Matthew 24

1Yesu akaruga omuri Nyaruju; ku yaabaire naagyenda, abatendekwa be baamworeka oku Nyaruju yaayombekirwe. 2Kwonka we yaabagarukamu ati: Ebi byona nimubireeba? Buzimazima nimbagambira nti: Tiharitsigara ibaare na rimwe eritungamiire erindi eritarisheenyagurwa. 3Yesu ku yaabaire ashutami aha Rushozi rw'Emioliva, abatendekwa be baija, baamubuuza omu mubonano bati: Tugambire ahu ebyo biribeeraho, n'akamanyiso k'okwija kwawe, kandi n'ak'okuhwaho kw'ensi. 4Yesu nawe abagarukamu ati: Mwerinde, hatarigira n'omwe owaabahabisa. 5Manya baryaija baingi nibaanyeyeterera nibagira bati: Niinye Kristo; haza bahabise baingi. 6Kandi muryahurira engamba n'emibuuro yaazo; haza mutaryekanga, ahabw'okuba ebyo n'eby'okubaho; kwonka emperu yo eryaba etakahikire. 7Manya eihanga riryateera erindi ihanga, n'obugabe buteere obundi, kandi habeho enjara n'emitsitsa omu myanya mingi; 8kwonka ebyo byona biryaba biri entandikiro y'eby'obusaasi. 9Obwo baryabahayo okubonabonesibwa, babaite; muryayangwa amahanga goona ahabw'eiziina ryangye. 10Reero baingi baryagwa, bareebyane kandi bangane. 11Haryaimuka abarangi baingi b'ebishuba bahabise baingi. 12Mpaho ahabw'obugomi kukanya, okukunda bw'abaingi kuryahora. 13Kwonka origumisiriza akahika aha muheru, niwe arijunwa. 14Kandi Amakuru Marungi g'obukama bwa Ruhanga garyarangirirwa omu nsi yoona, kuhamiza amahanga goona; haza obwo emperu ehikye. 15Mpaho ku murireeba ekirikuzira ekirikuhwerekyereza, ekyagambirwe Daniyeli omurangi, kyemereire omu mwanya ogurikwera-orikushoma ayetegyereze- 16obwo abariba bari omuri Buyudaaya bahungire aha nshozi; 17oriba ori aha mutwe gw'enju ataritemburuka kugira eki yaiha omu nju; 18n'oriba ori omu musiri atarigaruka omuka kwenda omunagiro gwe. 19Ebishi bambe, abariba baine enda n'abarikwontsya omu biro ebyo baryagwerwa akagwe! 20Mushabe, okuhunga kwanyu kutaribaho mu biro by'embeho nari ahari Sabato. 21Manya haryabaho eby'obusaasi bwingi ebitakabahoga, ensi yaaba kuhangwa n'okuhitsya hati, kandi ebitaribaho bundi. 22Ebyo biro kuri Ruhanga atarabicwireho, tihaakurokokireho muntu n'omwe; kwonka ahabw'entoore ze, ebyo biro biryacuubwaho. 23Haza omuntu ku aribagira ati: Reeba, Kristo ari aha, nari, ari hariya, mutariikiriza; 24ahabw'okuba haryaimuka Ba-Kristo b'ebishuba n'abarangi b'ebishuba, bakore obumanyiso bukuru n'eby'okutangaaza kuhabisa nangwa n'abatoorainwe, kyaba nikibaasika. 25Reeba, naabagambira bitakabaireho. 26N'ahabw'ekyo ku baribagira bati: Reeba, nguriya omu ihamba, mutarizayo; kandi ku barigira bati: Reeba, ngugwo omu nju, mutariikiriza. 27Manya nk'oku omurabyo gurabiza burugwa-izooba gukahika burengyerwa-izooba, n'okwija kw'Omwana w'omuntu nikwo kuriba. 28Ahu omutumbi guri, niho amahungu gateeranira. 29Eby'obusaasi eby'omu biro ebyo ku birihwa biti, eizooba riryatimba omwirima, n'okwezi kuryazima, n'enyonyoozi ziryahanantuka omu iguru zigwe, n'eby'amaani eby'omu iguru bitengyeetsibwe. 30Reero obwo akamanyiso k'Omwana w'omuntu karyareebeka omu iguru, enganda zoona ez'omu nsi zicure, zireebe Omwana w'omuntu naizira omu bicu by'eiguru, aine obushoboorozi n'ekitiinisa kingi. 31Haza aryatuma baamaraika be, baije nibateera enzamba y'eiraka rihango, bataaruure abatoorainwe be nibabaiha omu mbaju ina ezi emiyaga ereetwamu, okwiha aha muheru gw'eiguru okuta aha gundi. 32Mureebere aha mutiini; eitaagi ryagwo ku ryoroba, ryatooka amababi, mumanya ku ekyanda kiri haihi. 33Naimwe nu nikwo kiri; ku murireeba ebyo byona, mumanye ku ari haihi, ku yaahikire aha marembo. 34Buzimazima nimbagambira nti: Ab'obusingye obu tibarihwaho, ebyo byona bitakabaireho. 35Eiguru n'ensi biryahwaho, kwonka ebigambo byangye tibirihwaho. 36Manya eby'ekyo kiro n'obwo bunaku tihariho orikubimanya, nobu baakuba baamaraika b'omu iguru, nangwa nobu yaakuba Mwana, kureka Ishe wenka. 37Nk'oku kyabaire omu biro bya Noa, n'okwija kw'Omwana w'omuntu nikwo kuriba. 38Manya abantu b'omu biro ebyabandiize omwegyemure bakaba nibarya, nibanywa, nibashwera kandi nibashwerwa, okuhitsya aha kiro eki Noa yaataahiireho omu bwato 39Haza bo tibarakimanyire okuhitsya obu omwegyemure gwaizire, gukabakukumba; n'okwija kw'Omwana w'omuntu nikwo kuriba. 40Obwo abashaija babiri ku bariba bari omu musiri, omwe aryatwarwa, ondi atsigweho. 41Abakazi babiri baryaba nibasa kumwe aha rubengo, omwe aryatwarwa, ondi atsigweho. 42N'ahabw'ekyo mugume nimureeba, ahabw'okuba timurikumanya kiro ki Mukama waanyu ariiziraho. 43Mwetegyereze eki, Nyineeka ku yaakuba naamanya amagingo ga nyekiro agu omushuma araiziremu, akaaguma naareeba kuzibira enju ye kufumurwa, 44N'ahabw'ekyo naimwe mugume mweteekateekire, ahabw'okuba timurikumanya bunaku obu Omwana w'omuntu ariiziramu. 45Mbwenu ni mutsigire ki omwesigwa kandi ow'obwengye, ou mukama we yaatsigiire ab'omu ka ye kubaha ebyokurya omu bunaku buhikire? 46Ogwo mutsigire ou mukama we ariija akashanga naakora atyo n'omuhiirwa. 47Buzimazima nimbagambira nti: Aryamuha obushoboorozi aha bi atungire byona. 48Kwonka ogwo mutsigire ku yaakuba mubi, yaagira ati: Mukama wangye yaasiibayo; 49atyo akatandika kuteera bagyenzi be, reero akarya kandi akanywa n'abasinzi; 50mukama w'ogwo mutsigire aryaija aha kiro ki onu atamwetegyeireho, n'aha shaaha ei atarikumanya, 51haza aryamufubira munonga, amute hamwe n'endyarya, ei abantu bariririra bakanena enshaya.

will be added

X\