Matthew 22

1Kandi Yesu akagaruka yaabacwera enfumu naagira ati: 2Obukama bw'Ow'omu iguru nibushushanisibwa n'omugabe owaateekyeire omutabani obugyenyi naashwera; 3akaragiira abaheereza be kweta abaayeetsirwe ahari obwo bugyenyi, kwonka baayanga kwija. 4Akagaruka akatuma abandi baheereza, naagira ati: Mugambire abeetsirwe aha bugyenyi muti: Reeba, naateekateekire obugyenyi, enimi zangye na zaakaberera zangye zituukwirwe; byona byeteekateekire, nimwije mutaahe obugyenyi. 5Kwonka bo ekyo tibaakyetaho, baagyenda, omwe omu kibanja kye, n'ondiijo omu by'obushuubuzi bwe; 6abaatsigaraho baakwata abo baheereza, baabahemura, babaita. 7Omugabe yaagira ekiniga, yaayohereza engabo ze, zaahwerekyereza abo baitsi, zaayotsya orurembo rwabo. 8Bwanyima yaagira abaheereza be ati: Eby'obugyenyi byeteekateekire, kwonka abeetsirwe tibabusheemereire. 9Mbwenu nimwirooko muze omu nteeraniro z'emihanda; abu muraashangyeyo boona mubeete aha bugyenyi bw'obushwere. 10Abo baheereza batyo bagyenda, baza omu bihandagazi, barundaana boona abu baagwaho, ababi n'abarungi; ekishengye ky'okutaahiramu obugyenyi kiijura abagyenyi. 11Kwonka omugabe ku ataahamu kureeba abagyenyi, ashangamu omuntu otajwaire kijwaro ky'obugyenyi; 12amubuuza ati: Mugyenzi wangye, omu waataahamu ota, otajwaire kijwaro ky'obugyenyi? Onu abura eky'okugarukamu. 13Omugabe nikwo kugira abagaragwa be ati: Mumubohe emikono n'amaguru, mumunagye aheeru omu mwirima, ahariba okurira n'okunena enshaya. 14Manya abeetsirwe ni baingi, kwonka abatoorainwe ni bakye. 15Reero Abafarisaayo bakagyenda, baahanuura oku baraamutegye omu bi araagambe. 16Batyo baamutumaho abatendekwa baabo hamwe n'ab'ekigombe ky'aba Herode, nibamubuuza bati: Mwegyesa, nitumanya ku oba ow'amazima, ku oyegyesa omu mazima eby'omuhanda gwa Ruhanga, kandi ku oteeta ha muntu weena, ahabw'okuba toreebera ha bukuru bw'omuntu. 17Tugambire eki orikuteekateeka. Mbwenu itwe, okuha Kaisaari omushoro kihikire, nari tikihikire? 18Kwonka Yesu ahabw'okumanya eitima ryabo, abagira ati: Nimuntegyera ki, imwe ndyarya 'mwe? 19Nimuunyorekye empiiha ei mushora. Batyo baagimureetera. 20Yesu nawe nikwo kubabuuza ati: Ekishushani eki n'ebihandiikirweho n'eby'oha? 21Bamugarukamu bati: N'ebya Kaisaari. Nawe abagira ati: Mbwenu nu ebya Kaisaari mubihe Kaisaari, n'ebya Ruhanga mubihe Ruhanga. 22Ekyo ku bakihurira, batangaara, bamurugaho, bagyenda. 23Eryo izooba Abasadukaayo bamwe, abagira ngu abafa tibazooka, bakaija ahari Yesu, baamubuuza 24bati: Mwegyesa, Musa akagira ati: Omuntu ku yaakufa atatsigire mwana, omurumuna ahungure omukazi we, abone kuzaarira mukuru we abaana. 25Mbwenu omuriitwe hakaba harimu enyina-emwe mushanju. Ow'omujigaijo akashwera, kwonka yaafa, kandi ahabw'okuba encwekye, omukazi we yaamutsigira omurumuna. 26Ow'omushubiro n'owa kashatu okuhitsya aha wa mushanju, boona baaba batyo. 27Aha muheru gwabo boona omukazi yaafa. 28Mbwenu omu kuzooka aryaba muka oha ahari abo omushanju? Ahabw'okuba boona bakamushwera. 29Yesu yaabagarukamu ati: Muhabire ahabw'okutamanya Ebyahandiikirwe, nobu gaakuba amaani ga Ruhanga. 30Manya omu kuzooka, abantu tibarishwera kandi tibarishwerwa, kureka baryaba bari nka baamaraika omu iguru. 31Reero aha kikwatiraine n'okuzooka kw'abafiire, imwe timukashomaga eki Ruhanga yaabagambiire ati: 32Ndi Ruhanga wa Aburahamu, Ruhanga wa Isaaka, kandi Ruhanga wa Yakobo? Biri ti Ruhanga w'abafiire, kureka n'ow'abahuriire. 33Ekyo ebimbuuro by'abantu ku byakihuriire, baatangaarira okwegyesa kwe. 34Abafarisaayo, ku baahuriire oku Yesu ahunamize Abasadukaayo, baayeteerana. 35Omwe aharibo, omwegyesa w'eiteeka, yaamutega naamubuuza ati: 36Mwegyesa, omu iteeka, ekiragiro ekikuru ni kiiha? 37Nawe yaamugarukamu ati: Kunda Mukama Ruhanga waawe n'omutima gwawe gwona n'amagara gaawe goona n'obwengye bwawe bwona. 38Ekyo nikyo kiragiro ekikuru kandi eky'okubanza. 39Reero ekya kabiri ekirikushushana nakyo n'eki: Kunda mutaahi waawe nk'oku oyekunda. 40Aha biragiro ebyo byombi, ebindi byona eby'omu iteeka n'eby'Abarangi niho bihamiza. 41Abafarisaayo ku baabaire bateeraniire hamwe, Yesu yaababuuza ekibuuzo eki, 42ati: Kristo nimumuteekateekaho muta? Aba omwana w'oha? Baamugarukamu bati: Ni mwene Daudi. 43Nawe yaabagira ati: Mbwenu shi Daudi, obu yaagambisibwa Mutima Orikwera, taramwetsire Mukama we? Obu yaagira ati: 44Nyakubaho akagambira Mukama wangye, ati: Shutama aha rubaju rwangye rwa buryo, okuhitsya obu ndigira abazigu baawe endibatiro y'ebigyere byawe. 45Mbwenu nu Daudi, naamweta Mukama, kandi shi naabaasa ata kuba omwana we? 46Haabura owaabaasa kugira eki yaamugarukamu, haza okwiha eryo izooba tihaagira waayehanga kumubuuza obundi.

will be added

X\