Matthew 21

1Ku bairiire haihi na Yerusalemu, baahika Beetifaagye, aha Rushozi rw'Emioliva, Yesu yaatuma abatendekwa be babiri, 2yaabagira ati: Nimwirooko muze omu kyaro ekibari omu maisho; ku muraakihikyemu muti, nimwija kushanga endogoya etsibikire, n'omwana gwayo; muzitsibure, muzindeetere. 3Ku haraabeho owaababuuza, mumugire muti: Mukama naazenda; nawe naija kuzoohereza ahonaaho. 4Ekyo kikabaho kuhikiiriza ekyagambirwe omurangi naagira ati: 5Mugambire ab'omuri Siyooni, muti: Reeba, Mukama waawe naija ah'ori, acureire kandi atembire endogoya omwana gwayo omuto. 6Batyo abo batendekwa bagyenda, batwaza nk'oku Yesu yaabaragiira; 7bareeta egyo ndogoya n'omwana gwayo, bazaaraho eminagiro yaabo, Yesu ashutamaho. 8Baingi omuribo baayarira eminagiro yaabo omu nguuto, n'abandi baatema amataagi g'emiti, baagaariramu. 9Ebimbuuro by'abantu abamwebembeire n'abamukuratiire baayamuza nibagira bati: Hosaana mwene Daudi! Ogwo orikwija omu iziina rya Nyakubaho ahimbisibwe! Hosaana, Iwe ori ahaiguru owa Herebe! 10Ku yaataahire ati omuri Yerusalemu, orurembo rwona rwajagarara nirugira ruti: Beitu ogu n'oha? 11Ebimbuuro by'abantu baagarukamu bati: Ogu ni Yesu omurangi owa Nazareeti ey'omuri Galilaaya. 12Bwanyima Yesu yaataaha omuri Nyaruju, yaabingamu abaabaire nibatundiramu n'abarikuguriramu; yaajuumika emeeza z'abaabaire nibahingisa empiiha, n'ebitebe by'abarikugurizamu enkombe; 13yaabagira ati: Kikahandiikwa kiti: Enju yangye eryayetwa ey'okushabiramu. Mbwenu imwe, mugihindwire eryaya ry'abambuzi! 14Empumi n'abarema nabo bakaija ahu ari omuri Nyaruju, yaabakiza. 15Kwonka abahongyerezi abakuru hamwe n'abahangu b'eiteeka, ku baareebire eby'okutangaaza ebi yaakora, n'abaana nibateeera omuri Nyaruju akaari bati: Hosaana mwene Daudi! baagira ekiniga kingi; 16baamugira bati: Beitu ebyo, ohuriire ebi aba barikugamba? Na Yesu yaabagarukamu ati: Eego, imwe shi timukashomaga ekirikugira kiti: Okarabya okuhimbisa okuhikire omu kanwa k'abaana bato n'abarikwonka? 17Atyo yaabatsigaho, yaaruga omuri orwo rurembo, yaaza Beetaniya, yaaraarayo. 18Omu kasheeshe Yesu, ku yaabaire naagaruka omu rurembo, yaagira enjara. 19Ku areeba omutiini aha rubaju rw'omuhanda, agyenda aguhika, ashanga gutariho kantu, kureka amababi gonka. Atyo agugira ati: Kabure okwana obundi! Ogwo mutiini gwoma ahonaaho. 20Abatendekwa ku bagureeba, batangaara nibagira bati: Beitu ogu mutiini gwarahuka guta kwoma? 21Yesu abagarukamu ati: Buzimazima nimbagambira nti: Kuri mwine okwikiriza mutarikubangaanisa, timurikwija kukora ekyakorwa aha mutiini kyonka; nangwa nobu mwakugira orushozi oru muti: Tsinduka ogwe omu nyanja, kikaaba kwo. 22Kyona ekimurikushaba nimweshengyereza mwine okwikiriza, muryakiheebwa. 23Yesu ku yaataahire omuri Nyaruju, abahongyerezi abakuru n'abakuru omu ihanga baija ahu ari naayegyesa, baamubuuza bati: Ni bushoboorozi ki oburikukukoresa ebi, kandi n'oha owaabukuhaire? 24Yesu yaabagarukamu ati: Naanye ka mbabuuze ekibuuzo; ku muraakigarukyemu nibwo ndaabagambire ahi naihire obushoboorozi oburikunkoresa ebyo. 25Okubatiza kwa Yohaana kukaruga hi? Ahari Ruhanga nari omu bantu? Baahakana bonka na bonka nibagira bati: Ku turaagire tuti: Kukaruga ahari Ruhanga, naija kutugira ati: Ahabw'enki mutaramwikiriize? 26Kandi ku turaagire tuti: Kukaruga omu bantu, nitutiina eki kimbuuro ky'abantu; ahabw'okuba boona nibahamya ku Yohaana yaabaire ari omurangi. 27Nabo nikwo kugarukamu Yesu bati: Titurikumanya. Nawe abagira ati: Naanye tindikwija kubagambira obushoboorozi oburikunkoresa ebyo. 28Mbwenu nimuteekateeka muta? Omushaija akaba aine abatabani babiri. Yaaza aha w'okubanza, yaamugira ati: Mwana wangye, eri izooba irooko okore omu musiri gw'emizaabibu. 29Onu amugarukamu ati: Naayangire! Kwonka bwanyima ayegarukamu, azayo. 30Mpaho aza aha wa kabiri, amugambira bimwe na biri. Onu amugarukamu ati: Eego, mukama wangye; kwonka tazayo. 31Mbwenu ahari abo ababiri, owaakozire eki ishe arikwenda n'oha? Baamugarukamu bati: Ow'okubanza. Yesu nikwo kubagira ati: Buzimazima nimbagambira nti: Abashorooza b'omushoro na baamaraaya baaza kubatanga omu bukama bwa Ruhanga. 32Manya Yohaana akabaijamu naakuratira ebi Ruhanga akunda, mwayanga kumwikiriza; kwonka abashorooza b'omushoro na baamaraaya bo baamwikiriza; kandi hoona ekyo nobu mwakireebire, bwanyima timureegarukiremu mukamwikiriza. 33Nimuhurire endiijo nfumu. Hakaba hariho omuntu nyineeka, owaahingire omusiri gw'emizaabibu, akaguzitirira orugo, akagurimamu einyuukiro rya viino, akagwombekamu omunaara, akagutsigira abashengi, atyo akaza eihanga. 34Obunaku bw'ebijuma kwera ku bwahikire, yaatuma abaheereza be ahari abo bashengi kumutwekyera ebijuma. 35Kwonka abo bashengi baakwata abo baheereza be; omwe baamuteera, ondi baamwita, n'ondiijo baamuteera amabaare. 36Yaagaruka yaatuma abandi baheereza baingi okukira abaabandize, nabo baabakuratsa bari. 37Bwanyima yaabatumaho omutabani, naagira ati: Shana omwana wangye bakaamugirira enshoni. 38Kwonka abo bashengi, ku baareebire ogwo mwana, baagambirana bati: Manya ogu niwe muhunguzi; nimwije tumwite, obuhunguzi bwe bube obwaitu. 39Batyo baamukwata, baamwozya omuri ogwo musiri gw'emizaabibu, baamwita. 40Mbwenu mukama w'ogwo musiri gw'emizaabibu ku ariija, abo bashengi aryabagira ata? 41Baamugarukamu bati: Abo bainazi aryabacwekyereza, bafe n'obusaasi; reero ogwo musiri gw'emizaabibu agutemu abandi abarimuganurira ebijuma omu bunaku bwabyo. 42Yesu nawe yaabagira ati: Timukashomaga ekyahandiikirwe? Ka nikigira kiti: Eibaare eri abombeki baayangire niryo ryahindukire obuhamizo bw'enju. Ekyo kikakorwa Nyakubaho, kandi nikitutangaaza okukireeba. 43N'ahabw'ekyo nimbagambira nti: Obukama bwa Ruhanga buryabaakwa, buheebwe eihanga eririkwana ebyana byabwo. 44[Weena origwa ahari eryo ibaare aryacwanyagurika; kandi weena ou ririgwera, riryamucwa obusaasingo.] 45Abahongyerezi abakuru hamwe n'Abafarisaayo ku baahuriire ezo nfumu ze, baamanya ku nibo arikurengyeza. 46Kwonka ku baayenzire kumukwata, baatiina egyo nyanja y'abantu, ahabw'okuba bakaba nibamuhamya ku ari omurangi.

will be added

X\