Matthew 20

1Obukama bw'Ow'omu iguru nibushusha nka nyineeka owaagurukire kare omu kasheeshe kuguriirira ab'okukora omu musiri gwe gw'emizaabibu. 2Ku yaaherize kuragaana nabo shilingi emwe eizooba rimwe, yaaboohereza omu musiri gwe gw'emizaabibu. 3Aha shaaha ya kashatu yaashohora, yaareeba abandi beemereire omu kajagiro, bataine ki barikukora; 4yaabagira ati: Naimwe muze omu musiri gw'emizaabibu, niinyija kubaha ekibashemereire. Batyo baazayo. 5Aha shaaha ya mukaaga n'eya mwenda agaruka ashohora, nabwo atwaza atyo. 6Kandi aha shaaha nka ikumi n'emwe ashohora, ashanga abandi beemereire; ababuuza ati: Ahabw'enki musiibire aha mwemereire mutaine ki murikukora? 7Bamugurakamu bati: N'ahabw'okuba tihaine waatuguriirira. Nawe abagira ati: Naimwe nimwirooko muze omu musiri gw'emizaabibu. 8Omwabazyo ku gwakiikire, mukama w'omusiri gw'emizaabibu yaagira omubiiki we ati: Yeta abakozi, obaihure ebihembo byabo, nootandikira aha baahereeruka, noohereza aha baabanza. 9Mbwenu abaaguririirwe aha shaaha ya ikumi n'emwe ku baizire, buri omwe yaaheebwa shilingi emwe. 10Reero abaabandize ku baizire, baateekateeka ngu nibaija kuheebwa ebirikukiraho; kwonka buri omwe omuribo yaaheebwa shilingi emwe. 11Ku baabaire nibagiheebwa, baayetomboitera nyineeka, 12bati: Aba abaakorera eshaaha emwe yonka, waabainganisa naitwe abaarenzya eizooba nitwecurenga, nitwitwa omushana. 13Nawe agarukamu omwe aharibo, naagira ati: Mugyenzi wangye, tiinyine ki naakushaagiza; kandi shi tiwaaragaana naanye shilingi emwe? 14Twara eyaawe, ogyende; ogu owaahereeruka nyowe ninsiima kumuha nk'oku naakuha. 15Mbwenu shi, haine orikunzibira kukora ebyangye nk'oku ndikwenda? Nari shi, nonteera ekitsyori kuntura obufura bwangye? 16Nikwo ab'okuhereeruka bariba batyo ab'okubanza, n'ab'okubanza bakaba ab'okuhereeruka. 17Kandi Yesu, ku yaabaire nainamuka Yerusalemu, yaata abatendekwa be ikumi na babiri hangahari nibakigyenda, yaabagira ati: 18Reeba, nitwinamuka Yerusalemu; kandi Omwana w'omuntu naija kurekurirwa abahongyerezi abakuru n'abahangu b'eiteeka, bamucwere orubanja rw'okwitwa; 19kandi bamurekurire Abanyamahanga kushungisibwa n'okwashwa n'okubambwa aha musharaba; haza aha kiro kya kashatu azookye omu bafiire. 20Bwanyima nyina wa beene Zebedaayo akaija n'abatabani ahari Yesu, yaamutsimbira amaju aine eki arikumushaba. 21Yesu yaamubuuza ati: Nooyenda ki? Nonu yaamugarukamu ati: Ragiira abatabani bangye aba bombi bashutame, omwe aha rubaju rwawe rwa buryo n'ondiijo aha rwa bumosho omu bukama bwawe. 22Kwonka Yesu yaagarukamu ati: Timurikumanya ki murikushaba. Ebyo nimubaasa kunywa ekikopo eki ndikwija kunywa? Baamugarukamu bati: Nitubaasa. 23Nawe yaabagira ati: Ekikopo kyangye kyo nimwija kukinywa; kwonka okushutama aha rubaju rwangye rwa buryo n'aha rwa bumosho, tiinye nkugaba, kureka Tata niwe akuha abu yaakuteekateekyeire. 24Reero abandi eikumi, ku baakihuriire, baagwerwa kubi ezo nyina-emwe; 25Yesu nikwo kubeeta, akabagira ati: Nimumanya ku abategyeki b'Abanyamahanga babategyekyesa eikama, kandi n'abakuru baabo ku babaragiiza obushoboorozi. 26Ekyo omuriimwe tikwo kiriba; kwonka weena orikwenda kuba mukuru omuriimwe, abe omuheereza waanyu; 27kandi weena orikwenda kuba ow'okubanza omuriimwe, abe omuhuuku waanyu; 28nk'oku Omwana w'omuntu ataraizire kuheerezibwa, kureka okuheereza n'okuhayo amagara ge kuba ekarabo ya baingi. 29Ku baabaire nibaruga Yeriko, ekimbuuro ky'abantu kyamukuratira. 30Reero abashaija babiri empumi abaabaire bashutami aha rubaju rw'omuhanda ku baahuriire Yesu naahingura, baayamuza nibagira bati: Mukama waitu, omwana wa Daudi, tugirire embabazi! 31Ekyo kimbuuro ky'abantu kyabakabukira ngu bahuname; kwonka bo baayamuza okukiraho bati: Mukama waitu, omwana wa Daudi, tugirire embabazi! 32Mpaho Yesu ayemerera, abeeta, naababuuza ati: Nimwenda ngu mbakorere ki? 33Banu bamugira bati: Mukama waitu, nitwenda ngu amaisho gaitu gahumuukye. 34Yesu atyo abagirira esaasi, akore ahamaisho gaabo; ahonaaho bahumuuka, bamukuratira.

will be added

X\