Matthew 2

1Yesu ku yaazaariirwe Beetelehemu ey'omuri Buyudaaya, omu busingye bwa Herode omugabe, abashaija abanyabwengye baaruga burugwa-izooba, baija Yerusalemu. 2Baabuuza bati: Omugabe w'Abayudaaya ozairwe ari nkahi? Manya ku tureebire enyonyoozi ye burugwa-izooba, twaija kumuramya. 3Omugabe Herode ku yaakihuriire, yaayemereza omutima, we n'ab'omuri Yerusalemu boona. 4Yaateerana abahongyerezi abakuru boona hamwe n'abahangu b'eiteeka, yaababuuza omwanya ogu Kristo arizaarirwamu. 5Baamugarukamu bati: Ni Beetelehemu ey'omuri Buyudaaya; ahabw'okuba egyo niyo omurangi yaahandiikireho ati: 6Naiwe Beetelehemu, ey'omu kyanga kya Buyudaaya, tiiwe orikuhereerukayo omu bakuru ba Bayudaaya; ahabw'okuba omuriiwe nimwo omwebembezi ariruga, akaba omuriisa w'abantu bangye Abaisiraeli. 7Herode nikwo kweta abo banyabwengye kumureeba omu mubonano, akababuuza obunaku obu baareebeiremu egyo nyonyoozi, 8kandi akaboohereza Beetelehemu naabagira ati: Mugyende mubuuririze gye eby'ogwo mwana, haza ku muraamureebe, mummanyise, naanye nze kumuramya. 9Ku baaherize kuhurira ebi omugabe yaagamba, baimutsya orugyendo; kandi enyonyoozi, ei baabaire baareebire neereetwa burugwa-izooba, yaabeebembera okuhitsya obu yaayemereire omu mwanya ogu omwana yaabaire arimu. 10Ku baagireebire, baashemererwa munonga. 11Batyo baataaha omu nju, baareeba omwana na Mariya nyina. Baatsimba amaju, baamuramya, reero baakomoorora emitwaro yaabo, baamutoijera ebiconco; ezaabu n'obubaani n'obunyanunga. 12Ku baahabwirwe Ruhanga omu kirooto okutaraba ahari Herode, baatoora ogundi muhanda, baagaruka owaabo. 13Mbwenu abo banyabwengye ku baaherize kugyenda, maraika wa Nyakubaho yaabonekyera Yosefu omu kirooto, yaamugira ati: Imuka otware omwana na nyina, ohungire Misiri, ogumeyo okuhitsya obu ndikugambira; ahabw'okuba Herode naayenda kusherura omwana kumwita. 14Yosefu atyo aimuka, atwara omwana na nyina, ekyo kiro abahungiza Misiri; 15bagumayo okuhitsya obu Herode yaafiire. Ekyo kikahikiiriza eki Nyakubaho yaagambiise omurangi ati: Nkeeta omwana wangye kuruga Misiri. 16Herode ku yaamanyire ngu abo banyabwengye bamureebize, yaagira ekiniga kingi, yaaragiira kwita abaana aboojo boona ab'omuri Beetelehemu n'omu byanga ebigyehinguririize, abahikize emyaka ebiri y'obukuru n'abatakagihikize, naihirira aha bunaku obu abanyabwengye baamugambiiremu. 17Obwo nibwo ebigambo ebyagambirwe Yeremiya omurangi byahikiiriziibwe, ebirikugira biti: 18Eiraka rikahurirwa omuri Raama ry'okuganya n'okucura munonga; Rakeeli naaririra abaana be, atakyenda kuyaagirwa, ahabw'okuba boona bahwaireho. 19Herode ku yaafiire, maraika wa Nyakubaho yaabonekyera Yosefu omu kirooto omuri Misiri, yaamugira ati: 20Imuka otware omwana na nyina ogarukye omu nsi ya Isiraeli; ahabw'okuba ababaire nibenda kwita omwana bafiire. 21Yosefu nikwo kwimuka, akatwara omwana na nyina, akagaruka omu nsi ya Isiraeli. 22Kwonka ku yaamanyire ngu Arikelao ahunguriire Herode ishe, kandi ku niwe mugabe wa Buyudaaya, yaatiina kugarukayo; reero ku yaahaburiirwe omu kirooto, yaakuba yaaza omu ishaza rya Galilaaya. 23Yaatuura omu kirorero ekirikwetwa Nazareeti, ngu ekyagambirwe abarangi kibone kuhikiirira, ekirikugira kiti: Aryayetwa Omunyanazareeti.

will be added

X\