Matthew 18

1Omu bunaku obwo abatendekwa bakaija ahari Yesu, baamubuuza bati: Omu bukama bw'Ow'omu iguru, omukuru n'oha? 2Atyo ayeta omwana muto, amuta ahagati yaabo, 3abagira ati: Buzimazima nimbagambira nti: Ku muriba mutahindukire, mukaba nk'abaana bato, timuritaaha mu bukama bw'Ow'omu iguru. 4Weena oryecureeza akaba nk'omwana ogu omuto, niwe mukuru omu bukama bw'Ow'omu iguru. 5Weena oyakiira omwana muto nk'ogu ahabwangye, biri niinye ayakiire; 6kwonka oriteeza entsibo omwe aha baana bato aba abarikuunyikiriza, akabareetera kushiisha, haakiri abohwe orubengo omu maraka, arohwe okuzimu omu nyanja. 7Ebishi ensi eryakareeba ahabw'ebirikuteeza entsibo! Manya byo tibiribura kwija, kwonka oribireeta aryakareeba. 8Omukono gwawe nari ekigyere kyawe ku biraabe nibikureetera kukora ekibi, bitemeho, obinagye. Haakiri otaahe omu magara ori ekimuga nari ekirema, okukira okunagwa omu muriro ogutarihwaho oine emikono yombi nari ebigyere byombi. 9Kandi eriisho ryawe ku riraabe nirikureetera kukora ekibi, riihemu, orinagye. Haakiri iwe okutaaha omu magara oine eriisho rimwe, okukira okunagwa okuzimu omu muriro oine amaisho gombi. 10Mwerinde mutarigira ou mwagaya aha baana bato aba; ahabw'okuba nimbagambira nti: Omu iguru baamaraika baabo batuura nibareeba Tata ori omu iguru ahamaisho. 11[Manya Omwana w'omuntu akaija kujuna ekyabuzire]. 12Mbwenu imwe nimuteekateeka muta? Omuntu ku yaakuba aine entaama igana, emwe aharizo yaabura, takaatsigaho makumi mwenda na mwenda omu nshozi, akaza kusherura eyaabura? 13Kandi ku agizoora, buzimazima nimbagambira, agishemerererwa munonga okukira ziri makumi mwenda na mwenda ezitakaburaga. 14Na Tata ow'omu iguru nikwo atarikwenda omwe aha baana bato aba kuhwerekyerera. 15Mwene waanyu ku araakushaagize, gyenda omuteise muri mwembi. Ku araakworobere, biri waagarukana na mwene sho. 16Kwonka ku araayangye kukworobera, twara ondiijo nari abandi babiri, kyona eki muraagambe kibone kuhamibwa obujurizi bwa baamushinja babiri nari bashatu. 17Ku araayangye kuboorobera, gambira ekigombe ky'abaikiriza; nabwo ku araayangire ekyo kigombe, murekye, omutwaze nk'omukaafiiri nari nk'omushorooza w'omushoro. 18Buzima nimbagambira nti: Kyona eki murikoma omu nsi, kiryakomwa n'omu iguru; na kyona eki murikomoorora omu nsi, kiryakomoororwa n'omu iguru. 19Kandi nimbagambira nti: Babiri omuriimwe ku bariikirizana omu nsi aha kintu eki barikushaba, Tata ow'omu iguru aryakibakorera. 20Manya ahu ababiri nari abashatu baba bateeraniire ahabwangye, naanye mba ndi ahagati yaabo. 21Bwanyima Petero akaija yaabuuza Yesu nti: Mukama wangye, mwene tata ku araagume yanshaagize, mmusaasire kangahi? Mpitsye emirundi mushanju? 22Yesu amugarukamu ati: Tindikukugira nti: Ogarukire aha mirundi mushanju, kureka makumi mushanju emirundi mushanju. 23Mbwenu obukama bw'Ow'omu iguru nibushushanisibwa omugabe owaayenzire kushoboorora ebintu bye n'abagaragwa be. 24Ku yaatandikire kubariirira, baamureeteraho omwe owaabaire aine eibanja rye rya shilingi obukaikuru makumi mukaaga na mukaaga. 25Ku yaaremirwe kuziihura, mukama we yaaragiira ku bamugura hamwe n'omukazi we n'abaana na byona ebi yaabaire aine, ngu abone kwihura. 26Mpaho ogwo mugaragwa amukwata amaguru naamweshengyereza ati: Mukama wangye, ngumisiririza, niinyija kukwihura, mpeze eibanja. 27Mukama w'ogwo mugaragwa atyo amugirira esaasi, amurekura, amusaasira n'eryo ibanja. 28Kwonka ogwo mugaragwa, ku ashohora ati, abugabugana n'omugaragwa ondi mugyenzi we, ou yaabaire naihuza shilingi igana; tahwama amuta aha munigo, amugira ati: Nyihura. 29Ogwo mugaragwa mugyenzi we ajuumara ahansi, amweshengyereza ati: Ngumisiririza, niinyija kukwihura. 30Onu ayanga, amutwara, amutaisa omu kihome, okuhitsya obu ariihura eryo ibanja. 31Abagaragwa bagyenzi be ku bareeba ekyabaho, baguubwa kubi munonga; bagyenda bateekyerereza mukama waabo byona ebyabaho. 32Mukama we atyo amweta, amugira ati: Iwe mugaragwa mubi 'we! Ka nkusaasiire eibanja eryo ryona ahabw'okuunyeshengyereza; 33mbwenu naiwe tokugiriire mbabazi omugaragwa mugyenzi waawe nk'oku nzikugiriire? 34Atyo mukama we amugirira ekiniga, amuha ab'okumubonabonesa, okuhitsya obu araihure eibanja ryona. 35Nikwo Tata ow'omu iguru naimwe aribagira atyo, buri omwe omuriimwe yaaba atasaasiire mugyenzi we aihire aha mutima.

will be added

X\