Matthew 17

1Ku haahingwireho ebiro mukaaga, Yesu yaatwara Petero na Yakobo na Yohaana omurumuna, yaabatembya orushozi ruraingwa bonka. 2Reero yaahinduka okundi omu maisho gaabo; ahamaisho ge haamurinkana nk'eizooba, n'ebijwaro bye byayangashana nk'orubaare. 3Ahonaaho Musa na Eliya baababonekyera nibagaaniira nawe. 4Petero yaagira Yesu ati: Mukama wangye, ka ni kirungi itwe okushangwa turi aha! Ku oraabe nookisiima, ka nyombekye aha obuju bushatu, kamwe kabe akaawe, akandi kabe aka Musa n'akandi aka Eliya. 5Ku yaabaire naakigamba, ahonaaho haija ekicu kirikwengyengyeta, kyabashweka, n'eiraka ryayema omuri ekyo kicu nirigira riti: Ogu n'Omwana wangye ou nkunda, kandi onnanura; mumuhurire. 6Abatendekwa ku bahurira eryo iraka, bagwa bajuumaire, batiinire munonga. 7Kwonka Yesu aija, abakoraho, abagira ati: Nimwimukye, murekye kutiina. 8Haza ku bainamwire amaisho, tibaagira ondi weena ou baareeba kureka Yesu wenka. 9Ku baabaire nibashuuma nibaruga aha rushozi, Yesu yaabeehanangiriza ati: Mutagira ou mwagambira eki mwayorekwa, okuhitsya obu Omwana w'omuntu arizooka omu bafiire. 10Abatendekwa be nabo bamubuuza bati: Mbwenu shi ahabw'enki abahangu b'eiteeka bagira bati: Eliya niwe aribanza kwija? 11Yaabagarukamu ati: Eliya kwo n'ow'okwija, kandi aryagarura ebintu byona aha buteeka. 12Mbwenu nimbagambira ku Eliya araherize kwija, kwonka abantu tibaramumanyire, haza baamukora nk'oku baayenzire. N'Omwana w'omuntu nikwo barimubonabonesa. 13Aho niho abatendekwa baihire kumanya ku arikubagambira ebya Yohaana 14Ku baahikire ekimbuuro ky'abantu, omushaija yaija, yaamutsimbira amaju, yaamugira ati: 15Mukama wangye, girira mutabani wangye embabazi, ahabw'okuba n'omugwi w'entsimbo kandi nizimwita kubi. Manya kaingi ayetuura omu muriro, kandi kaingi ayenaga omu maizi. 16Ku mmureeteire abatendekwa baawe, baaremwa kumukiza. 17Yesu yaagarukamu ati: Imwe bantu b'obusingye obu abatarikwikiriza kandi abarikwehabagiza, ndyahitsya hi okuguma naimwe? Ndyahitsya hi okubagumisiririza? Nimumundeetere aha. 18Yesu akabukira ekyago, kimurugaho; ogwo mwojo akira ahonaaho. 19Bwanyima abatendekwa baija ahari Yesu bwesherekye, baamubuuza bati: Ahabw'enki itwe turemirwe kukibinga? 20Nawe yaabagarukamu ati: N'ahabw'okwikiriza kwanyu kukye. Buzimazima nimbagambira nti: Kuri mwine okwikiriza okurikwingana embibo ya karidaari, mwaba nimwija kugambira orushozi oru, muti: Ruga aha, oze hariya, haza rurugaho; kandi tihariho kintu kyona ekiribarema. 21Kwonka ekyago ky'omuringo ogwo tikibingwa kindi kyona, kureka okushaba n'okwesiibyakwo. 22Ku baabaire bari omuri Galilaaya, Yesu yaabagambira ati: Omwana w'omuntu naija kurekurirwa abantu, 23bamwite, kwonka azookye aha kiro kya kashatu. Haza ekyo kyabasaasa munonga. 24Ku baahikire Kafarinaumu, abashorooza b'omushoro gwa Nyaruju ogwa buri mwaka, baija ahari Petero, baamubuuza bati: Omwegyesa waanyu tashora? 25Yaabagarukamu ati: Eego, ashora. Ku yaataahire omu nju, Yesu yaaba niwe yaamutanga kumubuuza ati: Simooni, nooteekateeka ota? Abagabe b'omu nsi omushoro nari empooza babiiha ahari baahi? Aha baana baabo nari aha bandi bantu? 26Onu ku amugarukamu ati: Aha bandi; Yesu amugira ati: N'ahabw'ekyo abaana baabo tikibakwaitseho. 27Kwonka ahabw'okutenda kugwisa kubi abo bashorooza, irooko oze aha nyanja, otambikyemu eirobo, haza ekyenyanja ekiraabanze kukwatwa, ku oraakyashamure akanwa, noija kushangamu empiiha; ogitware, ogibahe ahabwangye n'ahabwawe.

will be added

X\