Matthew 16

1Abafarisaayo n'Abasadukaayo bakaija kutega Yesu, baamushaba ku abooreka akamanyiso akarikuruga ahari Ruhanga. 2Nawe yaabagarukamu ati: Ku buba buri omu mwabazyo mugira muti: Nihaija kugira entsya nungi, ahabw'okuba eiguru niritukura. 3Kandi omu kasheeshe, muti: Eri izooba nihaija kugira eihunga, ahabw'okuba eiguru niritukura kandi ryairirimba. Nimumanya kurengyerera nimwihirira aha kureeba eiguru oku ririkushusha, kwonka timurikubaasa kukyenga eby'obunaku obu nimwihirira aha bumanyiso. 4Abantu b'obu busingye ababi abarikuhampuka nibenda akamanyiso; kwonka tihariho kamanyiso karaaboorekwe, kureka aka Yona. Atyo abatsigaho, agyenda. 5Abatendekwa obu baahika seeri, bakaba beebirwe kugyendana omugaati. 6Yesu yaabagira ati: Nimureebe kandi mwerinde ekitumbisa ky'Abafarisaayo n'Abasadukaayo. 7Baagambirana bonka bati: Manya titwareeta migaati. 8Kwonka Yesu akimanya, abagira ati: Imwe bantu b'okwikiriza kukye 'mwe, ahabw'enki nimugambirana mwenka, ngu timwine migaati? 9Timukeetegyereize? Timurikwijuka emigaati eri etaano ei mwagaburiire abantu enkumi itaano, n'omubaro gw'ebitenga ebi mwarundaine? 10Nari emigaati eri omushanju ei mwagaburiire abantu enkumi ina, n'oku mwarundaine ebitenga bingi? 11Ahabw'enki nimuremwa kwetegyereza ku ntaagamba ha by'emigaati? Mwerinde ekitumbisa ky'Abafarisaayo n'Abasadukaayo. 12Batyo barugaho bashoboorokyerwa ku ataabagambira kwerinda kitumbisa ky'omugaati, kureka ebi Abafarisaayo n'Abasadukaayo barikwegyesa. 13Yesu, ku yaahikire omu kyanga kya Kaisaariya-Filipi, yaabuuza abatendekwa be ati: Beitu Omwana w'omuntu, abantu bagira ngu n'oha? 14Baamugarukamu bati: Abamwe bagira ngu ni Yohaana Omubatizi, abandi ngu ni Eliya, kandi abandi, ngu ni Yeremiya, nari omwe aha barangi. 15Agaruka agira ati: Kwonka shi imwe, nimugira ngu ndi oha? 16Simooni Petero amugarukamu ati: Ori Kristo, Omwana wa Ruhanga ohuriire. 17Yesu amugarukamu ati: Simooni mwene Yona, oine omugisha; ahabw'okuba owaakikushuuruurira ti muntu nyabuntu, kureka Tata ori omu iguru. 18Naanye ninkugambira nti: Niiwe Petero kandi ahari orwo rukiri, niho ndyombeka ekigombe ky'abaikiriza bangye, n'amaani ga rufu tigarikibaasa. 19Ndyakuha ebikomoorozo by'obukama bw'Ow'omu iguru; kyona eki orikoma omu nsi, kiryakomwa n'omu iguru; kandi kyona eki orikomoorora omu nsi, kiryakomoororwa n'omu iguru. 20Atyo ayehanangiriza munonga abatendekwa be kutagira muntu weena ou baagambira ku ari Kristo. 21Okwiha obwo Yesu yaatandika kumanyisa abatendekwa be ku ari ow'okuza Yerusalemu kubonabonesibwa munonga abakuru omu ihanga n'abahongyerezi abakuru n'abahangu b'eiteeka; aitwe, kandi aha kiro kya kashatu azookye. 22Mpaho Petero amwekiikana, atandika kumuteisa naagira ati: Nikikabure, Mukama wangye! Ekyo kitarikubaho. 23Kwonka Yesu ahinduka, agira Petero ati: Iwe Sitaane 'we, ngaruka enyima! Ori ekirikuteeza entsibo, ahabw'okuba ebi orikuteekateeka ti bya Ruhanga, kureka n'eby'abantu. 24Bwanyima Yesu akagambira abatendekwa be ati: Omuntu weena orikwenda kunkuratira, ayeyogye, ayekorere omusharaba gwe, haza ankuratire. 25Ahabw'okuba weena okiza amagara ge, aryagafeerwa; kwonka weena ohayo amagara ge ahabwangye, aryagagarurirwa. 26Mbwenu omuntu kiryamugasira ki okukubuura ensi yoona haza akafeerwa amagara ge? Nari omuntu akaahayo kintu ki kucungura amagara ge? 27Manya Omwana w'omuntu aryaizira omu kitiinwa kya Ishe hamwe na bamaraika be, azimuurire ibara muntu naihirira aha bi yaakozire. 28Buzimazima nimbagambira nti: Hariho abeemereire aha abatarifa batakareebire Mwana w'omuntu naija ari omugabe.

will be added

X\