Matthew 15

1Bwanyima Abafarisaayo n'abahangu b'eiteeka bakaruga Yerusalemu, baija ahari Yesu, baamubuuza bati: 2Ahabw'enki abatendekwa baawe batarikukuratira omugyenzo gw'aba ira? Manya nibarya batanaabire mu ngaro. 3Yaabagarukamu ati: Ahabw'enki naimwe nimuhenda ekiragiro kya Ruhanga ahabw'emigyenzo yaanyu? 4Manya Ruhanga akagira ati: Otiine shoimwe na nyoko; kandi ati: Weena orijuma ishe nari nyina, aitwe. 5Kwonka imwe mugira muti: Weena orikugambira ishe nari nyina ati: Eki naakukuhaire kukugasira naakitoijera Ruhanga; biri obwo naaba atakigyemwa kutiina ishe nari nyina. 6Mutyo ahabw'emigyenzo yaanyu, ekigambo kya Ruhanga mukihundura busha. 7Imwe ndyarya 'mwe! Isaaya ka yaabarangireho gye, obu yaagira ati: 8Ab'eihanga eri nibampaisisa ekitiinwa eminwa yaabo, haza emitima yaabo endi hare. 9Bandamiza busha ahabw'okuba beegyesa ebyatairweho abantu, oti n'enyegyesa y'ebyatairweho Ruhanga. 10Atyo Yesu ayeta ekimbuuro ky'abantu kuteeranira ahu ari, abagira ati: Nimutegye amatu kandi mwetegyereze. 11Ekitaaha omu kanwa tikyo kishiisha omuntu, kureka ekiruga omu kanwa nikyo kishiisha omuntu. 12Bwanyima abatendekwa be baija, baamugira bati: Noomanya Abafarisaayo ku baaguubwa kubi ahabw'okuhurira eki waagamba? 13Yaabagarukamu ati: Ekibyairwe kyona eki Tata ow'omu iguru atarabyaire, kiryakuurwa. 14Mubarekye; n'abeebembezi empumi abarikwebembera ezindi mpumi. Manya empumi ku eyebembera endi, zombi zigwa omu kiina. 15Petero amugira ati: tushoboororere egyo nfumu. 16Yesu amugarukamu ati: Biri naimwe timukeetegyereize? 17Timurikumanya ku kyona ekiza omu kanwa kirabamu, kikataaha omunda haza kikoogamu? 18Kwonka ekireetwa omu kanwa kiba nikiruga omu mutima; haza ekyo nikyo kishiisha omuntu. 19Ahabw'okuba omu mutima nimwo haruga ebiteekateeko bibi: obwitsi, obushambani n'ebikwatiraine nabwo, okwiba, okubeiherera ondi, n'okugambuura; 20ebyo nibyo bishiisha omuntu; kwonka okurya otanaabire mu ngaro tikushiisha muntu. 21Bwanyima Yesu ku yaarugireyo, yaaza omu kyanga ekiherereire Tuuro na Sidoni. 22Mpaho haija omukazi Omunyakanaani naaruga omuri ekyo kyanga, yaayamuza naagira ati: Mukama wangye, mwene Daudi, ngirira embabazi! Muhara wangye atembirwe ekyago, kimuri kubi. 23Kwonka we tiyaagira ki yaamugarukamu. Abatendekwa be baija, baamweshengyereza nibagira bati: Mubingye, ahabw'okuba naatwitsa orwari. 24Yaabagarukamu ati: Manya nyowe tindatumirwe handi, kureka omu ntaama ezaabuzire ez'ab'omu ruganda rwa Isiraeli. 25Kwonka ogwo mukazi aija, amutsimbira amaju, amugira ati: Mukama wangye, mpwera. 26Nawe amugarukamu ati: Tikihikire kukiriza ebyokurya by'abaana kubitambikira embwa. 27Ogwo mukazi amugira ati: Eego, Mukama wangye, kwonka n'embwa zirya oburagarika oburuga aha meeza ya mukama waazo. 28Yesu nawe amugarukamu ati: Mukazi 'we, ebishi okwikiriza kwawe ni kuhango! Ka kikukorerwe nk'oku orikwenda. Ago magingo muhara we akira. 29Yesu ku yaarugireyo, yaagyenda naaraba aha mwegyeego gw'enyanja ya Galilaaya. Atyo yainamuka omu kibungo, yaashutamayo. 30Ebimbuuro by'abantu baateeranira ahu ari, bamureeteire ebirema n'ebimuga n'empumi n'ebiteta n'abandi baingi, baabahitsya haihi n'ebigyere bye, yaabakiza. 31Abaabaire bateeraniire aho baatangaara nibareeba ebiteta nibigamba, ebimuga bikiriire kimwe, ebirema nibigyenda n'empumi nizireeba; batyo baahimbisa Ruhanga wa Isiraeli. 32Bwanyima Yesu akeeta abatendekwa be, yaabagira ati: Eki kimbuuro ky'abantu, ka kyanyitsa esaasi! Manya bamazire naanye ebiro bishatu bataine ki barikurya, kandi tindikwenda kuboohereza n'enjara, batakaagwera enshazi omu muhanda. 33Abatendekwa be baamugira bati: Mbwenu omuri eri ihamba nitwiha hi ebyokurya by'okuriisa abantu abarikwingana bati, bakahaaga? 34Yesu nikwo kubabuuza ati: Mwineho emigaati engahi? Banu bati: Ni mushanju n'otwenyanja tukye. 35Atyo aragiira abantu kushutama ahansi. 36Akwata egyo migaati mushanju n'ebyo byenyanja; ku aheza kusiima, abicwamu obucweka, abikwatsa abatendekwa be, nabo babiha abantu. 37Boona barya, bahaaga; reero batorotoora oburagarika obwashaaga, bwijuza ebitenga mushanju. 38Obwo abaariire bakaba bari abashaija enkumi ina, otabariiremu bakazi na baana. 39Ku aheza kuraga abo bantu, aragara omu bwato, aza omu kyanga kya Magadala.

will be added

X\