Matthew 14

1Omu bunaku obwo ow'eishaza Herode akahurira okurangaanwa kwa Yesu; 2yaagira abagaragwa be ati: Manya ogwo ni Yohaana Omubatizi azookire omu bafiire; nikyo eby'amaani ebyo birikukorerwa omuriwe. 3Ahabw'okuba Herode ogwo akaba aherize kukwata Yohaana, yaamuboha, yaamuta omu kihome ahabwa Herodiya muka Filipo mwene ishe; 4ahabw'okuba Yohaana akaba amugambiire ati: Omu iteeka tikihikire, iwe okumuhindura omukazi waawe. 5Ekyo nobu kyamureeteire kwenda kumwita, kwonka akatiina abantu, ahabw'okuba bakaba nibateekateeka Yohaana kuba omurangi. 6Kwonka ekiro ky'okwijuka okuzaarwa kwa Herode ku kyahikire, muhara wa Herodiya yaazinira omu maisho g'abari aha bugyenyi, yaagwisa gye Herode; 7ekyo kyamureetera kurahira naamuraganisa kumuha eki araamushabe kyona. 8N'onu ku yaahabwirwe nyina, yaamugira ati: Mpeera omuri oru rucuba omutwe gwa Yohaana Omubatizi. 9Ekyo omugabe kimusaasa; kwonka ahabw'okushangwa yaarahiire, n'ahabw'abagyenyi be, aragiira ku bagumuha; 10atuma, batemaho Yohaana omutwe omu kihome, 11bagureetera omu rucuba, baguha ogwo mwishiki, nawe agutwarira nyina. 12Abatendekwa be baija, batwara omuntumbi gwe, baguziika, batyo bagyenda, babigambira Yesu. 13Yesu ku yaakihuriire, yaarugayo ari omu bwato, yaaza omu mwanya gwekiikire kwehereera. Abantu baingi ku baakihuriire, baaruga omu birorero, baamukurata nibagyendesa ebigyere. 14Ku yaarugire omu bwato, yaareeba ebimbuuro by'abantu, yaabagirira esaasi, yaakiza abarwaire baabo. 15Ku bwabaire bwaba omwabazyo, abatendekwa baija ahu ari, baamugira bati: Aha n'eihamba, n'obwire bwaizire; ragiira abantu baze omu byaro kweshakira ebyokurya. 16Yesu agira ati: Batagyenda; mube niimwe mwabaha ebyokurya. 17Bamugira bati: Aha twineho emigaati etaano yonka n'ebyenyanja bibiri. 18Nawe abagira ati: Mubindeetere aha. 19Atyo aragiira ebimbuuro by'abantu kushutama aha kanyaatsi; mpaho ayakiira egyo migaati etaano n'ebyo byenyanja bibiri, areeba ahaiguru, asiima, abicwamu, aha abatendekwa egyo migaati, nabo bagiha ebimbuuro by'abantu. 20Boona barya, bahaaga. Bwanyima batorotoora oburagarika obwatsigaraho, bwijuza ebitenga ikumi na bibiri. 21Kandi abaariire bakaba bari abashaija nk'enkumi itaano, otabariiremu bakazi na baana. 22Ahonaaho Yesu aragiira abatendekwa kuza omu bwato kumubandiza seeri, obwo we naakiragiira ebimbuuro by'abantu kugyenda. 23Ku yaaherize kuraga ebyo bimbuuro, yainamuka omu rushozi wenka kushaba. Omwabazyo ku gwakiikire, yaashangwa ariyo wenka. 24Haza ago magingo, obwato bukaba bwagiire hare, entambwe nyingi kuruga aha nkungu, nibuzongibwa ebingonzi; ahabw'okuba omuyaga gukabareetwa omu maisho. 25Aha kisisiimuko kya kana eky'ekiro, yaabaizira naagyendesa amaguru aha nyanja. 26Reero abatendekwa ku baamureebire naagyendera aha nyanja, baatiina munonga, baagira bati: N'omuzimu! Batyo baaborooga ahabw'okutiina. 27Ahonaaho Yesu yaabagambira ati: Muhuumure, niinye; mutatiina! 28Petero amugarukamu ati: Mukama wangye, ku oraabe ori iwe, ndagiira, ngyendere aha maizi, nkuhikye. 29Nawe amugira ati: Ija. Petero atyo aruga omu bwato, agyendesa amaguru aha maizi, aizira Yesu. 30Kwonka ku areeba omuyaga gwaba mwingi, atiina, atandika kumirwa, aborooga ati: Mukama wangye, njuna. 31Ahonaaho Yesu agorora omukono, amukwata, amugira ati: Iwe muntu w'okwikiriza kukye 'we, ahabw'enki waabangaanisa? 32Ku bahika omu bwato, omuyaga gutuuza. 33Abari omu bwato bamuramya nibagira bati: Buzimazima ori Omwana wa Ruhanga. 34Ku baaherize kwambuka, baahika seeri, Genesareeti. 35Abantu b'omuri ekyo kyanga ku baamumanyire, baatuma omuri egyo nsi yoona, baamureetera boona abarwaire; 36baamweshengyereza ngu nangwa bakore aha mukugiro gw'ekijwaro kye; haza boona abaagukozireho baakira.

will be added

X\