Matthew 13

1Eryo izooba Yesu akaruga omu nju, yaashohora, yaashutama aha rubaju rw'enyanja. 2Ebimbuuro bingi by'abantu byateeranira ahu ari, nawe nikwo kuza omu bwato akabushutamamu; reero ekimbuuro kyona kikeemerera aha nkungu. 3Atyo akabagambira bingi omu nfumu, naagira ati: Omubibi akashohora kubiba. 4Ku yaabaire naabiba, embibo ezimwe zaaragara aha rubaju rw'omuhanda, enyonyi zaija, zaazirya. 5Ezimwe zaagwa aha rukiri ahataine itaka ringi, ahonaaho zaamera ahabwa itaka kutaba ringi. 6Kwonka eizooba ku ryaturukire, zaababuka, kandi ahabw'okushangwa zitaine mizi, zaayoma. 7Ezindi mbimbo zaagwa omu mahwa; ago mahwa gaakura, gaazinyuruza. 8Ezindi zaagwa aha itaka rirungi, zaayera; ezimwe enjuma igana, ezindi makumi mukaaga, n'ezindi makumi ashatu. 9Oine amatu agarikuhurira, ahurire. 10Bwanyima abatendekwa baija, baabuuza Yesu bati: Ahabw'enki noobagambira omu nfumu? 11Yaabagarukamu ati: Imwe mukaheebwa okumanya amabanga g'obukama bw'Ow'omu iguru, kwonka bo tibarakihairwe. 12Manya oine, aryaheebwa ebirikukiraho; kwonka otaine, aryayakwa nangwa n'eki aine. 13Eki ndikubagambirira omu nfumu, n'ahabw'okuba bareeba, kwonka tibeetegyereza; bahurikiza, kwonka tibahurira kandi tibashoboorokyerwa. 14Buzimazima ekyo nikihikiiriza omuribo eki Isaaya yaarangire naagira ati: Okuhurira kwo muryahurira, kwonka timurishoboorokyerwa; okureeba kwo muryareeba, kwonka timuryetegyereza. 15Ahabw'okuba emitima y'ab'eihanga eri ebaire ebitsire, amatu gaabo nigahurira kubi, n'amaisho gaabo bagahumiize, ngu batakaahwezesa ago maisho gaabo, bakahuriza amatu gaabo, bakeetegyereseza emitima yaabo, bakampindukira, nkabakiza. 16Kwonka imwe muhiiriirwe ahabw'okuba amaisho gaanyu nigareeba, n'amatu gaanyu nigahurira. 17Buzimazima nimbagambira nti: Abarangi baingi n'abahikiriire baingi bakeetenga kureeba ebi murikureeba, kwonka tibarabireebire; n'okuhurira ebi murikuhurira, kwonka tibarabihuriire. 18Nimuhurire nu eby'enfumu y'omubibi. 19Omuntu weena ku ahurira ekigambo ky'obukama bwa Ruhanga ataakishoboorokyerwa, mpaho omubi aija ashahura ekyabibwa omu mutima gwe; ezo nizo mbibo ezaabibirwe aha rubaju rw'omuhanda. 20Ezaabibirwe aha itaka ry'aha rukiri, niwe ogwo ohurira ekigambo, akakiikiriza ahonaaho ashemereirwe; 21nobu aba ataine mizi, ayehangaana akaanya kakye; kwonka ku habaho enaku nari okuhiiganisibwa ahabw'ekyo kigambo, ahonaaho agwera kimwe. 22Ezaabibirwe omu mahwa, niwe ogwo ohurira ekigambo, kwonka okwemerereza omutima eby'ensi n'ebinuriirizi by'obutungi kunyuruza ekyo kigambo, kibura kwana. 23Ezaabibirwe aha itaka erirungi, niwe ogwo ohurira ekigambo, akakyetegyereza; haza akaana ebyana, omwe igana, ondi makumi mukaaga, n'ondi makumi ashatu. 24Kandi Yesu akabacwera endiijo nfumu ati: Obukama bw'Ow'omu iguru nibushushanisibwa n'omuntu owaabibire embibo nungi omu musiri gwe; 25kwonka abantu ku baabaire bagwejegyeire, omuzigu yaija, yaabiba enkyenzi omu ngano, haza yaayegyendera. 26Bwanyima embibo ku zaashebukire, zaaba obushiisha, enkyenzi nazo zaareebeka. 27Abakozi ba nyineeka baija, baamugira bati: Mukama waitu, beitu shi, torabibire embibo nungi omu musiri gwawe? Mbwenu gwihire hi enkyenzi? 28Abagira ati: Omuzigu niwe akikozire. Abo bakozi bamugira bati: Mbwenu shi, nooyenda ngu tugyende tuzomberemu? 29Kwonka we abagira ati: Ngaaha; mutakaaba nimuzomberamu, mukakuuriramu engano. 30Nimubirekye byombi bikure kumwe okuhitsya aha igyesha; reero omu igyesha ndyagambira abagyesi nti: Mubanze murundaane enkyenzi, muzikome enganda, zookibwe, haza engano muzihunikye omu kitara kyangye. 31Yesu akabacwera endiijo nfumu naagira ati: Obukama bw'Ow'omu iguru buri nk'enjuma y'embibo ya karidaari, ei omuntu yaatwaire akabiba omu kibanja kye: 32haza eri nkye okukira embibo zoona; kwonka ku ekura, ekira ebishaka byona, erugwamu omuti, enyonyi z'omu kaabunga ziija zaarika omu mataagi gaagwo. 33Yesu akabacwera endiijo nfumu ati: Obukama bw'Ow'omu iguru buri nk'ekitumbisa eki omukazi yaakwatsire, akakijwanzya omu ncuro ishatu z'esaano okuhitsya obu yoona yaatumbire. 34Ebyo byona Yesu akabigambira ebimbuuro by'abantu omu nfumu; kandi kwo tarabagambiire kintu kyona atakirabize mu nfumu. 35Ekyo kyaba eky'okuhikiiriza eki omurangi yaagambire ati: Ndyabacwera enfumu ningamba nabo, ngambe butunu ebyasherekirwe okwiha ensi yaaba kuhangwa. 36Bwanyima Yesu akaruga ahu ebimbuuro by'abantu byabaire biri, yaataaha omu nju. Abatendekwa be baamuhika, baamugira bati: Tushoboororere amakuru g'enfumu y'enkyenzi z'omu musiri. 37Yaabagarukamu ati: Obiba embibo nungi n'Omwana w'omuntu; 38omusiri niyo nsi, kandi embibo nungi nibo b'obukama; enkyenzi nibo b'omubi, 39reero omuzigu owaazibibire ni Sitaane; eigyesha nibwo bunaku obu ensi erihweraho, kandi abagyesi nibo baamaraika. 40Nk'oku enkyenzi zirundaanwa, zikookibwa, nikwo kiriba n'aha kuhwaho kw'ensi. 41Omwana w'omuntu aryatuma baamaraika be, baihe omu bukama bwe ebirikuteeza entsibo byona n'enkozi z'ebibi zoona; 42babinagye omu kikoomi ky'omuriro, ei abantu bariririra bakanena enshaya; 43reero abahikiriire bakengyengyeta nk'eizooba omu bukama bwa Ishebo. Oine amatu agarikuhurira, ahurire. 44Obukama bw'Ow'omu iguru buri nk'eky'obuguzi bwingi ekyasherekirwe omu musiri, eki omuntu yaagwireho akakishweka eitaka; mpaho ahabw'okushemererwa akagyenda, akatunda byona ebi aine, akagura ogwo musiri. 45Kandi obukama bw'Ow'omu iguru nibushusha nk'omushuubuzi orikusherura amahunde marungi, 46owaagwire ahari rimwe ery'obuguzi bwingi, akagyenda, akatunda byona ebi aine, akarigura. 47Obukama bw'Ow'omu iguru kandi buri nk'akatimba akaatambikirwe omu nyanja, kakakwata ebyenyanja ebya ibara muringo; 48ku kaijwire, abantu baakanyurura, baakahitsya aha nkungu, baashutama, baatooranamu ebirungi, baabita omu bitukuru, haza ebibi baabinaga. 49Nikwo kiriba kityo n'aha kuhwaho kw'ensi. Baamaraika baryaija, baihe enkozi z'ebibi omu bahikiriire, 50bazinagye omu kikoomi ky'omuriro ahu abantu bariririra bakanena enshaya. 51Bwanyima Yesu yaababuuza ati: Mbwenu ebyo byona mwabyetegyereza? Baamugarukamu bati: Eego. 52Nawe yaabagira ati: N'ahabw'ekyo omuhangu w'eiteeka weena, otendekirwe ahabw'obukama bw'Ow'omu iguru, ari nka nyineeka oiha omu ibiikiro rye ebisya n'ebikuru. 53Yesu ku yaaherize ezo nfumu, yaarugayo, 54yaaza omu kyanga ky'owaabo, yaabeegyeseza omu iteeraniro ryabo; baatangaara baagira bati: Beitu ogu muntu akaiha hi obu bwengye n'eby'amaani ebi arikukora? 55Ogu ti mutabani w'omubaizi? Nyina tiwe arikwetwa Mariya? N'abarumuna ti Yakobo na Yosefu na Simooni na Yuda? 56Na banyaanya boona tibari hamwe naitwe? Mbwenu ebyo byona, ogu muntu akabiiha hi? 57Batyo baamubangaanisa. Kwonka Yesu yaabagira ati: Omurangi ahandi hoona aheebwa ekitiinwa, kureka omu kyanga ky'owaabo n'omu ka ye. 58Kandi ahabw'okutaikiriza kwabo, tiyaakorerayo by'amaani bingi.

will be added

X\