Matthew 12

1Omu bunaku obwo Yesu, ku yaabaire naaraba omu misiri y'engano ahari Sabato, abatendekwa be baagira enjara, baatandika kucwa obushiisha bw'engano n'okuburya. 2Abafarisaayo ku baakireebire, baamugira bati: Reeba, abatendekwa baawe nibakora ekitarikwikirizibwa iteeka ahari Sabato. 3Nawe abagira ati: Beitu timukashomaga eki Daudi yaakozire, obu yaagira enjara n'abu yaabaire aine? 4Manya akataaha omu nju ya Ruhanga, yaarya emigaati etoijeirwe Ruhanga, eyaabaire neezire we n'abu yaabaire aine kugirya, kureka abahongyerezi bonka. 5Nari timukashomaga mu iteeka, oku ahari Sabato abahongyerezi bashiisha Sabato omuri Nyaruju, haza batagire rubanja? 6Kwonka nimbagambira ku aha hariho orikukira Nyaruju. 7Kandi kuri mwaba nimumanya amakuru g'ekirikugira kiti: Eki nyenda n'embabazi, ti bitambo, timwakusingisiriize bataine rubanja. 8Manya Omwana w'omuntu niwe mukama wa Sabato. 9Atyo Yesu yaarugayo, yaataaha omu iteeraniro ryabo. 10Haashangwa harimu omuntu okokootsire omukono. Baamubuuza bati: Nikiikirizibwa eiteeka okukiza omuntu ahari Sabato? Baamubuuza batyo, ngu babone kumutabaariza. 11Nawe yaababuuza ati: N'oha omuriimwe owaakuba aine entaama emwe, reero ekigwa omu iziba ahari Sabato, atagikwate akagiihamu? 12Mbwenu omuntu tarikukira munonga entaama? N'ahabw'ekyo nikiikirizibwa okukora eby'embabazi ahari Sabato. 13Atyo yaagira ogwo muntu ati: Gorora omukono gwawe. N'onu yaagugorora, gwakira, gwaba nk'ogundi. 14Kwonka Abafarisaayo baashohora, baahanuura oku baraamwite. 15Yesu ku akimanya, arugayo. Abantu baingi bamukuratira, haza abakiza boona, 16kwonka we, abeehanangiriza kutamubuzya mu bantu. 17Ekyo kihikiiriza ekyagambirwe omurangi Isaaya ati: 18Ogu n'omuheereza wangye, ou naatooraine, ou nkunda kandi ou nshemerererwa. Ndyamutamu Mutima wangye, amanyise Abanyamahanga eby'oburyo. 19Taritongana nobu kwakuba okuyomba, kandi tihariho orihurira eiraka rye omu nguuto. 20Orubingo oruhendekire tarirucwa, n'orumuri rurikwaka kubi tariruraaza, okuhitsya obu arisingura ahabw'okukora ebihikire. 21Kandi Abanyamahanga boona baryagira amatsiko omu iziina rye. 22Bwanyima bakareetera Yesu omuntu oriho ekyago, owaabaire ari empumi kandi ekiteta, yaamukiza; ogwo muntu yaahweza kandi yaagamba. 23Abantu boona baashoberwa, baagira bati: Beitu ogu t'akaaba Omwana wa Daudi? 24Kwonka Abafarisaayo ku baakihuriire, baagira bati: Manya ogu muntu taine kindi eki arikubingisa ebyago, kureka obushoboorozi bwa Beelizebuli omukuru waabyo bwonka. 25Yesu ku amanya ebiteekateeko byabo, abagira ati: Obugabe bwona obwebaganisamu, buba buri obw'okuhwerekyerera; kandi tihariho rurembo nari enju ebyebaganisamu bikagumaho. 26Manya Sitaane ku arikubinga Sitaane, biri ayebaganiisemu; mbwenu shi obwo, obugabe bwe buryagumaho buta? 27Ku ndaabe nimbingisa ebyago Beelizebuli, abaana baanyu bo nibagibingisa oha? N'ahabw'ekyo nibo baraabamare empaka. 28Kwonka ku ndaabe nimbingisa ebyago Mutima wa Ruhanga, biri obwo obukama bwa Ruhanga bubahikireho. 29Nari omuntu naabaasa ata kutaaha omu nju y'ow'amaani kunyaga ebintu bye atabandize kumukoma, haza akabona kwayira kimwe enju ye? 30Otakwatanisa naanye aba omuzigu wangye, kandi otataaruura naanye ataataanisa. 31N'ahabw'ekyo nimbagambira nti: Abantu baryasaasirwa ekibi kyona n'okurogota kwona, kwonka orirogota ahari Mutima tarisaasirwa, 32na weena origamba kubi aha Mwana w'omuntu, aryasaasirwa; kwonka origamba kubi ahari Mutima Orikwera, tarisaasirwa omu busingye obu n'omu busingye oburiija. 33Omuti ku orikuguhindura murungi, ebijuma byagwo nibiba birungi; nari omuti ku orikuguhindura mubi, n'ebijuma byagwo nibiba bibi; manya omuti gumanyirwa aha bijuma byagwo. 34Imwe baana b'empiri 'mwe, ebigambo byanyu nibibaasa bita kuba birungi, haza muri babi? Manya ebiijwire omutima, nibyo akanwa kagamba. 35Omuntu murungi aiha ebirungi aha birungi bye ebi abiikire, n'omuntu mubi ebibi abiiha aha bibi bye ebi abiikire. 36N'ahabw'ekyo nimbagambira nti: Aha kiro ky'okucweraho orubanja, abantu baryayetonganira buri kigambo kyona eki bagambira eryo. 37Manya ebigambo byawe nibyo birikwihisaho orubanja, kandi hoona nibyo birikureetera kusingwa orubanja. 38Bwanyima abamwe aha bahangu b'eiteeka n'Abafarisaayo baamugira bati: Mwegyesa, nitwenda otworekye akamanyiso. 39Nawe yaabagarukamu ati: Abantu b'obusingye obu, ababi kandi abarikuhampuka, nibenda akamanyiso; kwonka tihariho kamanyiso akaraaboorekwe, kureka aka Yona omurangi. 40Nk'oku Yona yaamazire amazooba ashatu n'ebiro bishatu omu nda y'ekyenyanja rwakaraara, n'Omwana w'omuntu nikwo arimara amazooba ashatu n'ebiro bishatu omu nda y'ensi. 41Aha kiro ky'okucweraho orubanja, aba Nineeve baryayemerera n'ab'obusingye obu, babasingise orubanja; ahabw'okuba Yona ku yaabarangiriire, baayegarukamu; kwonka reeba, aha hariho orikukira Yona. 42Aha kiro ky'okucweraho orubanja, omugabekazi w'omu bukiizi-bwa-buryo aryayemerera n'ab'obusingye obu, abasingise orubanja, ahabw'okuba we akaruga aha muheru gw'ensi, yaija kuhurira eby'obwengye bwa Solomooni; kandi reeba, aha hariho orikukira Solomooni. 43Ekyago, ku kiruga omu muntu, kizengyerera omu byanga bitarimu maizi nikisherura ah'okutuura. Ku hakiburira, 44kigira kiti: Ka ngarukye omwangye omu naarugire. Kwonka ku kihikamu, kyashanga egyo nju erimu busha, eyeyereirwe kandi etegwirwe, 45kityo kigyenda, kireeta ebindi byago mushanju ebibi okukikira. Mpaho bitaahamu, bigumamu; ogwo muntu omuheru gwe guba mubi okukira oku yaabaire ari obw'okubanza. Nikwo kiriba kityo n'aha b'obusingye obu obubi. 46Ku yaabaire naakigambira abantu, haija nyina n'abarumuna, baayemerera aheeru, nibenda kugamba nawe. 47Haabaho owaamugira ati: Reeba, nyoko na barumuna baawe beemereire aheeru, baine eki barikwenda kukugambira. 48Kwonka we agarukamu owaamugambira, ati: Maawe n'oha, na barumuna bangye ni baahi? 49Atyo agorora omukono agworekyeize abatendekwa be, agira ati: Maawe na barumuna bangye nibo aba! 50Ahabw'okuba weena okora ebi Tata ow'omu iguru akunda, niwe murumuna wangye, niwe munyaanyazi kandi niwe maawe.

will be added

X\