Matthew 10

1Yesu akeeta abatendekwa be ikumi na babiri, yaabaha obushoboorozi bw'okubinga ebyago n'okukiza endwara yoona n'obumuga bwona. 2Aga nigo maziina g'entumwa ikumi na ibiri: ow'okubanza ni Simooni oyetwa Petero, na Andereya omurumuna; Yakobo mwene Zebedaayo, na Yohaana omurumuna; 3Filipo na Baritolomaayo; Tomasi na Matayo omushorooza w'omushoro; Yakobo mwene Alufaayo, na Tadaayo; 4Simooni enkunzi y'eihanga, na Yuda owa Kariota, owaamureebize. 5Eikumi na babiri abo Yesu akabatuma naabaragiira ati: Mutariza ei Abanyamahanga bari, kandi mutaritaaha omu rurembo rwona orw'Abasamariya. 6Haakiri muze omu ntaama ezaabuzire ez'ab'omu ruganda rwa Isiraeli. 7Kandi ku muraabe nimugyenda, murangirire nimugira muti: Obukama bw'Ow'omu iguru buri haihi. 8Mukize abarwaire, muzoore abafiire, mushemeze ababembe, mubingye ebyago. Mukaheerwa busha, naimwe muheere busha. 9Mutaringyendana omu mifuko yaanyu ezaabu nari efeeza nainga omuringa; 10nobu yaakuba efurebe omu rugyendo rwanyu, nainga amakanzu abiri, nari enkaito nobu yaakuba enkoni; ahabw'okuba omukozi ashemereire kuheebwa eby'okumutunga. 11Ekirorero kyona nari ekyaro eki muraazemu, mubanze mubuuririze omuntu waamwo oshemereire, mumuraarire okuhitsya obu murirugayo. 12Ku muraataahe omu nju, mugire muti: Nimukagire obusingye! 13Abantu b'omuri egyo nju ku baraabaakiire, endamutsyo yaanyu y'okubendeza obusingye ebagumeho. Kwonka ku baraayangye kubaakiira, egyo ndamutsyo yaanyu mugigarukane. 14Omuntu weena oraayangye kubaakiira, nari yaayanga kuhurira ebi murikugamba, ku muriba nimuruga omuri egyo nju nari ekirorero, mukunkumure omucuucu gw'aha bigyere byanyu. 15Buzimazima nimbagambira nti: Aha kiro ky'okucweraho orubanja, ekifubiro kya Sodoma na Gomora kiryayemerwa okukira eky'ekyo kirorero. 16Reeba, nimbatuma muri nk'entaama eziri ahagati y'emishega; n'ahabw'ekyo mube enyabwengye nk'enjoka, n'abataine kabi nk'enkombe. 17Mwerinde abantu, ahabw'okuba baryabahayo omu mashengyero, babaasire omu mateeraniro gaabo, 18babakurubanire omu maisho g'abategyeki abakuru n'ag'abagabe nibabantura, mubone kuba baakareebi aharibo n'aha Banyamahanga. 19Ku baribahayo, mutaryemereza omutima oku muryetonganira n'eki murigamba, ahabw'okuba muryaheebwa eki murigamba omuri ako kaanya. 20Manya tiimwe murigamba, kureka Mutima wa Shoimwe niwe aribagambisa. 21Mukuru w'omuntu aryahayo omurumuna kwitwa, na ishe w'omwana aheyo omwana we; kandi abaana baryaimukiiriza abazaire baabo, babaitise; 22naimwe muryayangwa boona ahabwangye. Kwonka origumisiriza akahika aha muheru, niwe arijunwa. 23Mbwenu ku baribahiiganisiza omu kirorero kimwe, muhungire omu kindi; buzimazima nimbagambira nti: Timuribuga birorero bya Isiraeli byona Omwana w'omuntu atakaizire. 24Manya omutendekwa takira mwegyesa we, n'omuhuuku takira mukama we. 25Kikaananura omutendekwa yaaba nk'omwegyesa we, n'omuhuuku yaaba nka mukama we. Nyineeka ku baraabe bamweetsire Beelizebuli, ab'eka ye baryashura ki! 26N'ahabw'ekyo mutaribatiina; ahabw'okuba tihariho kishwekirwe ekitarishuuruurwa, nari ekisherekirwe ekitarimanywa. 27Eki ndibagambirira omu mubonano mukigambire aharikuhweza; eki murikuhurira nibagambirana omu kutu, mukigambire aha mutwe gw'enju. 28Kandi murekye kutiina abarikwita omubiri, kwonka batarikubaasa kwita magara g'omutima. Haakiri mutiine Ogwo orikubaasa kucwekyereza byombi, amagara g'omutima n'omubiri okuzimu omu muriro. 29Hari ebiteerankumba bibiri tibigura sente emwe? kwonka tihariho kimwe aharibyo ekigwa ahansi Shoimwe atenzire. 30Nangwa n'eishokye ry'aha mutwe gwanyu ryona rikabarwa. 31Mbwenu nu, mutatiina; muri ab'obuguzi okukira ebiteerankumba bingi. 32N'ahabw'ekyo weena orikuunyemera omu maisho g'abantu, naanye ndyamwemera omu maisho ga Tata ow'omu iguru; 33kwonka weena orikuunyoga omu maisho g'abantu, naanye ndyamwogyera omu maisho ga Tata ow'omu iguru. 34Mutateekateeka ngu nkaija kureeta obusingye omu nsi; tindaizire kureeta busingye, kureka rurara. 35Manya nkaija kureetera omwojo kurwanisa ishe, omwishiki kurwanisa nyina, omukaamwana kurwanisa nyinazaara; 36ahabw'okuba abazigu b'omuntu baryaba ab'omu ka ye. 37Okunda ishe nari nyina kubankiza, tanshemereire; n'ogwo okunda omutabani nari omuhara kubankiza, tanshemereire; 38kandi otakiriza musharaba gwe akankurata, tanshemereire. 39Weena okiza amagara ge, aryagafeerwa, kandi weena ohayo amagara ge ahabwangye, aryagagarurirwa. 40Weena obaakiira, biri niinye ayakiire; kandi weena onyakiira, biri ayakiire owantumire. 41Weena oyakiira omurangi ngu ahabw'okuba n'omurangi, aryaheebwa ebihembo by'omurangi; kandi oyakiira omuntu ohikiriire ahabw'okuba ngu n'ohikiriire, aryaheebwa ebihembo by'ohikiriire. 42Na weena orikuha omwe ahari aba abato, nobu kyakuba ekikopo ky'amaizi garikufuka, ngu ahabw'okuba nankuratira, buzimazima nimbagambira nti: Taribura kihembo kye.

will be added

X\