Mark 9

1Kandi yaabagira ati: Buzimazima nimbagambira nti: Hariho abeemereire aha, abatarihikwaho kufa batakareebire bukama bwa Ruhanga nibwija n'obushoboorozi. 2Ku haahingwireho ebiro mukaaga, Yesu yaatwara Petero na Yakobo na Yohaana, yaabatembya orushozi ruraingwa kwehereera; reero yaahinduka okundi omu maisho gaabo; 3ebijwaro bye byayera nibimurinkana okukira oku omwozya w'emyenda weena omu nsi yaakubaasize kubyeza. 4Kandi Eliya na Musa baababonekyera, nibagaaniira na Yesu. 5Petero nikwo kugambira Yesu ati: Mwegyesa, ka ni kirungi itwe okushangwa turi aha; mbwenu ka twombekye obuju bushatu: kamwe kabe akaawe, akandi kabe aka Musa, n'akandi aka Eliya. 6Obwo akaba atarikumanya ki arikugamba, ahabw'okuba bakaba batiinire munonga. 7Mpaho ekicu kyaija, kyabasangira, kandi eiraka ryayema omuri ekyo kicu, ryagira riti: Ogu n'Omwana wangye ou nkunda; mumuhurire. 8Ahonaaho ku baamagamagire, tibaareeba muntu ondi weena, kureka Yesu wenka. 9Ku baabaire nibashuuma, nibaruga aha rushozi, Yesu yaabeehanangiriza kutagambira muntu weena ebi baareeba, okuhitsya obu Omwana w'omuntu arizooka omu bafiire. 10Nabo ekyo baakyerinda, baayebuuza eki okuzooka omu bafiire kurikumanyisa. 11Baarugaho baamubuuza bati: Ahabw'enki abahangu b'eiteeka bagira ngu, Eliya niwe w'okubanza kwija? 12Yaabagarukamu ati: N'eky'amazima; Eliya n'ow'okubanza kwija, akagarura ebintu byona omu buteeka; kwonka shi ahabw'enki kyahandiikirwe aha Mwana w'omuntu, ngu aryabonabonesibwa munonga, kandi agaywe? 13Kwonka ka mbagambire ku Eliya araherize kwija, kandi ku baamutwarize oku baayenzire, nk'oku Ebyahandiikirwe byamugambireho. 14Ku baagarukire, baahika abandi batendekwa, baareeba ekimbuuro ky'abantu baingi kibashagatiire, n'abahangu b'eiteeka bamwe nibabahakanisa. 15Ahonaaho ekimbuuro ky'abantu kyona ku kyamureebire kiti, kyatangaara munonga, kyairuka nikimwizira kumutangirira. 16Nawe nikwo kubabuuza ati: Mwaba nimuhakana ki nabo? 17Omwe ahari abo bantu yaamugarukamu ati: Mwegyesa, naakureetera mutabani wangye ngugu, ariho ekyago ekimureeteire kuba ekiteta. 18Ku kirikumukwata, kimutuura ahansi; areeta eifuro omu kanwa, anena amaino, agangaara; mbwenu ku nshabire abatendekwa baawe kukibinga, baaremwa. 19Yesu omu kubagarukamu, yaabagira ati: Imwe ab'obusingye obutarikwikiriza; ndyahitsya hi okuguma naimwe? Ndyahitsya hi okubagumisiririza? Nimumundeetere. 20Batyo baamumureetera. Ahonaaho ekyago ku kyareebire Yesu, kyasikankura ogwo mwojo, yaagwa ahansi, yaagumaho naayekuringa, eifuro nirimureetwa omu kanwa. 21Yesu yaabuuza ishe ati: Amazire mwanya ki akwatsirwe? Onu ati: Okwiha omu buto; 22kandi kaingi kimunaga omu muriro n'omu maizi, ngu kimwite. Mbwenu ku oraabe oine eki orikubaasa kukora, tugirire embabazi, otuhwere. 23Yesu amugarukamu ati: Ku oraabe noobaasa? Manya byona bibaasikira oine okwikiriza. 24Ahonaaho ishe w'omwana agamba n'eiraka rihango ati: Eego, niinyikiriza, mbwenu ntambira okutaikiriza kwangye! 25Yesu, ku areeba abantu baingi nibamumiganiraho, akabukira ekyo kyago, ati: Iwe kyago 'we ekifamatu kandi ekiteta, ninkuragiira omurugyeho, otamugarukaho obundi. 26Mpaho kimusikankura kubi munonga, kimurugaho nikiborooga; omwojo ashusha nk'ofiire; baingi bagira ngu yaafa. 27Kwonka Yesu amukwata omukono, amwimutsya; onu ayemerera. 28Yesu ku yaataahire omu nju, abatendekwa be baamubuuza mpora, bati: Ahabw'enki itwe turemirwe kukibinga? 29Yaabagarukamu ati: Manya eky'omuringo nk'ogwo tikibingwa kindi, kureka okushaba n'okwesiibyakwo. 30Ku baarugire aho, baagyenda nibaraba omuri Galilaaya. Yesu tiyaayenda muntu weena ku akimanya, 31ahabw'okuba akaba naayegyesa abatendekwa be, naabagambira ati: Omwana w'omuntu naija kurekurirwa abantu, bamwite; haza ku haraahingureho ebiro bishatu aitsirwe, azookye omu bafiire. 32Kwonka bo eki yaabagambiire tibarakyetegyereize, kandi baatiina kukimubuuza. 33Bwanyima bakahika Kafarinaumu. Yesu ku yaabaire ari omu nju, yaababuuza ati: Ekintu eki mwaba nimuhakanaho omu muhanda, ni ki? 34Kwonka baahunama, ahabw'okuba bakaba nibahakana bonka, ngu omukuru omuribo n'oha? 35Nawe nikwo kushutama, akeeta eikumi na babiri kwija ahu ari, akabagira ati: Omuntu weena orikwenda kuba ow'okubanza, abe niwe yaaba ow'aha muheru, kandi abe omuheereza wa boona. 36Atyo akwata omwana muto, amuta ahagati yaabo, amukiikira, abagira ati: 37Weena oyakiira omu iziina ryangye omwe aha baana bato nk'ogu, biri niinye ayakiire; kandi weena onyakiira, biri tiinye aba ayakiire, kureka ogwo owantumire. 38Yohaana akamugira ati: Mwegyesa, tureebire omuntu naabinga ebyago omu iziina ryawe; twamuzibira ahabw'okuba tarikutukuratira. 39kwonka yaagira ati: Murekye kumuzibira; ahabw'okuba tihariho muntu n'omwe okora eby'amahano omu iziina ryangye, kandi akangambaho kubi. 40Manya weena otarikuturwanisa, biri n'ow'ab'orubaju rwaitu. 41Weena orikubaha ekikopo ky'amaizi g'okunywa ahabw'okuba muri aba Kristo, buzimazima nimbagambira nti: Tariburira kimwe kihembo kye. 42Kwonka weena orikuteeza entsibo omwe aha baana aba abato barikuunyikiriza, akabagwisa, haakiri abohwe orubengo omu maraka, anagwe omu nyanja. 43Kandi omukono gwawe ku guraabe nigukureetera kukora ekibi, gutemeho; haakiri iwe okutaaha omu magara agatahwaho ori ekimuga, okukira okugira emikono yombi okagyenda nayo okuzimu omu muriro ogutaraara. 44Niyo enyogori z'abaayo zitafa, n'omuriro gwayo gutaraara. 45Ekigyere kyawe ku kiraabe nikikureetera kukora ekibi, kitemeho; haakiri iwe okutaaha omu magara agatahwaho ori ekirema, okukira okugira ebigyere byombi okanagwa nabyo okuzimu omu muriro. 46[Niyo enyogori z'abaayo zitafa, n'ei omuriro gwayo gutaraara.] 47Kandi eriisho ryawe ku riraabe nirikureetera kukora ekibi, riihemu; haakiri iwe okutaaha omu bukama bwa Ruhanga oine eriisho rimwe, okukira okugira amaisho gombi okanagwa nago okuzimu omu muriro, 48ei enyogori z'abaayo zitafa, n'ei omuriro gwayo gutaraara. 49Buri muntu aryateebwamu omuriro nk'oku bata omwonyo omu byokurya. 50Omwonyo guba murungi; beitu ku gwakuhwamu ensha, okaagigaruramu ota? Mwerungyemu omwonyo, kandi mugirirane obusingye.

will be added

X\