Mark 8

1Omu biro ebyo ekimbuuro ky'abantu kikagaruka kyateerana, kwonka baabura ekyokurya. Yesu yaayeta abatendekwa be, yaabagira ati: 2Eki kimbuuro ky'abantu ka kyanyitsa esaasi, ahabw'okuba bamazire naanye ebiro bishatu bataine ki barikurya. 3Ku ndaboohereze owaabo n'enjara, nibaija kugwera enshazi omu muhanda; kandi abamwe omuribo barugire hare munonga. 4Abatendekwa be baamugarukamu bati: N'oha owaakubaasa kutunga ebyokurya by'okuriisa aba bantu omu ihamba nk'eri? 5Nawe nikwo kubabuuza ati: Mwineho emigaati engahi? Banu bati: Ni mushanju. 6Atyo aragiira ekyo kimbuuro ky'abantu kushutama ahansi; akwata egyo migaati mushanju; ku aheza kusiima, agicwamu ebicweka, agiha abatendekwa be kugigabura; nabo bagigaburira abo bantu. 7Kandi bakaba baineho obwenyanja bukye; ku aheza kubuha omugisha, nabwo abaragiira kubugabura. 8Barya, baiguta; bwanyima barundaana oburagarika obwatsigaraho, bwijuza ebitenga mushanju. 9Obwo bakaba bari abantu nk'enkumi ina. 10Mpaho aboohereza; kandi nawe tahwama, atemba omu bwato n'abatendekwa be, baza omu nsi ya Dalumanuta. 11Abafarisaayo bakaija, baatandika kuhakana na Yesu nibamushaba akamanyiso karikuruga ahari Ruhanga nibamutega. 12Atyo atsinda munonga, abagira ati: Ahabw'enki ab'obusingye obu nibenda akamanyiso? Buzimazima nimbagambira nti: Ab'obusingye obu tibarikwija kworekwa kamanyiso na kamwe. 13Reero abatsigaho, agaruka atemba obwato, ayambuka seeri. 14Mbwenu abatendekwa obwo bakaba beebirwe kutwara entanda, kureka omu bwato bakaba bainemu omugaati gumwe gwonka. 15Yesu yaabeehanangiriza ati: Nyaabura 'mwe, muteho omutima, mwerinde ekitumbisa ky'Abafarisaayo n'ekya Herode. 16Baagambirana bonka bati: Titwine mugaati. 17Yesu ku yaakimanyire, yaababuuza ati: Ahabw'enki nimugaaniira eky'okutagira mugaati? Biri kwo timukeetegyereize nobu kwakuba okukyenga? Emitima yaanyu ekigangaire? 18Ka mwine amaisho, ahanki mutarikureeba? Ka mwine amatu, ahanki mutarikuhurira? Nari shi, timurikwijuka? 19Obu naacwamu emigaati etaano nkagigaburira abantu enkumi itaano, obwo mukarundaana oburagarika bwijwire ebitenga bingahi? Bagarukamu bati: Ikumi na bibiri. 20Kandi shi, obu naacwamu emigaati mushanju nkagigaburira abantu enkumi ina, obwo mukarundaana oburagarika bwijwire ebitenga bingahi? Bagarukamu bati: Mushanju. 21Arugaho ababuuza ati: Na hati timukeetegyereize? 22Bakahika Beetisaida; abantu baareetera Yesu omushaija ohumire, baamushaba kumukoraho. 23Yaakwata egyo mpumi omukono, yaagitwara aheeru y'ekyaro; ku yaamusiigire amacwante omu maisho, yaamutaho engaro, yaamubuuza ati: Oine eki orikureeba? 24Ogwo mushaija yaabuuruura, yaagarukamu ati: Nindeeba abantu barikushusha emiti, nibagyenda. 25Atyo agaruka amuta engaro aha maisho ge; onu ahweza gye, akira, areebera kimwe ebintu byona. 26Yesu amwohereza kutaaha owaabo, amugira ati: Nangwa n'omuri eki kyaro otazamu. 27Yesu akarugayo n'abatendekwa be, yaaza omu byaro by'omuri Kaisaariya-Filipi. Ku baabaire nibagyenda, yaabuuza abatendekwa be ati: Beitu abantu baanyeta oha? 28Baamugarukamu bati: Abamwe nibagira ngu ori Yohaana Omubatizi, abandi ngu Eliya n'abandi ngu ori omwe aha barangi aba ira. 29Ayongyera kubabuuza ati: Kwonka shi imwe, nimugira ngu ndi oha? Petero amugarukamu ati: Ori Kristo. 30Atyo Abeehanangiririza kimwe okutagira muntu weena ou baamumugambira. 31Yesu atandika kubeegyesa ku Omwana w'omuntu ari ow'okubonabonesibwa munonga, akoogwa abakuru omu ihanga n'abahongyerezi abakuru n'abahangu b'eiteeka, akaitwa, kwonka hakihwaho ebiro bishatu akazooka. 32Ebyo byona akabigamba butunu. Bwanyima Petero yaamuta hangahari, yaatandika kumuhana. 33Kwonka Yesu ku yaahindukire, yaareeba abatendekwa be, yaakabukira Petero ati: Iwe Sitaane 'we, ngaruka enyima; ahabw'okuba ebi orikuteekateeka ti bya Ruhanga, kureka n'eby'abantu. 34Yesu akeeta ekimbuuro ky'abantu hamwe n'abatendekwa be, yaabagira ati: Omuntu weena orikwenda kunkuratira, ayeyogye, ayekorere omusharaba gwe, ankuratire. 35Ahabw'okuba weena orikwenda kukiza amagara ge, aryagafeerwa; kandi weena orihayo amagara ge ahabwangye n'ahabw'Amakuru Marungi, aryagagarurirwa. 36Mbwenu omuntu nikimugasira ki kukubuura ensi yoona, haza akafeerwa amagara ge? 37Kandi buzimazima, omuntu akaahayo kintu ki kucungura amagara ge? 38Manya omuntu weena oriitwa enshoni ahabwangye n'ahabw'ebigambo byangye omu b'obusingye obu abarikuhampuka kandi abarikukora ebibi, Omwana w'omuntu nawe ku ariija aine ekitiinisa kya Ishe, ashagatiirwe baamaraika abarikwera, nikwo arimutwaza.

will be added

X\