Mark 7

1Abafarisaayo n'abahangu b'eiteeka abamwe abaabaire barugire Yerusalemu, bakateeranira ahu ari; 2baareeba bamwe aha batendekwa be nibariisa engaro ziteeziibwe, nikwo kugira ngu ezihagaire. 3Ahabw'okuba okwihirira omu micwe ya baishenkurubo, Abafarisaayo n'Abayudaaya boona bakaba batarya bateerize ngaro; 4kandi ku baabaire baruga omu katare, bakaba batarya batabandize kwejabika omu maizi. Bakaba bagira n'endi migyenzo y'akarande, ekwatiraine n'okwozya ebikopo n'enyungu n'eshuhaani z'omuringa. 5Nikyo Abafarisaayo n'abahangu b'eiteeka baamubuuriize bati: Ahabw'enki abatendekwa baawe batarikukuratira mugyenzo gw'aba ira, nibariisa engaro ziteeziibwe? 6Yaabagarukamu ati: Imwe ndyarya 'mwe, ebishi, Isaaya akahika obu yaabarangaho omu kyahandiikirwe eki, ati: Ab'eihanga eri bampaisisa ekitiinwa eminwa yaabo, haza emitima yaabo endi hare. 7Bandamiza busha, ahabw'okuba beegyesa ebyatairweho abantu, oti n'enyegyesa y'ebyatairweho Ruhanga. 8Manya mwitwa okwehuzya ebiragiro bya Ruhanga, mukahamira aha by'emigyenzo y'abantu. 9Yesu yaayongyera yaabagira ati: Ka mwine obwengye bw'okwangiramu ebiragiro bya Ruhanga, ngu mubone kugumyaho eby'emigyenzo yaanyu! 10Ahabw'okuba Musa akagira ati: Otiine shoimwe na nyoko; kandi ati: Weena orijuma ishe nari nyina, aitwe. 11Kwonka imwe mugira muti: Omuntu ku arikugira ishe nari nyina ati: Eki naakukuhaire kukugasira ni Koribaani, amakuru ngu, ekitoijeirwe Ruhanga; 12biri obwo muba mutakimwikiriza kugira eki yaakorera ishe nari nyina. 13Mutyo muhindura busha eki Ruhanga yaagambire ahabw'emigyenzo yaanyu y'akarande; kandi n'ebindi bingi nikwo mubitwaza. 14Kandi Yesu akagaruka yaayeeta abantu, yaabagira ati: Mwena nimuntegye amatu, kandi mwetegyereze. 15Tihariho kiruga aheeru y'omuntu, kikamutaahamu, kikamuhagaza; kureka ekimurugamu nikyo kimuhagaza. 16[Oine amatu agarikuhurira, ahurire!] 17Ku yaarugire omu bantu, yaagaruka omu nju; abatendekwa be baamubuuza eby'egyo nfumu. 18Yaabagarukamu ati: Biri naimwe timukeetegyereize? Timurikumanya ku ekitaaha omu muntu kirugire aheeru kitamuhagaza, 19ahabw'okuba tikiza mu mutima gwe, kureka omunda, haza kikoogamu? Akagamba atyo, naahamya ku ebyokurya byona biba birungi. 20Yaagumizamu ati: Manya ekiruga omu muntu nikyo kimuhagaza; 21ahabw'okuba omu mitima y'abantu nimwo haruga ebiteekateeko bibi, obushambani bw'abatashweire n'abatashweirwe, okwiba, okwita omuntu, okushambana na muka nanka nari na iba nanka; 22omururu, eitima, obugobya, ebikwatiraine n'obushambani, eihari, okubeiherera ondi, amaryo n'obufamutima. 23Ebyo bibi byona nibyo biruga omunda, bikashiisha omuntu. 24Yesu akaimuka, yaarugayo, yaaza omu kyanga ekiherereire Tuuro. Ku yaahikireyo, yaataaha omu nju, atarikwenda ngu bamanye ahu ari, kwonka shi tarabaasize kuhingura atamanyirwe. 25Omukazi owaabaire aine akahara kariho ekyago, ku yaamuhuriire ati, yaija, yaamukwata amaguru. 26Ogwo mukazi akaba ari Omuguriiki, enzaarwa ya Sirofenikiya. Yaamweshengyereza ku amubingira ekyago aha muhara. 27Na Yesu yaamugira ati: Okaarekire abaana baba nibo baabanza kugaburirwa; ahabw'okuba tikihikire kukiriza ebyokurya by'abaana, okabitambikira embwa. 28Ogwo mukazi yaamugarukamu ati: Eego, Mukama wangye; kwonka embwa ezibunzire omunda y'emeeza, zirya oburagarika bw'ebyokurya by'abaana. 29Yesu yaamugira ati: Ahabw'ekyo eki waagamba, yetaahire oshemereirwe; muhara waawe yaarugwaho ekyago. 30Ogwo mukazi atyo agaruka omuka, ashanga omwana abyami aha kitanda, ekyago kyamurugireho. 31Bwanyima Yesu akagaruka naaruga omu nsi ya Tuuro, yaatoora ogwa Sidoni, yaahika aha Nyanja ya Galilaaya naaraba omu kyanga kya Dekapoli. 32Okwo niyo baamureeteire omushaija ekifamatu orikuhebebera; bakamweshengyereza ku amutaho engaro. 33Yaamwiha omu kimbuuro ky'abantu, yaamwekiikana, yaamuta enkumu omu matu, yaamusiiga amacwante aha rurimi; 34yaareeba ahaiguru, yaatsinda, yaamugira ati: Efata, ekirikumanyisa ngu, Iguka! 35Amatu ge gatyo gaiguka, n'akareka k'orurimi rwe kaarekuka, yaagamba gye. 36Kandi Yesu yaabaragiira kutagira u baakigambira; kwonka ei yaagarukiire kubazibira, niyo baagarukiire kukibuzya. 37Baatangaara munonga, nibagira bati: Byona naabikora gye; naahuriza ebifamatu, kandi naagambisa ebiteta!

will be added

X\