Mark 5

1Batyo baayambuka enyanja, baahika seeri omu nsi y'Abageraseene. 2Yesu ku yaabaire yaaruga ati omu bwato, omushaija oriho ekyago yaamwizira naaruga omu bituuro. 3Ogwo mushaija akaba atuura omu bituuro, hatakiriho muntu weena orikubaasa kumurinda, nobu kwakuba okumubohesa orujegyere. 4Manya kaingi bakaba baamuboheise emihama n'enjegyere; kwonka ezo njegyere azigutura, n'emihama agicwa; kandi hakaba hatariho muntu weena orikubaasa kumucureeza. 5Obutoosha nyomushana na nyekiro akaba aborooga, ayeshaza amabaare, obwo ari omu bituuro n'omu nshozi. 6Ku yaareebeire Yesu hare, yairuka yaayerambika omu maisho ge, 7yaaborooga n'eiraka rihango ati: Noofa ki naanye, iwe Yesu Omwana wa Ruhanga Rukiraboona? Ninkurahiza Ruhanga, otaanyita kubi! 8Ahabw'okuba Yesu akaba yaaheza kukigira ati: Iwe kyago 'we, ruga ahari ogu muntu! 9Yesu nikwo kukibuuza ati: Eiziina ryawe ori oha? Nakyo kimugarukamu kiti: Eiziina ryangye ndi Eihe, ahabw'okuba turi baingi. 10Mpaho yaamweshengyereza munonga okutabibinga muri ekyo kyanga. 11Obwo hakaba hariho omukumbi muhango gw'empunu niguriira omu rukiizi; 12ebyo byago byamweshengyereza biti: Twohereze omuri ezo mpunu, tube nizo twazamu. 13Atyo Yesu abiikiriza. Ebyo byago bimurugaho, bitaaha omu mpunu. Omukumbi gwazo, ogurikuhika empunu nk'enkumi ibiri, guhiringitira aha nengo, gugwa omu nyanja, gurohama. 14Abariisa b'ezo mpunu baahunga, baabiteekyerereza ab'omuri ekyo kirorero n'ab'omu byaro; abantu baahurura kureeba ebyabaho. 15Ku baahikire ahari Yesu, baashanga ogwo muntu waarugwaho ekyago ari aho ashutami, ajwaire, aine obwengye, kandi ari ori, owaabaire ariho eryo ihe; baatiina munonga. 16Abaabireebire, ku baabateekyerereize ebyaba ahari ogwo muntu w'ebyago, n'oku ezo mpunu zaaba, 17baayeshengyereza Yesu kubarugira omu kyanga. 18Ku yaabaire naaza omu bwato, omushaija owaabaire ariho ebyago yaamushaba ku amwikiriza kuguma nawe. 19Yesu yaamwangira; kureka yaamugira ati: Irooko otaahe omuka omu baanyu, obagambire byona ebi Mukama akukoreire ahabw'embabazi ze. 20Ogwo mushaija atyo agyenda, atandika kubuzya omuri Dekapoli byona ebi Yesu amukoreire; abantu boona batangaara. 21Yesu, ku yaayambukire omu bwato, yaahika seeri. Ekimbuuro ky'abantu baingi baamuteeraniraho; yaaguma aha rubaju rw'enyanja. 22Mpaho haija omwe aha bakuru b'eiteeraniro, orikwetwa Yairo. Ku yaamuhikire, yaamukwata amaguru; 23yaamweshengyereza, naamugira ati: Kahara kangye n'ak'okufa. Ija okanteereho engaro, kakire, kagire amagara. 24Mpaho Yesu yaagyenda nawe. Abantu baingi baamukuratira nibamumiganiraho. 25Kandi hakaba hariho omukazi owaabaire arwariire ekyejwiso emyaka ikumi n'ebiri; 26amazire omwanya muhango naashaasha, naaraguza aha bafumu baingi, aherize ebye byona, kwonka ataine muraaro, kureka okwongyera kuba kubi. 27Akaba yaahuriire eby'enkuru ya Yesu, yaija naayogyerera omu bantu enyima ye, yaakora aha kijwaro kye; 28ahabw'okuba akateekateeka omu mutima gwe ati: Ku naakukora nangwa aha bijwaro bye, nkaakira. 29Omuri ako kaanya ekyejwiso kye kyayoma; yaayehurira akiriire kimwe endwara ye. 30Yesu, ku yaahuriire ati amaani gaamurugamu, yaahindukira ahagati y'ekimbuuro ky'abantu yaabuuza ati: N'oha owaakora aha bijwaro byangye? 31Abatendekwa be baamugarukamu bati: Nooreeba ekimbuuro ky'abantu nikikumiganiraho, haza ogira oti: N'oha owankoraho? 32Kwonka we yaagumizamu naamagamaga kureeba owaakikora. 33Omukazi, ahabw'okumanya ekyamubaho, yaija atiinire kandi naatetema, yaamujuumara omu maisho, yaamugambira amazima ataine ki arikumushereka. 34Onu yaamugira ati: Mwana wangye, okwikiriza kwawe nikwo kwakukiza, gyenda n'obusingye, okire endwara yaawe. 35Ku yaabaire naakigamba ebyo, haija abantu abarikuruga ow'ogwo mukuru w'eiteeraniro, baamubikira bati: Muhara waawe yaafa. Mbwenu Omwegyesa nookimuruhiza ki? 36Yesu ekyo tiyaakyetaho, yaagambira ogwo mukuru w'eiteeraniro ati: Otatiina, fa okwikiriza. 37Kandi tiyaikiriza muntu weena kugyenda nawe, kureka Petero na Yakobo na Yohaana murumuna wa Yakobo. 38Ku baahikire aha nju y'ogwo mukuru, Yesu yaareeba oku abantu barikurabanamu nibacura, nibaborooga munonga. 39Yaataahamu, yaabagira ati: Nimurabaniramu ki, kandi nimurizibwa ki? Omwana tafiire, agwejegyeire. 40Batyo baamushekyerera. Atyo boona abashohoza, aguma na ishe w'omwana na nyina n'abu yaija nabo, aza ahu omwana abyami. 41Amukwata omukono, amugira ati Tarita kumi; amakuru ngu Kaishiki 'we, ninkugambira nti: Imuka. 42Ogwo mwishiki aimuka ahonaaho, atandika kugyenda; haza akaba aine emyaka ikumi n'ebiri y'obukuru. Ku baareebire ekyo, engaro baazita aha munwa. 43Yaabeehanangiririza kimwe okutagira muntu weena ou baakigambira, kandi yaabaragiira ku bamuha ekyokurya.

will be added

X\