Mark 4

1Yesu kandi akatandika kwegyeseza aha rubaju rw'enyanja. Ekimbuuro kihango ky'abantu kyateeranira ahu ari, nawe nikwo kuza omu bwato akabushutamamu buri omu nyanja; obwo ekimbuuro kyona kiri aha nkungu aha rubaju rw'enyanja. 2Yaabeegyesa bingi naabacwera enfumu; kandi omuri okwo kwegyesa, yaabagira ati: 3Nimutegye amatu! Omubibi akashohora kubiba. 4Ku yaabaire naabiba, embibo ezimwe zaaragara aha rubaju rw'omuhanda; enyonyi zaija zaazirya. 5Ezimwe zaagwa aha itaka ry'aha rukiri, ahataine itaka ringi; zaamera ahonaaho ahabw'okutagira itaka ringi. 6Kwonka eizooba ku ryaturukire, zaababuka, kandi n'ahabw'okushangwa zitaine mizi, zaayoma. 7Ezindi mbimbo zaagwa omu mahwa; ago mahwa gaakura, gaazinyuruza, tizaayera. 8Kandi ezindi zaagwa aha itaka rirungi; zaamera, zaakura gye, zaayera; emwe yaahitsya enjuma makumi ashatu, endi makumi mukaaga, n'endiijo igana. 9Mpaho yaabagira ati: Oine amatu agarikuhurira, ahurire. 10Yesu ku yaabaire ari wenka, eikumi na babiri hamwe n'abandi abaabaire bagyenda nawe, baamubuuza amakuru g'ezo nfumu. 11Yaabagira ati: Manya imwe mukaatirwa eibanga ry'obukama bwa Ruhanga, kwonka ab'aheeru byona babigambirwa omu nfumu, 12ngu okureeba kwo bareebe, kwonka bateetegyereza; n'okuhurikiza kwo bahurikize, kwonka batashoboorokyerwa, ngu batakaahinduka bakasaasirwa. 13Atyo Yesu abagira ati: Ebyo egi nfumu timwagyetegyereza? Mbwenu shi, ezindi nfumu muryazimanya muta? 14Eki omubibi abiba n'ekigambo kya Ruhanga. 15Ez'aha rubaju rw'omuhanda, ahu ekigambo kibibwa, nibo bantu abaheza bati kukihurira, Sitaane akaija, akabaihamu ekyo kigambo kyababibwamu. 16N'ezaabibirwe aha itaka ry'aha rukiri, nibo bantu abahurira ekyo kigambo, bakakiikiriza ahonaaho bashemereirwe; 17nobu baba bataine mizi, beehangaana akaanya kakye. Kwonka ku habaho enaku, nari okuhiiganisibwa ahabw'ekyo kigambo, ahonaaho bagwera kimwe. 18Kandi ezaabibirwe omu mahwa, nibo abo abahurira ekigambo, 19kwonka okwemerereza omutima eby'ensi, obutungi, n'okururuuhira ebindi bintu, binyuruza ekyo kigambo, kibura kwana. 20Reero ezaabibirwe aha itaka erirungi, nibo abo abahurira ekigambo, bakakiikiriza, haza buri mbibo ekabaanira ebyana, abamwe makumi ashatu, abandi makumi mukaaga, n'abandi igana. 21Kandi akabagambira ati: Etabaaza ereetwa kujuumikirwa ekiibo, nari shi kuteebwa omu nda y'ekitanda? Kureka timurikugita aha kikondo? 22Manya tihariho kisherekirwe ekitarishuuruurwa, nobu kyakuba eky'omubonano ekitarigambwa butunu. 23Oine amatu agarikuhurira, ahurire. 24Yesu akongyera yaabagira ati: Mwetegyereze ebi murikuhurira. Endengo ei murengamu, naimwe niyo murirengyerwamu kandi mukongyerwaho. 25Manya oine, aryaheebwa ebirikukiraho, kwonka otaine, aryayakwa nangwa n'eki aine. 26Kandi yaabagira ati: Obukama bwa Ruhanga buri nk'oku omuntu abiba embibo omu itaka, 27akagwejegyera kandi akasisiimuka nyekiro na nyomushana; obwo, embibo neemera, neekura, haza we atarikumanya mimerere yaayo na mikurire yaayo. 28Eitaka niryo rimeza ryonka embibo; habanza akababi, hataho obushiisha, hakurataho okwera. 29Ogwo musiri ku gwera, ahonaaho aimuka, agutamu engyeso ahabw'okuba eigyesha ryahika. 30Kandi akagira ati: Mbwenu obukama bwa Ruhanga nibushusha ki? Tukaabugyeragyeranisa na nfumu ki? 31Buri nk'enjuma y'embibo ya karidaari; eba nkye okukira embibo zoona ez'omu nsi, omu bunaku obu bagibibiramu. 32Ku eheza kubibwa, ekura, erugamu ekishaka ekirikukira ebindi byona, haza kitantamura amataagi mahango; enyonyi z'omu kaabunga zibona kuhuumurira omu kicuucu kyakyo. 33Yesu akaba abagambira ekigambo kya Ruhanga naakirabya omu nfumu nyingi nk'ezo, nk'oku baabaire babaasa kushoboorokyerwa; 34kandi tarabagambiire kintu kyona atakirabize mu nfumu; kureka abatendekwa be, ku yaabaire aba ari hamwe nabo bonka, abashoboororera byona. 35Aha izooba eryo omwabazyo ku gwabaire nigukiika, Yesu yaabagira ati: Ka twambukye seeri. 36Batyo baatsigaho ekimbuuro ky'abantu, baagyenda nawe omu bwato obu yaabaire arimu; kandi n'agandi maato gaagyenda nawe. 37Bwanyima haija eihunga ringi, ebingonzi byayeshuka omu bwato, bwabura hakye kwijura; 38obwo we ari aha isinga, ayeshegwire omushego agwejegyeire. Baamusisiimura, baamugira bati: Mwegyesa, k'ohugireho! Manya twaza kufa! 39Atyo akanguka omu turo, akabukira ogwo muyaga, agambira enyanja ati: Cureera! Omuyaga gutuuza; hagira obucureera bwingi. 40Bwanyima abagira ati: Ahabw'enki nimutiina mutyo? Biri timwine kwikiriza? 41Batyo baitwa obwoba, bagambirana bati: Mbwenu ogu ni muntu ki, ou omuyaga n'enyanja birikuhurira?

will be added

X\