Mark 2

1Ku haahingwireho ebiro, Yesu yaagaruka Kafarinaumu, reero enkuru yaabuga, kyamanywa ku ari omuka owaabo. 2Abantu baateerana baingi, baabura omwanya nangwa n'aha muryango, obwo naabarangirira ekigambo kya Mukama. 3Omuri ago magingo, haija abantu bamureeteire ozingazingirwe, aheekirwe abashaija bana. 4Ku baabuzire ah'okumumuhikiza ahabw'obwingi bw'abantu, baashakaarura aha mutwe gw'enju eruguru y'ahi Yesu yaabaire ari. Ku baaherize kufumuraho ekihengyere, baashuumizaho akatanda aku ozingazingirwe yaabaire agaramiho. 5Yesu, ku yaareebire baine okwikiriza, yaagambira ozingazingirwe ati: Mwana wangye, waasaasirwa ebibi byawe. 6Obwo bamwe aha bahangu b'eiteeka abaabaire bashutami aho baayeebuuza bati: 7Ogu mushaija ekirikumugambisa kityo ni ki? Ka naarogota! N'oha orikubaasa kusaasira ebibi kureka Ruhanga wenka? 8Yesu, ahabw'okumanya ebi barikuteekateeka, ahonaaho yaabagira ati: Ahabw'enki nimwebuuza mutyo? 9Mbwenu ekirikurahuka ni kiiha, okugira ozingazingirwe nti: Waasaasirwa ebibi byawe; nari okugira nti: Imuka, oiheho akatanda kaawe, ogyende? 10Mbwenu ka mboorekye ku Omwana w'omuntu aine obushoboorozi omu nsi kusaasira ebibi. Atyo agambira ozingazingirwe ati: 11Ninkuragiira, imuka, oiheho akatanda kaawe, otaahe. 12Ogwo mushaija yaimuka, ahonaaho yaihaho akatanda ke, yaagyenda boona nibamureeba; haza baatangaara, baahimbisa Ruhanga nibagira bati: Eki tikikareebwaga! 13Bwanyima Yesu yaagaruka, yaaza aha rubaju rw'enyanja; abantu boona baamuteeraniraho, nawe yaabeegyesa. 14Ku yaabaire naahingura, yaareeba Leevi mwene Alufaayo ashutami omu ihoorezo; yaamugira ati: Nkuratira. N'onu yaimuka yaamukuratira. 15Mbwenu Yesu ku yaabaire ari omwa Leevi, naarya, abashorooza b'omushoro baingi n'abasiisi bakaba bashutami nawe aha meeza hamwe n'abatendekwa be; ahabw'okuba bakaba bariho baingi abaabaire nibamukuratira. 16Abahangu b'eiteeka ab'omu Bafarisaayo, ku baamureebire naarya n'abasiisi n'abashorooza b'omushoro, baagambira abatendekwa be bati: Ahabw'enki naarya kandi naanywa hamwe n'abashorooza b'omushoro n'abasiisi? 17Yesu, ku yaakihuriire, yaabagarukamu ati: Abahuriire tibo beetenga omufumu, kureka abarwaire. Manya tindaizire kweta bahikiriire, kureka abasiisi. 18Eizooba rimwe abatendekwa ba Yohaana n'Abafarisaayo, ku baabaire nibeesiibyakwo, abantu baija, baabuuza Yesu bati: Ahanki abatendekwa ba Yohaana n'ab'Afarisaayo beesiibyakwo, haza abaawe bateesiibyakwo? 19Yesu yaabagarukamu ati: Nimugira ngu abakwe beesiibyakwo kishwera akibaine? Manya ku baba bakiri hamwe nawe, tibeesiibyakwo. 20Kwonka obunaku buryahika, kishwera abaihweho; haza obwo nibwo baryesiibyakwo. 21Tihariho muntu oteera ekiremu kisya aha mwenda mukuru. Ku yaakukikora, kikaagutaagura, n'ekitaaguka kyongyera kuhanguka. 22Kandi tihariho muntu oshuka viino y'omutahe omu furebe nkuru. Ku akikora, egyo viino ezibarura, afeerwa atyo byombi viino n'efurebe. Manya viino y'omutahe eshukwa omu furebe nsya. 23Obundi ahari Sabato Yesu akaba naaraba omu misiri y'engano; abatendekwa be baatandika kucwa obushiisha nibahingura. 24Abafarisaayo nikwo kumugira bati: Beitu, ahabw'enki abatendekwa baawe nibakora ekitarikwikirizibwa iteeka ahari Sabato? 25Yaabagarukamu ati: Timukashomaga eki Daudi yaakozire ashobeirwe, obu we n'abu yaabaire aine baagizire enjara? 26Kandi timurikwijuka oku yaataahire omu nju ya Ruhanga, Abiyataari ari omuhongyerezi omukuru, akarya emigaati ehongyeirwe Ruhanga, eyaabaire eikirizibwa kuriibwa abahongyerezi bonka, kandi n'oku yaagihaireho n'abu yaabaire aine? 27Ayongyera abagira ati: Manya Sabato ekateebwaho ahabw'omuntu, ti muntu habwa Sabato. 28N'ahabw'ekyo Omwana w'omuntu ni mukama wa Sabato nayo.

will be added

X\